Press "Enter" to skip to content

Ka jingkhyllem ka EC jong ka UDA dei ka jingrhah bor u Chairman ka KHADC: Bah Teiñwell

Shillong, Nohprah, 07: U Bah Teiñwell Dhar uba long uba long u Chief Executive Member (Dy.CEM) barim jong ka Khasi Hills Autonomous District Council (KHADC) mynta ka sngi saitjaiñ u la kynoh ba ka daw tynrai kaba pynlong ïa ka Executive Committee ba la ïalam da ka Kynhun jong ka United Democratic Alliance (UDA) ha Khasi Hills Autonomous District Council (KHADC) ban shah pynkhyllem, ka dei namar ka jingrhah bor jong u Chairman ka Iingdorbar Thawaiñ ka KHADC, u Bah Pynshngaiñ N. Syiem.
Ha ka jingïakren bad ki lad pathai khubor u Bah Teiñwell uba long ruh u MDC ka UDP na Shella Constituency u la ong, “ka daw baroh ka dei ka jingrhah bor bad kam dei da kumwei pat bad ïa kata la pynshisha ruh ïa ka jingkren jong u Chairman
(Bah Pynshngaiñ N Syiem) uba shim ha lade ïa ka bynta jong u CEM ban kren beit beit halor ka pisa.”
“Kane kam dei ka jingbakla ka jong ngi, hynrei ka jingrhah bor. Lyngba ki buit ki jong u, lyngba ki tien jali jaum ki jong u, u lah ban pynkohnguh ïa kiwei pat ki MDC kiba dang thymmai,” la kynnoh u Bah Teiñwell uba long u MDC ka UDP na Shella Constituency.
Haba kylli, hato ka UDA lada ka ïohlad biang ban thaw ïa ka Executive Committee ha KHADC ka don neem ïa ka jingpyrkhat ban weng noh ïa u Ban Pynshngaiñ N. Syiem na ka shuki Chairman jong ka Iingdorbar Thawaiñ ka KHADC, u Bah Teiñwell u la ong, “ïa mynta ngim ïakren ïa kata, hynrei ngin sa ap ïa ka por.”
Lah ban kdew hangne, ka Executive Committee jong ka United Democratic Alliance (UDA) ka la shah pynkhyllem noh ha ka jingïatynjuh bor (No Confidence Motion) ba la wanrah da ka Congress kaba shong ha ka Liang Pyrshah ha ka Dorbar Tlang kaba dang shu dep long shen ha u bnai ba ladep.
Ka Kynhun jong ka United Democratic Alliance ka la kylla ritpaid, da ka jingphet noh jong ka MDC ka Peoples Democratic Front (PDF) ka Kong Magdalyne Mawlong Sawkmie, lai ngut ki MDC jong ka National Peoples’s Party ba kynthup ïa u Bah Mitchel Wankhar, u Bah Alvin Sawkmie bad u Bah Pynshngaiñ N. Syiem.
U Bah Latiplang Kharkongor ïa uba la jied da ka MDC jong ka Kynhun United Democratic Front kum u Chief Executive Member um pat ïoh satia ia ka jingithuh na ka tnat District Council Affairs jong ka Sorkar Jylla hynrei u la ïoh pat ïa ka jingmynjur na u Lat ka Jylla, u Tathagata Roy kum u CEM ka KHADC.
Hynrei ïa mynta, ka Kynhun UDF kam pat don satia ïa ki Executive Member kiba pura namarba u Lat ka Jylla um pat ai satia ïa ka jingmynjur ïa ka kyrteng jong ki. Ha kaba ïadei bad kane u Bah Latiplang u la ujor sha ka Ing Bishar ban phah tuklar noh ha ka namar ka jingslem u Lat ban ai ka jingmynjur ïa ka thup ki Executive Member kiba la dep ban phah.