Press "Enter" to skip to content

La san snem kynthih khlem lah pyntrei ïa ka surok Nongstoiñ-Mawthabah

Nongstoiñ, Nohprah 9: Ka jingthmu jong ka sorkar ban shna ïa ka surok two lane na Nongstoiñ sha Mawthabah kaba dei ban ïaid lyngba ïa palat 16 tylli ki shnong, ka la shu pulom bad sah kut khlem poi shaei shaei ruh.
Katei ka surok ka dei kaba la mang pisa da ka sorkar pdeng lyngba ka Specïal Accelerated Rural Development Project (SARDP) ha kaba ka BSC-C&CJV, ka Kompeni kaba shna ïa ka surok National Highway 44 (E) Shillong-Tura, ka la thep ïa ka Tender bad ka la ïoh ïa katei ka jingtrei bad ka la sdang ruh ban shna ïa ki ophis treikam bad jaka sah jong ki nongtrei ha Demnar kaba don hajan ka shnong Myrïem.
Kum ban pynkynmaw ba shuwa ban sdang pyntrei ïa katei ka surok, ka la don ka jingpyrshah kaba jur na ki katto katne ki sengbhalang ha kaba ki la kynnoh ba katei ka surok ka dei ka surok kaba thmu ban pynsuk ïa ka jingtih ïa u marpoh khyndew Uranium uba don ha Mawthabah, Domïasiat bad kiwei kiwei ki jaka ha katei ka thaiñ. Nalor katei ka jingpyrshah jong ki sengbhalang, sa kawei pat ka jingkhanglad ban pyntrei ïa katei ka surok ka dei namar na ka liang ka Khasi Hills Autonomous District Council ruh kam shym pat la lah ban ai ïa ka No Objection Certificate (NOC) ha kaba ïadei bad ka jingpyntrei ïa katei ka surok.
Hadien kitei ki kynrum kynram kiba la mih shuwa ban pyntrei ïa katei ka surok, ka Synjuk Nongsynshar Shnong Umdohlun Area (SNSUA) ka la pynlong ïa ka jingïalang paidbah ha ïew Umdohlun ha ka 10 tarik Naiwieng 2015 bad ka la pan ruh ïa ka jingïatreilang na ki paidbah bad ki trai khyndew, na ka bynta ban dawa na ka sorkar ba ka dei ban pynbit pynbiang noh ïa ki jingdonkam baroh khnang ba yn lah ban pyntrei noh ïa katei ka surok.
Ha ka jingïalang paidbah ba la khot da katei ka synjuk, baroh ki paidbah jong ka thaiñ naduh Rangblang, Warsanlyngdoh, Phlangdiloiñ, Nongtnger bad baroh ki nongshong shnong katei ka thaiñ, ki ïa mynjur lut bad ki la dawa ruh ba dei ban pyntrei beit ïa katei ka surok, namar ba kim kwah ba ka thaiñ kan sahdien sah.
Wat la katei ka jingdawa jong ka synjuk ryngkat ka sur jong ki hajar ngut ki paidbah kiba angnud ban ïoh ïa ka surok kaba bha, na ka bynta ban suk ka leit ka wan, ka kit ka bah ka sawa jam bha. Hynrei haduh mynta la san snem kynthih kam shym pat la urlong satia. Kumta ka sorkar ka la dei ban shimkhia lem da kaba pynshai ruh ha ki paidbah la yn pyntrei ne yn sangeh noh shisyndon, namar ki paibah kiba ïaid ba ïeng bad ki nongleit nong wan na kitei ki thaiñ ki la shu sah ha ka umdum.