Press "Enter" to skip to content

Sdang treikam ka CHC Sohra kum ka Referral Unit

Shillong, Nohprah 07 : Ka ophis treikam jong u District Medical & Health Officer & National Health Mission, East Khasi Hills District ka la kynjoh sa uwei pat u mawjam ha ka jingshakri ïa ki paidbah ha ka koit ka khiah hadien ba ka la lah ban pyntreikam pura ïa ka
Sohra Community Health Centre (CHC) kum ka First Referral Unit (FRU).
Katei ka jingpynjanai shuh shuh ïa ka jingshakri ka la urlong da ka jingtrei borbah jong u Dr. Khraw Kharnaior, Obstetric & Gynaecology Specialist ryngkat ka jingïatreilang ki Medical Officer, ki nos bad baroh ki nongtrei jong katei ka jaka ai jingsumar.
Mynta ka Sohra CHC ka la lah ruh pynkha khunlung da kaba suk kynthup ïa ka Tubectomy. Nalor kata ka la ïoh ban don ruh la ka jong ka jaka buh snam.
ïa ka jingpynkha khunlung kaba nyngkong (Caesarean) la lah ban sdang ha Sohra CHC ha ka 15 tarik Naiwieng. Ka kyrwoh na ka ophis u DMHO ka ïathuh ba tad haduh mynta la lah ban pynkha haduh 6 ngut ki khunlung lyngba katei ka rukom kynthup ïa ki 22 tylli ki Tubectomy.
Ka kyrwoh ka ong ruh ba ki paidbah na ka thain Sohra bad ki shnong ba marjan kim donkam shuh ban leit shaduh Shillong ban ioh ia kitei ki jingsumar kiba paka namar ha katei ka CHC la don lut nadong shadong. La ong ruh ba katei kan iarap ban tynrong lang ia ka jingkit ba ba khia jong ka Ganesh Das Hospital, Shillong.
Kumba long haduh mynta, ki jaka ai jingsumar kiba la don hangtei ki kynthup ïa ka Labour room, Operation Theatre, Blood Storage Unit, NCD Clinic, MCH & FW Clinic, Adolescent Friendly Health Clinic (AFHC), Lab Services, OPD & IPD bad kiwei kiwei.