Press "Enter" to skip to content

Ngin sa leh ïa kaba donkam, lada mynjur ka Parliament ïa ka CAB: Dy. CM

La kyntu ïa ka MP ban kren hapoh ka Dorbar
Shillong, Nohprah 09 : U Symbud Myntri Rangbah ka sorkar jylla, Bah Prestone Tynsong u la ong ba ka sorkar Meghalaya Democratic Alliance hi haduh mynta ka dang ïai long pyrshah beit ïa ka Citizenship Amendment Bill, bad kum ka jylla hi kan sa shim ïa ka rai kaba donkam tam, lada katei ka Bill kaba la wanrah ha kane ka sngi Nyngkong ha Lok Sabha ka ïoh ïa ka jingmynjur.
“Ngin sa ïa kren sani bha, bad leh ïa kaba donkam tam lada katei ka Bill ka ïoh ïa ka jingmynjur ha Parliament,” ong u Bah Prestone haba kynthoh halor ka jingwanrah ïa katei ka Bill ha kane ka sngi Nyngkong da u Myntri Kampohïing ka Ri, u Amit Shah. Lah ban kdew ruh hangne ba ki jylla baroh jong ka thaiñ shatei lam-mihngi jong ka Ri ki pyrshah lut halor ka sienjam ba la shim da ka sorkar pdeng ban wanrah ïa katei ka Bill.
U Bah Prestone u la ong ruh ba ha ka jingïalang kaba long ha ka 30tarik u Naiwieng ha nongbah Delhi ryngkat bad u Myntri Kampohiing ka Ri, ha kaba baroh ki party  na ka liang pyrshah bad liang synshar na Meghalaya, nangta ki sengbhalang ki nongsynshar shnong synshar hima ki la dep ban pynpaw lut ïa ka jingpyrshah halor katei ka Bill bad dawa ruh ba dei ban pyllait noh ïa ka Meghalaya na ki tyngam jong ka.
Shuh shuh u ong ruh ba lada 96 haduh 97 persen ka sorkar pdeng ka lah ban pyllait ïa ka jylla na katei ka Bill, kan eh aiu ïa ka ba kan kynthup lang noh ïa kitei ki 3 bad 4 persen khnang ba ka jylla baroh kawei kan lait noh na ka CAB.
Ha kawei pat ka liang, haba kynthoh pat halor ka jingkular jong u Amit Shah ban ai ILP noh ha Manipur, u Symbud Myntri Rangbah u la ong ba ka jylla ruh ka la wanrah da katei ka juh ka aiñ kaba syriem kum ka ILP.
La iathuh ruh ba ki la dep ban kyntu ia ka MP jong ka NPP na Tura, ka Agatha Sangma ba kan pynsngew lem ia ka sur jong ka jylla hapoh Parliament.
Haba bynrap lang, u MLA jong ka BJP ba dei ruh u Myntri ha ka sorkar jylla, Bah AL Hek u la pynpaw ba tad haduh mynta ki dang ieng beit ha kajuh ka nongrim ban ym ailad ïa kino kino ki ishu kiba long pyrshah ïa ka Ri bad ka Jaidbynriew.
U la ong ruh ba kum ki nongïalam jong ka jylla ki donkam ban da bishar bniah bad peit bniah bha ïa katei ka CAB ha shwa ba kin kynthoh ei ei la ka long ïa katei ka Bill lane ïa kano kano ka ishul. Tangbah u la kren shai pat ba kum u Myntri bad kum u MLA ka BJP kin ym ailad satia ïa kino kino ki ishu kiba lah ban ktah namar ki don kum ki nongïada ïa ka Ri bad ka Jaidbynriew.