Press "Enter" to skip to content

Mynjur ka Lok Sabha ïa ka CAB

Shillong, Nohprah 9 : Ka ïing dorbar Lok Sabha jong ka ri mynta ka miet ha ka por 12 baje ei ei shiteng synnia ka la mynjur ne pass ïa ka Citizenzhip Amendment Bills (CAB) da ka jingkyrshan jong ki 311 ngut ki MP bad kiba pyrshah ia ka bill ki don tang 80 ngut ki MP kiba dei na ka Congress bad Trinamool Congress bad NCP.
Haba jubab hadien ka jingïatai nia kaba 12 kynta, u myntri kam pohïing ka ri u Amit Shah u la kular hapoh ka ïing dorbar ba kane ka bill kan nym ktah ïa ki article ne ki kyndon treikam jongka Riti Synshar jongka ri. U la kular ba kan nym ktah ïa ki rit paid ne ïa ki Muslim kiba don hapoh ka ri hynrei la wanrah ïa kane ban ithuh tang ïa kito ki phet wir kiba phet na Bangladesh, Pakistan bad Afghanistan kiba shah thombor na ka daw jong ka niam.
Kane ka long ka sien ba ar ba la mynjur ïa kane ka bill namar ha ka sien ba nyngkong ruh la dep mynjur tangba kam shym la poi sha ka Rajya Sabha namar ba la dei ka por ban pynwai noh ïa ka Lok Sabha b an leit sha ka elekshon bad kumta kane ka bill kam shym lah shuh ban treikam.
Haba u kren u la ong ba ka sorkar ym tang ba kan wanrah ïa kane ka CAB hynrei kan wanrah ruh sa ïa ka NRC ha baroh kawei ka ri. U la pynpaw ruh ba ka CAB kan nym don jingktah satia ïa ki nongshong shnong ka India.