Press "Enter" to skip to content

Kyrshan u Lat ïa ka CAB, la dei ban pyntreikam kham mynshuwa

Kolkata, Nohprah 07: U Lat ka Jylla Meghalaya u Tathagata Roy hynne ka sngi saitjaiñ, ula kyrshan ïa ka Citizenship (Amend ment) Bill (CAB) bad ong ba ka dei ka sienjam kaba biang eh haba ban jur ba ïa kane ka Aiñ la dei ban pyntreikam noh kham mynshuwa.
‘Ka Citizenship ( Amendment) Bill ka dei ka sienjam kaba biang eh. Lah dei ban pyntreikam kham mynshuwa ïa kane ka aiñ.. Nga thikna ba ka Sorkar Pdeng kan pyntrei ïa ka ha ka rukom kaba dei” ong u Tathagata haba iakren bad ki lad pathai khubor hynne ha Kolkata.
Ka Sorkar National Democratic Alliance (NDA) kala pynrung ïa ka CAB kum ka mat ban wanrah hapoh ka Dorbar Tlang jong ka Ïingdorbar Parliament ba dang iaid mynta. Kat kum ka khubor, u Myntri kam pohing ka Ri u Amit Shah ulah ban wanrah ïa kane ka Bill ha ka sngi nyngkong ban wan.
Ïa ka CAB la dep mynjur teng da ka Ïingdorbar Lok Sabha haba sdang jong une u snem hynrei kala iap noh da ka jing kut jong ka samoi treikam ka Lok Sabha bad ka jingbym lah ban wanrah ha Ïingdorbar Rajya Sabha.
Lada la mynjur da ka Ïingdorbar Parliament, kane ka Ain ka dei ka jingpynkylla ïa ka Citizenship Act 1955 kaba don ïa ki kyndon ba kyrpang ban kheiñ nong India ïa ki poiwir ki bym dei ki Muslim na Bangladesh, Pakistan bad Afghanistan.
Ka Liang Pyrshah kynthup ka Congress, kila pyrshah jur bha ïa kane ka Bill.
Ha ka sngi ba-ar u Amit Shah ula iakynduh ïa bun ngut ki nongialam saiñ pyrthei bad ki kynhun sengbhalang jong ki jylla ka thaiñ Shatei Lam Mihngi kynthup u Myntri Rangbah ka Manipur, Nagaland bad Assam ban ïasyllok halor ka CAB.