Press "Enter" to skip to content

Takraiñ ka KSU ïa u Lat ka jylla

Shillong, Nohprah, 09: Ka Khasi Student Union (KSU) ka la takraiñ tyngeh ïa u Lat ka Jylla u Tathagata Roy halor ka jingong jong u ba ka Sorkar ka la dei ban pyntreikam noh mardor ïa ka Citizenship (Amendment) Bill, naduh kham mynshwa.
U President ka Seng u Samla Lambokstarwell Marngar ha ka jingïakren bad ki lad pathai khubor u la ong, “Kum u Lat jong ka Jylla u la dei ban long pdeng hynrei kumba ka long mynta u Lat u long kum u khun khatduh jong ka BJP. Nga tharai u long liang. Namarkata, um donhok shuh hi ruh ban shong ha kane ka Jylla jong ngi.”
“Ka Seng ka pynrem lada u briew um sngewthuh ïa ka jingsngew jong ngi kum ka jaidbynriew bad nga tharai ba ngim donkam shuh ïa uta u briew ban dang shong dang sah ha kane ka jylla,” u la bynrap.
Shuh shuh u la ong, “ka jingkren jong u (Lat) nga sngew ba ka dei kam dei ka jingibeiñ ïa ka Sorkar ne ban kyrshan ïa ka BJP hynrei ka jingkren jong u ka dei ka jingñiewbeiñ ïa ka jaidbynriew jong ngi baroh kawei,” bad bynrap, ‘hapdeng ka jingpyrshah u ong ba nga pdiang ïa kane (ka CAB) ba ka dei ban treikam naduh mynno. Um long uba bit, u shu kren kat kaba wan ka High Command tang namarba u ïoh jingim nangto.”Haba kylli hato ka seng kan dawa neem ban weng noh shisyndon ïa u Tathagata Roy kum u Lat ka Meghalaya, une u nongïalam ka Seng ula ong “ka shong ha ka jingstad jong ka Sorkar hynrei kum ïa une u jaidbynriew um donkam shuh ban dang shong dang sah ha kane ka jylla jong ngi.”
Ha kajuh ka por u la ong, “ka Sorkar kam dei kaba matlah namarba ka ladep ïatyngkhuh (bad u Lat) ha kiba bun ki kam.”