Press "Enter" to skip to content

Ka Congress ka hap kitkhlieh ïa ka jingrung kyrthep ki Muslim ha North East : CoMSO

Pyntreikam ïa ka NRC, u 1971 un dei u snem ot kyrteng

Shillong, Nohprah, 07: Ka Confederation of Meghalaya Social Organisation (CoMSO) ka la dawa ïa ka Seng Congress ba ka dei ban shim ïa ka jingkitkhlieh halor ka jingkharoi jong ki jaidbynriew Muslim ha ki jylla jong ka thaiñ Shatei Lamihngi jong ka ri India baroh kawei.
“Ka Citizenship (Amendment) Bill ka long ban ïada ïa u Hindu bad ban beh ïa u Muslim. Ïa kata ki (BJP) la kren shai. Dei na kata ka daw ki (Sorkar NDA) wanrah shwa da ka CAB ban pynlong nongshong shnong ïa ki Hindu bad ban wnarah pat sa da ka National Register of Citizens (NRC) ban kyndang bad ban beh lut ïa ki Muslim,” la ong u Chairman ka CoMSO u Samla Robert June Kharjahrin ha ka jingïakren bad ki lad pathai khubor mynta ka sngi saitjaiñ.
“Mano ba hap ban kitkhlieh ïa ka jingwanrah ïa ki Muslim….ka dei ka Congress. Ka Congress dei ka Party kaba hap ban shim ïa ka jingkitkhlieh ban wanrah ïa ki Muslim ha ka thaiñ Shatei Lammihngi baroh kawei. Ki (Congress) la synshar ïa ka thaiñ Shatei Lammihngi la katta balei kim leh eiei,” la kynthoh une u nongïalam ka CoMSO.
“Ïa ka jingkharoi jong ki mynder ri ba wan be-aiñ lada phi peit katkum ka National Register of Citizens (NRC) jong ka Assam dang bun ki mynder ri Muslim ba wan rung be-aiñ ban ïa ki mynder ri Hindu. Na ka 19 lak, ki Hindu ki long tang 4 lak, kiba sah nangta ki dei lut ki mynder ri Muslim,” ong u samla Robert.
“Hynrei ngi pat ngi ong ba lada dei u mynder ri Hindu ne u Muslim u dei hi u mynder ri uba hap ban leit phai noh. Ngi, ngi ong ba dei ban wad ïa u mynderi ri bad ban pyndam pa ka kyrteng na ka jinglong nongshong shnong bad ban leit pynphai biang sha ka ri kaba ki wan. Ym donkam shuh hi ruh ban dang shna ïa ki Camp hynrei ban shu beh beit.”
Une u nongïalam jong ka CoMSO u la kynthoh ruh ïa ka jingkren jong u Nongïalam ka Liang Pyrshah ka Iingdorbar Thaw Aiñ ka Jylla u Dr. Mukul Sangma uba la kren dang shen ba ladei ban pyntreikam shwa da ka National Register of Indian Citizens (NRIC) ïa kaba la wanrah jingithuh ha u snem 2003 khnang ban ïoh jingtip halor ka jingdon jong ki nongshong shnong bapura bad ïa kiba wan sah be-aiñ hapoh u pud u sam jong ka ri.
“Ka NRIC ka dei tang ban shu buh jingthoh ïa ka jinglong nongshong shnong ha ka ri India. Kan ïapher aiu kane bad ka Khanasamari. Hynrei haba ngi ong ban dawa ïa ka National Register of Citizens (NRC) ka mut ba ngi dawa ïa kata ka rukom kaba lah ban pyndam (delete) bad ban lap (detect) bad ban beh (deport),” la ong u Samla Robert bad bynrap, “Ban ïaleh aiu hi ruh ïa kata ka National Register of Indian Citizens (NRIC) tang ban shu ïa lum thup ïa kita ki kyrteng. Kata ka donkam tang ha ki Skhim bad ha kiwei kiwei ki jingthmu.”
Une u nongïalam ka CoMSO u la dawa ruh ïa ka Sorkar ba kan pyntreikam da ka National Register of Citizens (NRC) ha baroh kawei ka jylla Meghalaya ryngkat bad u snem ot kyrteng ïa ki briew kiba wan sah be-aiñ naduh u snem 1971, kata, ha u snem ba la Jylla Meghalaya ka la ïoh ïa la ka jong ka jylla bapura.
“Ban ïada ïa ka jadbyrriew ngi donkam ïa ka NRC bad u snem ot kyrteng un long naduh u snem 1971 ba ngi la ïoh ïa la ka jong ka jylla hynrei ym dei ban shu ai ïa ka NRC khlem u snem ot kyrteng te kam don jingmut,” u la bynrap.