Press "Enter" to skip to content

Ap jingma ïa ka jingkieng Lailad ba ïaid ki trok kit dewïong palat 100 tylli shimiet

Nang jot nang sniew ka surok Umling sha Patharkhmah:

Nongpoh, Nohprah 09: Ka Jingkieng Lailad kaba dei ka jingkieng ba pyniasoh ia ka Eastern Ri-Bhoi bad ka Western Ri-Bhoi, ka don mynta hapdeng ka jingma kaba khraw, ka ba lah ban khyllem bad twa ha kano kano ka por namar ka jingiaid ia palat 100 tylli ki trok kit dewiong manla ka miet.
Kane ka jingiaid jong ki trok kit dewiong-kiba wan rung na Lad Umling bad ba mih sha National Highway-6, ka dei ruh ka daw bah kaba pynsniew bad pyn khohruh khohram arshah ia ka surok naduh Umling ter ter nalor ba kala dei lypa ka surok kaba sniew bad ka bym dei ban peit la ka dei na ka tnad PWD ne wat ki Nongmihkhmat jong ka thaiñ.
Kat kum ka Signboard bala buh da ka Tnad Public Works Department (PWD) ha kane ka jingkieng, la kren shai ba ka jingkieng ka lah ban kyrda ia ka jingkit ba tang hapoh ka 9 ton.
Kum ban pynkynmaw, ka Deputy Commissioner ka Ri Bhoi District kala pynjari da ka kyndon 144 CRPC kaba khang ia ki kali kit mar ba palat 9 ton ban iaid nalor ka jingkieng Lailad. Kane ka hukum kala mih halor ka jingshem jong ki bor District ba ka jingkieng kala shong synjor palat.
Haba iakren bad ki nongshongshnong ka Lailad, kila pyntip ba ka jingkieng Lailad kumba long mynta kala shong tor bad synjor bha naduh ba wan iaid lyngba ki trok kit dewiong-kaba dang bteng haduh mynta mynne. Ki ong, ki trok kit dewiong ki ju wan iaid na kane ka surok/jingkieng ha ka por mynmiet.
Ki Nongshongshnong ki pyntip ba ha ka por ba iaid ki trok kit dewiong nalor kane ka jingkieng, kane ka jingkieng kala sdang ban khynniuh/sdang khih bad suki suki lada dang bteng ka jingiaid kine ki trok, khlem pep kane ka jingkieng kan sa twa sha wah.
Ki Rangbah Shnong ka Tasku Area ruh na ka por sha ka por ki la dep ban pynsngew sha ki bor District halor ka jingsdang tor jong kane ka jingkieng bad pynpaw ia ka jingbynniaw ioh kane ka jingkieng ka dkut noh-kaba lah ban pyndkut shisyndon ia ka leit ka wan jong ki.
Kum ban shu kdew hangne, jan baroh ki kali na Jirang-Patharkhmat ki ju pyndonkam ia kane ka surok bad ka jingkieng haba ki ban wan donkam sha Byrnihat, Nongpoh ne wat sha Nongbah Shillong. Ka jingdkut jong kane ka jingkieng kan buh ia ki ha ka jingeh namar kin hap ban iaid ia ka lynti kaba jngai la ka long na Assam ne na Mairang.
U MLA ka thaiñ Bah Sosthenes Sohtun ula pynpaw ia ka jinglyngngoh ban tip ba ki trok kit dewiong kila pyndonkam ia ka surok Lailad ban khaii ia u dewiong sha Assam. Une u MLA ula pynpaw ia ka jingbynniaw ba ki nongshongshnong ka Thaiñ kila ailad ia ki trok dewiong ban iaid laitluid khlem da pyrkhat shuh iala ka jong ka jingeh jin ba dkut ne twa noh kane ka jingkieng.
U Bah Sohtun u pyntip ba na ka liang jong u ruh ula iohpdiang ia ki jingjor na ki paidbah halor ka jingshongtor kane ka jingkieng bad pyntip ba ula dep ban ai da ka jingthoh sha ka Deputy Commissioner ka Ri-Bhoi bad kumjuh ruh sha u Superintendent of Police ba kin leh ia kaba donkam. Ula kyntu ruh ia kine ki bor District ba kin peitngor bad ban tehalakam ia ka jingrung be-añ jong ki trok dewiong na ka surok Umling-Lailad.