Press "Enter" to skip to content

Kyrpad ki SRS Umtyrnga ïa ka Sorkar ban ym ailad

Ba thmu die jaka sha ki BSF
Shillong, Nohprah 09 : Ki nongïalam shnong jong ka thaiñ Umtyrnga hapoh ka kynhun jong ka Synjuk ki Rangbah Shnong, ki la kyrpad ïa ka sorkar ba kan tuklar noh mardor ha shwa ba ki katto katne ngut ki briew kin die duh noh ïa ka shnong baroh kawei na ka bynta ban ban buh ïa ka ktem shipai BSF.
Katei ka kynhun haba kren bad ki lad pathai khubor, ki la pynpaw ba ki shaniah mynta sa tang ha ka jingtuklar jong ka sorkar bad ka KHADC, lym kumta katei ka shnong khappud kaba long kum u mawpud ïa ka Meghalaya kan sa jah noh bad kylla long noh tang kum ka ktem shipai.
Na ka liang u Bah Markus Lapasam ba dei u nongai ktien jong ka SRS u la ong ruh ba katei ka jaka kaba paw ba ka don kumba 12,000 akar kaba bun kadei ka jaka rep jong ki paid Khasi bad Garo kynthup ïa ki jaka ba don ka shnong. Hynrei sop sop ka la ïaid pat ka jingthmu ban die noh ïa ka sha ki shipai khlem da don satia ka jingtip jong ki nongshong shnong.
Ha kajuh ka por ki la dawa ruh ba dei ban pynduh shi syndon ïa ka jingrejistar ïa katei ka jaka halor ka nongrim ba la shu leh sop sop da ki katto katne ban ïoh die pat ïa katei ka jaka ha ka dor kaba kot sha ka 78 klur tyngka.
“Kiba bun na katei ka jaka, kadei ka jaka rep jong ki nongshong shnong, hynrei ka jingkylli kaba mih ka long kumno kitei ki briew ki lah ban thied ïa ka jaka bad die pat sha ki shipai,” bynrap shuh shuh u Bah Markus.
Katkum ka jingïathuh u, na kaei kaba paw, ki la don haduh 13 tylli ki shnong kiban shah ktah na katei ka jingthmu ban die ïa katei ka jaka. Kumta halor kane, u la kyntu ïa ki bor sorkar ba kin leh ei ei noh mardor namar kin don da ki hajar hajar ngut ki nongshong shnong kiban hap ban shah ktah.
“Dei ban pynlong beit da ka jingleit jurip langs ha katei ka jaka kynthup naduh ka sorkar jylla, ka KHADC bad ruh ka Hima Mylliem nangta ka Raid Marwet ban lap lut ïa ka jingshisha baroh bad pynshisha ruh katei ka jaka ka dei ka jongno.”
Katei ka kynhun, ka ong ruh ba dei tang da ka jingleit jurip lang markhmat kaba lah ban sei pyrthei lut ïa ki kam barieh baroh kiba don sop sop ha katei ka jingthmu die noh ïa ka shnong ka thaw sha ki bor shipai.