Press "Enter" to skip to content

Ka jingïakhih CAB kan long ka jingïakhih ban pynïatylli ïa kane ka thaiñ

Ka jingïakhih pyrshah ïa ka Citizens Amendment Bill (CAB) kan long ka jingiakhih kaba nyngkong eh tharai ka ban pynïatylli ïa kane ka thaiñ shatei lam mihngi jongka ri India lada jia ba ka sorkar pdeng ka wanrah bad pyntreikam beit ïa kane ka aiñ. Namar baroh ki jylla kane ka thaiñ ym tang ki seng bhalang hynrei wat ki myntri rangbah ne ki sorkar jylla ruh ki pyrshah jur ïa kane ka bill namar ki sngewthuh shai ba lada kane ka bill ka treikam khlem pep kan ktah jur ïa ki paid trai ri trai muluk jong kane ka thaiñ hi baroh kawei.
Hooid wat la ka sorkar pdeng ka kular ba kane ka bill kan treikam tang ïa kito kiba wan sah hapoh ka ri shwa ka 30 tarik Nohprah 2014 hynrei ïa kiba wan hadien kan ym treikam, hynrei ka don ka jingma kaba khraw kaba ap ïa kane ka thaiñ namar tang mynta ruh ki mynder kiba don ha kane ka ri ki don beit da ki klur ta lada tang da ki phew phew lak ngut kin wan kiew sha ki jylla kane ka thaiñ tang katta ka la buh da shisha ïa ki trai ri rit paid haka jingma.
Ym lah ban len ka jingthmu jongka sorkar NDA ba la ïalam da ka BJP ban wanrah ïa kane ka bill ka long ban ïoh pynrung ïa ki briew ba kin long ki vote bank jongka. Ka BJP ka ju kynnoh ïa ka Congress ba ka ailad ïa ki mynder ba kin sah ba kin long ki vote bank jongka hynrei kaba kham sniew shuh shuh ka dei ka BJP namar ka thong jongka ka long ban pynkylla ïa ka ri India kum kata ka ri Hindu kaba mut ban ngeit tang ha kawei ka niam, kawei ka ktien bad kawei ka ri. Hooid la shu pynpaw ba yn ailad ban sah ïa kita ki paid Hindu, ki Christan, Budhist, ki Jains, ki Parsi bad kiwei kiwei kiba shah lehbeiñ niam ha ka Pakistan, Bangladesh bad Afghanistan. Hynrei kiba bun ki ban wan rung kin long beit ki Hindu namar katno ngut eh kin don kita kiwei ki jaitniam.
Kumta ïa kane ka jingïakhih CAB hi dei ban da kyrshan da shisha da baroh khlem da kheiñ jaidbynriew, niam bad ter ter. Namar ka long ka jingïakhih kaba shongnia bad ka long kum ka jingïakhih ban ïada ïa ki jaidbynriew riewlum rit paid jong kane ka thaiñ.
Tangba kaei kaba donkam eh ka long ba haba ïakhih dei ban ïakhih da ka lynti kaba jai jai kat kum ka riti synshar jongka ri ym ban shu ïa leh shongshit da kaba shu ïalun maw, ïa thang kali. Nalor kata haba don kum kine ki jingïakhih ki valunteer ki dei ban da kylli pyrthew bha ïa ki briew lada ki ïaid ki ïeng namar don kiba pli kiba hap ban leit ïaleh ïa ki eksamin final, don kiba hap ban leit kyrkieh sha ki hospital don pat kiba hap ban leit sha ki ïing iap briew bad ter ter. Hooid ïa kiba shu ïaid khlem kam ym dei ban ailad dei ban phah pynphai beit sha ïing tangba ïa kito kiba mih na la ïing da ka jingbym banse ba don ka kam dei ban ailad.
Balei ba ong kumne namar bunsien haba don kum kine ki jingïakhih ki don ruh ki riew shim kabu kiba ym tip ïa ka bneng ka khyndew tang ban ïoh shim kabu bad pynhun ïa kaba ki kwah ki shu lun maw naphang ïa ki kali khlem da kheiñ la ki dei ki ambulance, ki kali press ne ki kali ba leit sha ki hospital ne kiba beh sha ki kam bym lah ban kiar. Haba ïakhih da ka lynti kaba jai jai, dei ba long kiba jai jai ruh khnang ban ïoh da shisha ïa ka jingkyrshan kaba khlaiñ na ki paid nongshong shnong.
Nga tip shai kdar ruh ha kum kane ka issue baroh ki paid nongshong shnong jong kane ka jylla bad ka thainñ hi baroh kawei kin ïasnoh kti lang ha kino kino ki prokram jingïakhih namar ka dei ka issue kaba ktah da shisha ïa ki jaidbynriew rit paid lada jia ba ka sorkar pdeng ka pyntreikam da ka bor.