Press "Enter" to skip to content

Dawa u MLA ban pyntreilang ïa ka ILP ha Meghalaya ym tang ha Manipur

Shillong, Nohprah 09: U MLA ka Mawlai Constituency Bah Process T Sawkmie, ula dawa ïa ka Sorkar Jylla ba kan tynruh ïa ka Sorkar National Democratic Alliance (NDA), ba kan pyntreikam lang noh ïa ka Inner Line Permit (ILP) ha Jylla Meghalaya kumba la rai ban pyntreikam ha Jylla Manipur.
Ka jingdawa jong une u MLA kala mih halor ka jingpynbna jong ka Sorkar NDA ban pyntreikam lang noh ïa ka ILP ha Jylla Manipur nalor ka Nagaland, Mizoram bad Arunachal Pradesh. Ïa kane la pynbna da u Myntri kam Pohïing ka Ri, u Amit Shah hynne ka sngi hapoh ka Ïingdorbar Parliament.
Lah ban kdew hangne ba ka Jylla Manipur kala kylla madan thma ha ka jingïakhih dawa Inner Line Permit (ILP) ha ki khyndiat snem bala leit noh bad shibun ki mynsiem kila duh ha kane ka jingïakhih.
U MLA ka Congress na Mawlai ula kynthoh tyngeh ïa kane ka rai jong ka Sorkar NDA bad ong “Kane ka dei ka jing leh shiliang ïa ka Meghalaya bad ka jingpyrshang ban pynïapait ïapra hapdeng ki paid riewlum ka thaiñ Shatei Lam Mihngi”.
U Bah Process uba dei ruh u Chief Whip ka Liang Pyrshah ha Jylla, ula ong ba ka jingdawa ILP hapoh ka Jylla ka dei kaba la slem bha bad kane ka sur kala sawa jam ruh mynta ha ka jingïakhih pyrshah ïa ka CAB.
“Pynban ka Sorkar Pdeng ha ka jaka ban ai ILP, kala pyllait man ïa ka CAB na ki jaka Sixth Schedule” ula ong bad bynrap ‘Ka Sixth Schedule bad ka ILP, kim don jingïadei satia bad ki ïapher bak ly bak”.
Ha kajuh ka por, une u MLA ula kyntu ïa ka Sorkar Jylla bad kumjuh ruh ïa ki MP ka Jylla ba kin pynsngew sha ka Sorkar Pdeng ïa ka jingdonkam ban pyntreikam lang ïa ka ILP hapoh ka Jylla bad ka thaiñ Shatei Lam Mihngi baroh kawei.