Press "Enter" to skip to content

Sawa ka sur pyrshah CAB ha ka jingrakhe lyngkhuh snem ka FKJGP

Kyrshan ka NEIPF ïa jingïakhih ka NESO

Shillong, Nohprah 09: Ka Federation of Khasi Jaiñtia & Garo People (FKJGP) hynne ka sngi nyngkong, kala pynhap pyrda noh ïa ka jingrakhe dap 30 snem jong ka Seng bad ka sur pyrshah ïa ka Citizenship (Amenement) Bill (CAB) kala sawa jam na ka rynsan jong kane ka jingrakhe.
U President ka FKJGP Bah Wellbirth Rani, uba dei ruh u Convener ka North East Indigenous Peoples’ Forum (NEIPF), ula pynbna ba ka NEIPF kan ai ïa ka jingkyrshan ba pura ïa ka jingïakhih jong ka North East Students Organisation (NESO) – kaba pyrshah ïa ka jingthmu pynlong aiñ ïa ka CAB, ka ban treikam mynta ka sngi naduh ka por 5 baje myn step haduh 4 baje janmiet.
Lah ban kdew hangne ba ki kynhun bapher bapher ka Jylla kynthup naduh ka Sorkar Jylla, ki Seng Saiñ Pyrthei, ki Sengbhalang, ki Khlieh Nongsynshar bad kiwei kiwei, kila pyrshah jur ïa ka jingthmu pynlong aiñ ïa ka CAB bad kila aiti ruh daka Resolution sha ka Sorkar ba ong ‘EM ïa ka CAB ha Meghalaya”.
“Ka 28 bad 29 tarik Nohprah ka pynkmen ban ïohi ïa ka jingiatylli jong ka Jylla ban pyrshah CAB. Ngim pat ju ïohi koit ha ki por bala leit noh ba ka Sorkar Jylla bad ki Sengbhalang kin ïapynmih lang tang da kawei ka sur haba ka ishu jong ka jingïakhih bad jingpyrshah ïa ka CAB kala saw jamha kane ka Jylla” ong u Bah Metbah Lyngdoh Lamphang ka Ïing dorbar Thaw Aiñ ka Jylla haba kren kum u kongsan ha kane ka jingrakhe.
Kat kum ka jingong jong u, “Kane ka dei tang u mawjam ba nyngkong eh bad kyrmen ba kan dang ïai bteng” haba bynrap “Ka Sorkar MDA ba ïakynduh dang shen, kala shim ïa ka rai ba kam sngewtynnad bad sngewhun ïa ka rai jong ka Sor kar India kaba pyllait ïa ka CAB na ki jaka ba hap hapoh ka Sixth Schedule..Ngin nang buddien ïa kane ka kam bad ngin sa sdang biang ïa ka jingïakren ban nym pyntreikam ïa kane ka Aiñ ha baroh kawei ka Jylla”.
Haba pynpaw ba kum ki Nongmihkhmat bala jied da u paidbah na man ki Constituency, ka dei ka kamram jong ki ban ieng iada ïa ka hok jong ki trai ri trai muluk, u bah Metbah ula ong “Ngi donbok hangne ba ngi don ïa ka Land Transfer Act bad ka Meghalaya Residents, Safety and Security Act. Hynrei donkam ban nang pynkhlaiñ ïa kine aiñ”.
Une u President ka UDP kaba iatreilang ha ka Sorkar MDA, ula pyntip ba ka Sorkar kala shimkhia bha ïa ka ishu ba ïadei bad ka jingrung kyrthep ki poiwir naduh u snem bala leit noh. U ong ba mynta u snem, ka Sorkar kala mynjur ïa ka Meghalaya Residents, Safety and Security (Amendment) Bill ha ka dur jong ka Ordinance kaba sahkut mynta ha ka miej jong u Lat ka Jylla.
“Ki Entry bad Exit Point ki long kiba donkam ban pynthikna mano ba rung ba mano ba mih na Jylla” ula ong haba pynshai ba kane kam mut pat ba ka Jylla ka pyrshah ïa kiwei pat ki Jaidbynriew.
U Myntri ka Koit ka Khiah ka Jylla Bah A.L.Hek uba dei ruh u General Secretary barim ka FKJGP ula pyntip ba u pyrshah ïa ka CAB bad ong ba ha u “Ka Jylla bad ki paidbah ki dei kiba wan shakhmat eh ban ïa kiei kiei baroh”. U pyntip ba ïa kane ka kyntien ula kren ha ka jingïalang jong ka Kynhun Myntri ba ïakren halor ka CAB.
Haba pynsngew ïa kajuh ka sur, u Bah Wellbirth Rani ula pyntip ba ka jingpyrshah jong ka FKJGP bad ka NEIPF ïa ka CAB kam dei ba ka pyrshah ïa ka Sorkar India ne iano iano ruh hynrei ka dei halor ka nongrim ban iada ïala ka jong ka Jaidbynriew.
Halor ka jingmih khubor ba ka Sorkar MDA ka kyntu ïa ki arngut ki MP ka Jylla ba kin pyrshah ïa ka CAB hapoh Parliament, u Bah Wellbirth ula ong “ Nga kwah ban ong ïa kine ki MP (Vincent Pala bad Agatha Sangma) ba kin leit sha Parliament ban vote pyrshah ïa ka CAB ym ban jah napoh ka Ïingdorbar ne shim shuti ban ïohi shisha ïa ka jinglog rangbah kum ki Nongïalam”.
U Bah Wellbirth ula pynbna ba ka NEIPF-Meghalaya Chapter (FKJGP-HNYF bad RBYF) kan ai ka jingkyrshan ïa ka jingïakhih jong ka NESO. U ong “Ngim kwah shuh ban khot da ki jingïakhih la ka jong namar kan pynkulmar ïa ka jaidbynriew jong ngi..Ka ishu ka dei kajuh, ngim don jingsngewpher ne jingeh ban kyrshan iwei ïa iwei na ka bynta ka dawbah jong ka Jaidbynriew”.
Une u Nongïalam ka FKJGP ula ban jur ruh ïa ka jingdonkam ban ïa burom markylliang ha ka jingiatreikam para kynhun Sengbhalang bad ban iatreilang na ka bynta ka bit ka biang jong ka Jaidbynriew.
Kum shibynta jong ka jingrakhe, U Bah Metbah ula ong “Kane ka dei ka jingpynkut noh ïa kawei ka lynnong bad ka jingsdang jong kawei pat”. Ula ong, 30 tylli ki snem ban pyntyllun ïa ka shalytem jong ka seng kam dei satia ka kam kaba suk bad ula buh ka jingkyntu ïa ki Nongïalam ba kin shim ïa ki jingtynjuh kum ki jingialeh ba kin ïoh kheit ïa u soh jong ka jingthmu jong ki.
Ha kane ka sngi, ka FKJGP kala sam ruh ïa ki jingbuh sah kynmaw (Momento) sha u (L) Martin N Majaw uba dei u Kpa jong ka Meghalaya Land Transfer Act, ki Nongïalam barim jong ka Seng, ki Nongïalam bad ki Dkhot kiba shah kem ha ki jingïakhih nalor kiwei kiwei. Ka Seng kala pyllait paidbah ruh ïa ka CD jingrwai ban pynsah kynmaw ïa kane ka sngi.
Kiwei kiwei kiba la ai jingkren ki kynthup ïa ki President barim ka Seng kata u Bah Sounder Strong Cajee, Bah Emlang Lytan, bah Joe Marwein, Bah Dundee C Khongsit General Secretary ka Seng, Bah Kitboklang Nongphlang Chief Organiser bad Bah Eldie N Lyngdoh Vice President. Ïa ka jingïalang la pynïaid da u Bah Titostar Chyne MDC uba dei u Pubkcity Secretary barim ka FKJGP.