Press "Enter" to skip to content

Pynkup burom ka Christ School International, ïa ki riew pawkhmat ka NE da ka NE-India Award

Nongpoh, Nohprah 07: Ka Christ School (International), Nongsder, Umiam, hynne ka sngi saitjaiñ, kala pynkup burom ïa ki 4 ngut ki riew pawkhmat ka thaiñ Shatei Lam Mihngi, kiba la noh synniang lyngba ki kam shakri jong ki ha ka imlang sahlang.
La pynkup burom ïa kine ki saw ngut da kaba ai khusnam “North East India Award” ha ka jingïalang ba long ha hall jong ka skul ha Nongsder. Ïa kine ki khusnam la sam da u Bah D.D.Lapang, Nongaibuit ba hakhlieh duh ka Sorkar Jylla bad Vice President ka NPP, uba la shah khot kum u kongsan.
Kine ki saw ngut ki dei u Rev Dr C.P.Anto, Director Peace Channel, Kohima uba la shah jied ban ïoh khusnam halor ka synniang jong u na ka bynta ka ‘Jingsuk’, i Kong Silbi Passah, Nonghikai bad nongshna jingrwai iba la ïoh ïa ka khusnam halor ka synniang ha ka ‘Education and Youth Development’, u Jobang Modi, Arunachal Charity Home, uba la ïoh halor ka ‘Social Work’ bad u Fr. Rolang Kharkrang, SDB Shillong uba la noh synniang halor ka ‘Tribal Literature’.
Kine ki khusnam ki kynthup ïa ka jingai sngewbha, ka Citation bad ka song pisa ba mar T. 25,000.
Ha kane ka sngi, ka Christ School (International), kala pynlong ruh ïa ka Annual Day cum Christmas festival ba 10 ba kynthup ïa ka jingïaid carol na ki khynnah skul bapher bapher bad kumjuh ruh ki seng niam.
Haba kren ha kane ka prokram kum u kongsan, u Dr. D.D Lapang u la pynpaw ïa ka jingkmen kaba khraw ban ïa don bynta lang ha kum kane ka prokram kaban pynsah jingkynmaw ïa kiba bun ngut khamtam ïa kito kiba shah pynkup burom halor ki kam babha kaba ki la ai ïa ka jingshakri ha ka imlang ka sahlang, ha kaba u la ai ruh ïa ka jingïaroh kaba khraw ïa ki nongpynïaid jong ka Christ Skul bad ka Kong Kong Lige Lovi Foundation kiba la shimkhia ban ithuh kyrpang ïa ki kam babha ba ki riew paidbah ki len lade na ka bynta kiwei.
“Kum kane ka jingpynkup burom ïa ki riew shimet, kiba ju don bynta ban kyntiew ïa ka imlang ka sahlang, ban peit ruh ïa ka khia ka shon jong ki para briew ka long shisha ka bynta kaba khraw ba ki riew shimet kiba la shakri paidbah ha la ha la ka bynta kan nang ai mynsiem ïa ki ban nang pynjanai shuh shuh ïa ka kam jong ki bad ruh kan ai mynsiem bad nuksa ïa kiwei pat ki riew shimet ban shim ïa ka jingkitkhlieh ban phaikhmat na ka bynta ka bha ka miat ka imlang ka sahlang”, ong u Dr. Lapang.
Ha ka jingkren, u Dr. Lapang u la phaikhmat kyrtiang sha ka lawei kaba phyrnai jong ki samla pule, namar ki dei kita kiban pynphyrnai ïa ka lawei ka ri bad ka jaidbynriew kumta, ka long kaba donkam ban hikai bad ban ïalam ïa ki ha ka lynti kaba dei naduh ka por ba ki dang samla, khamtam kum ha kane ka juk kaba mynta, ngi im ha ka juk kaba eh bad kaba dap da ka jingïakhun haman la ka lynti, kumta ka long kaba donkam ïa ki samla ban treishitom ban phaikhmat na ka bynta ban pynurlong ïa la ka jingangnud kaba ki don na ka bynta ka lawei ba phyrnai ka jong ki, bynrap u Dr. Lapang.
Kum u wei na ki nongmihkhmat u ba la rim bha ha ka jylla, u la ai ïa ka jingïaroh kaba khraw ruh ïa u Dr. Varghese u ba dei u nongseng ïa ka Christ Skul International, na ka bynta ban ai ïa ka jingshakri ha kaban pynphriang ïa ka jingnang jingstad jong ki samla pule, kaba la ai jingmyntoi kaba khraw ymtang ïa ki samla pule jong ka Ri Bhoi District hynrei wat ïa ki samla pule ka jylla Meghalaya bad ki jylla kiba mar
Ha ka jingïakop rwai Choir, ka The Mystic Gayle Choir, Mawlai kala ïoh ïa ka 1st prize bad kala ïoh rah sha ïing ïa ka rolling trophy bad ka song pisa ba T. 25,000 katba ka Cadence Choir kala ïoh ïa ka 2nd prize bad ïoh rah ïa ka song pisa ba T. 10,000.
Ha ka jingïakop jong ki skul, ka St. Mary’s Higher Sec. School, Shillong kala ïoh ïa ka nam lahduh bad ïoh rah ïa ka rolling trophy bad ka song pisa ba T. 25,000 katba ka Christ School International, Umiam kala wan baar bad ïoh ïa ka song pisa ba T. 10,000. La pyniphuh iphieng ïa kane ka sngi da ki prokram bapher bapher bad ka food fest.