Press "Enter" to skip to content

Ba pyrshah ka CAB, thang ka KSU ïa ki tyngshop jong u Narendra Modi bad u Amit Shah

Shen yn sdang ka talasi mynder ka KSU ha ki District :
Shillong, Nohprah, 09: Ki dkhot ka Khasi Students Union (KSU) mynta ka lah sngi u Blei ki la thang ïa ka dur tyngshop jong u Myntri Rangbahduh ka ri u Narendra Modi bad kumjuh ruh ïa ka dur tyngshop jong u Myntri ka tnat Kam Pohing jong ka Ri u Amit Shah kum ka jingpyrshah ïa ka jingwanrah ïa ka Citizenship (Amend ment) Bill, 2019 hapoh ka Iingdorbar Thawaiñ Lok Sabha.
Ryngkat ka jingpyrta ïa ki sur pynrem, ki dkhot ka KSU kiba la mih na ka ophis treikam jong ka seng ki la pynrem jur ïa ka Sorkar National Democratic Alliance (NDA) ba la ïalam da ka Bharatiya Janata Party bad kumjuh ïa u Lat jong ka Jylla u Tathagata Roy uba la pynpaw ba u kyrshan pura ban pynlong aiñ ïa ka CAB.
Ka KSU ka la thang ïa kine ar tylli ki dur tyngshop ha syndah ka Students Field, Jaïaw Pdeng, Shillong hadien ba la wai ka jingïalang jong ka Central Executive Committee (CEC) kaba la long ha ophis treikam jong ka Seng kaba don ha Jaïaw, Shillong.
U President ka Seng u Samla Lambokstarwell Marngar ha ka jingïakren bad ki lad pathai khubor u la ong, “hadien ba ngi la ïohi ba la mynjur ban pynlong ïa ka CAB ha Iingdorbar Thawaiñ Lok Sabha hynrei na ka liang ka seng ngi ieng ha kajuh ka nongrim ban pyrshah bad ngi kyntait mardor ïa kane ka aiñ jong ka Sorkar.”
“Ka jingkren jong ka Sorkar India ban pyllait ïa ka CAB ïa ka Jylla Meghalaya kaba shah kdup ha ka Sixth Schedule, ka dei tang ka jingpynbiej ïa ki paidbah ka jylla Meghalaya. Naduh u snem 1952 ka la don ka Sixth Schedule te balei pat ngin da ïakren ïa kata ka ishu mynder? Ka jingkylli ka long, hato ki don mo kita ki aiñ ne ki kyndon jong ka Sixth Schedule ki ban beh bad kyndang ïa ki mynder? Ngin ym lah ban pdiang ïa kane, namarba ka Jylla Meghalaya ka dei ka jylla kaba laitlan bad lada ka Sorkar kam kyndit thiah ngam tip kaei pat ka ban sa jia.”
Haba ïathuh ba ka Seng kan sa pynlong shen da ka jingtalasi mynder u la ong, “Ngi la shim da ka rai mynta ka sngi ba ka KSU kan sa pyntreikam noh da ki aiñ lajong ban pyrkhing ïa ka rung ka mih jong ki mynder ri sha ka Jylla Meghalaya. Ngin sa bthah ïa ki Circle bad ïa ki District ba kin pyntreikam ïa ki aiñ jong ka seng ban ïakhun pyrshah ïa ka jingwan jong ki briew na shabar bad ban pyni ruh ïa ka dak ba ka KSU ka don la ka jong ka aiñ ban pyntreikam,” la ong shuh shuh une u nongïalam ka KSU.
Katkum ka jingïathuh jong u, ka KSU ka don kumba 700 tylli ki Unit ha kylleng ka ri Khasi bad Jaiñtia.
U la ïathuh ruh ba ki snem ba ka KSU ka la pynlong hi ïa ka jingkhynra mynder, tang ha ka shi sngi ka seng ka la ïoh bat ym duna ïa ka san hajar ngut ki briew kiba wan nabar jylla ki bym don ïa ki kot ki sla kiba biang.
Une u nongïalam ka KSU u la kyntu ruh ïa ki paidbah nongshong shnong jong ka Bri u Hynñiewtrep ba kin kyrshan ïa ka pakhang shnong ba la khot pynlong da ka North East Students’ Union (NESO) lashai ka sngi Baar ha baroh kawei ka thaiñ Shatei Lammihngi jong ka ri India ka ban sdang naduh ka por 5:00 baje mynstep haduh 4:00 baje nohphai sngi.
Ha kane ka CEC, ka Seng ka la pynbna ruh ba ka sa plie paidbah biang ha ka 30 tarik mynta u bnai ïa u mot sahnam ba shirynieng jong u Khlawait, u Kiang Nangbah ïa uba la tei da ka Seng hajan syndah ka Shillong Civil Hospital.
Ka Seng ka la rai ruh ban pynlong ïa ka General Executive Council (GEC) ha ka 11 tarik u bnai Kyllalyngkot, 2020 ban ïakren sani halor ka jingpynslem jong ka Sorkar Jylla ban pynieng ïa ki khyrdop talasi mynder bad shibun kiwei pat ki mat ïakren.