Press "Enter" to skip to content

Ïaid shaphrang ka jingpyntrei ïa ki ïing lum jaboh ha ki shnong ka West Khasi Hills

Nongstoiñ, Nohprah 7: Ka jingpyntrei jong ka sorkar ïa ki jaka pynlang jaboh, kaba dei kawei na ki bynta ba la mang pisa lyngba ka Swachh Bharat Mission (SBM), kaba la pynïaid da ka Public Health Engineering lyngba ki Block Office, ka la sdang treikam bha ha man la ki shnong ha baroh kawei ka West Khasi Hills District.
Haba phai sha katei ka jingpyntrei ïa kitei ki ïing ban lum ban lang ïa ki jaboh, watla baroh ki shnong kim pat lah ban pyndep, hynrei ka jingpyntrei ka la ïaid shait shait ha kylleng ki jaka.
Ïa kitei ïing kiba la shna ar kamra na ka bynta ban pynïakhlad ïa ki jaboh kiba pyut bad ki bym pyut, la shna bad la pynitynnad lyngba ki jingdro ïa ki dur bad la thoh ruh ïa ki kyntien ban pynkynmaw ïa ki paidbah ba ïaid ba ieng ba kin pule khnang ba kin sngewthuh bad kin kiar na kaba bret pathar ïa ki jaboh ha lynti syngkien.
Kaei kaba itynnad na ka jingdon jong kitei ki jaka pynlang ïa ki jaboh haman la ki dong jong ki shnong, ka long ba ka la ïarap shibun ïa ki paidbah ban bud ryntih ïa ki kyndon ba ka sorkar ka la buh ha ka jingïadei bad ka khuid ka suba. Kaei kaba donkam eh ka long ba ki paidbah nongshong shnong naduh ki longïing long sem, ki dong, ka shnong ka thaw, kin shimkhia ba ka jingkhuid jingsuba ka long kaba donkam eh.
Na ka liang ka sorkar ka la pyrshang ki lad ki lynti ban hikai ban ym bret pathar ïa ki jakhlia. Na ka por sha ka por la pynlong ruh da ki jingpynshai ha ki jaka sor bad nongkyndong halor kane. Hynrei haduh mynta dang bun bha ki bym sngewthuh bad ki dang bteng ban bret ïa ki jaboh kat haba lap khamtam eh ïa ki kynja plasik, bilor um bad kiwei kiwei.
Ha kine ki sngi wat ha ki shnong kyndong ruh, la lap ba haman la ki lad bad ki dong bad ha rud ki surok bad lynti shnong, ki la ïaleh katba lah ban buh ïa ki jaka pynlang jaboh kum ki tin, ki borti bad kiwei kiwei ba ki paidbah shnong bad kiba ïaid ba ïeng kin bret ïa ki kynja pastik song jingbam, bilor um bad kiwei kiwei ki jait jing song ba ki bam haba ki ïaid lynti. Hynrei katei ka jingpyrshang imat kam sei soh ei ei ruh em, namar ki nongshong shnong kim pat sngewthuh ïa kane.
Kumta kaba donkam ka long ba ka por ka la dei ban sdang na man la ki rympei ïing bad ba ki kmie ki kpa kin hikai ïa ki khun naduh dang rit bad wat ïa kiba la kham heh ruh, khnang ba kin mlien ban ym bret pathar ïa ki jaboh.