Press "Enter" to skip to content

Khmihlynti ban ïatreilang ki shipai India bad ka China lyngba ka Joint-in-Hand Military Exercise

Shillong, Nohprah 07: “Ka jingïaleh ban pynneh ïa ka shong suk shong saiñ ha ki jaka khappud ka long kaba donkam bha na ka bynta ban don ka jingïadei kaba jan hapdeng ka Ri India bad China”, la ong u Major General Deepak Mehra ka Indian Army ha ka sngi saitjain haba kren ha ka jingïalang plie ïa ka Hand-in-Hand Joint Military Exercise ba 14 sngi ha pdeng ka India bad China.
“Ka India bad China, kiba dei ar tylli ki Ri kiba dang don ha ka lynti ban kiew sha khmat, ki la mynjur ban pynkhlaiñ ïa ka jingïadei hapdeng jong ki khnang ba kan wanrah ka jingmyntoi na ka bynta ki paidbah nongshong bad kumjuh ban wanrah ïa ka shong suk shong saiñ ha ki jaka khappud”, la ong u Major General Deepak Mehra ha ka jingïalang ha Army Training Node ha Umroi.
“Khnang ban poi sha kane ka jingthmu, ki bor shipai na kine ki ar tylli ki Ri India ki la don ka jingïakren pynbeit bad ban kyntiew ïa ka jingsngew skhem bad kine ki jingkilan lang ki bor shipai ka dei kawei na ki bynta ban wanrah lang ka jingïajan bad jingïasngewthuh jingmut hapdeng ki ar liang”, la ong u Major General.
U Major General Deepak Mehra, uba dei ruh u General Officer Commanding jong ka Army Red Horns Division, u la ong, “Kine ar tylli ki Ri kiba lam khmat da 2 na ka 3 bynta ka jingbun briew ha ka pyrthei, ki la ïa phylliew jingmut ban wanrah bad pyni ïa ka jingïajan sha ki paidbah nongshong shnong”.
Kane ka Joint Military Exercise, kaba dei ha ka sien ba phra, ka long kaba kyrpang mynta, la ong une u ophisar shipai. “Kane ka jingïakilan lang ki bor shipai ka don ka jingmut namar la pynlong ïa ka ha ka snem ba 70 naduh ba la ïateh kular hapdeng ka India bad China”, u la ong.
U Major General Deepak Mehra u la ong ba kane ka jingïakilan lang hapdeng ki bor shipai kan lam sha ka jingïasngewthuh jingmut hapdeng jong ki kynthup ïa ki jingtrei kam ki bor shipai, ki rukom pynïaid kam, ka ka rukom riti dustur bad kumjuh ka jingplie lad ïa ki samla.
Ha kane ka Joint Military Exercise, ka kynhun ba 130 ngut jong ka People’s Liberation Army (PLA) (Tibet regiment) bad kumjuh na ka kynhun na Indian Army (Kumaun Regiment) kin ïa shim bynta. Ha kine ki 14 sngi, kine ki ar kynhun shiphai kin kilan bad ïa ai buit ban ïakhun pyrshah ïa ki kam lehnoh na bar ri ne kiwei pat katkum ka jingai jingtip ka United Nations.
“Ka dei ka lad ka kabu ban wanrah ka jingsngew ïajan da ki rukom kilan kiba lah bab sngewthuh kawei ïa kawei pat. Kan ïarap ruh ïa ki shipai ban don ha ka met ka biang bha ha ki madan ïaleh, ki buit bad ka jingsngewthuh ïa ka riti dustur bad kiwei kiwei”, la ong u Major General Deepak Mehra.
U Colonel K.J. Singh, Commander ka kynhun Indian Army, u la ong ba kin ki jingai jinghikai ban ïakhun pyrshah ïa ki kynhun lehnoh bad u pynpaw ka jingkyrmen ba kane kan ïarap shibun ha ka jingïadei ka India bad China.
Na ka liang u Colonel Hu Chunguang, Commander ka PLA u la pynpaw ba na kane ka jingïakilan lang kan wanrah ka jingsngew ïa dei paralok kaba jan bad wanrah ka shong suk shong saiñ ha ka thaiñ North East khamtam eh.