Press "Enter" to skip to content

Da ka iing ai sngewbha ka Pathfinders ïa ka riewkynthei ha shnong Mawan

Shillong, Nohprah, 29: Ka Pathfinders kaba long ka kynhun ba 20 ngut ki dkhot ka la ai sngewbha Christmas bad Snem Thymmai da ka iing ba ki la pynshna thymmai ïa kawei ka riewkynthei ha ka shnong Mawan kaba dang hap hapoh ka Mylliem Constituency.
Ïa kane ka iing ba thymmai, ka kynhun Pathfinders ka la aiti sha i Kong Shimtilang Kharkongor ha ka 24 tarik mynta u bnai hapdeng ka jingïalang kaba shongkun ha kaba la sakhi lang ki nongïalam shnong jong ka shnong Mawan bad kynthup ruh ki dkhot ka Pathfinders. Ha ka jingshisha ka Pathfinders ka la thmu ban aiti ïa kane ka iing ha ka 14 tarik mynta u bnai hynrei la hap ban pynkynriah noh ïa ka sngi na ka daw ka jingbym don ka nongbah Shillong hapdeng ka shongsuk shongsaiñ.
Ha ka jingïakren bad u Nongthoh khubor, i Kong Shimtilang Kharkongor i la ïathuh ba i la duhnoh ïa la ki kmie ki kpa kiba la pynheh pynsan bad ïa la u kurim uba long u nongïarap bad uba ju tynrong lang ïa ka jingkit kaba khia ïa ka iing ka sem. Kumta i la hap ban kit ha la ki tyrpeng bad shim ruh ïa ka jingkitkhlieh ban ri ban sumar ïa la ki khun ki kti bad ïa ki arngut ki para kiba dang rit bad ban shong bad sah ha iwei i iing tap shilliang iba tang shi kamra.
“Mynshwa ngi sah tang ha i iing tap shiliang iba rit shi kamra, ngi shet hajuh, ngi bam hajuh bad thiah hajuh,” ong i Kong Shimtilang.
Kaba kham sangsot shuh shuh ïa kane ka longing ha ki snem ba mynshwa ka long ba ha ka por lyiur kane ka longing ka hap ban kdup thiah lang wat ïa u khaw tang ban lait na ka um kaba ju rung hapoh jong ka iing bad ym tang katta kane ka longing ka hap ban thiah siar namarba ka iing rim ka jaw um ha ka por slap bad jur ka lyer. “Nga dap da ka jingsngewnguh ka bym lah batai bad nga dap haduh katta katta ka dohnud ban ïohi ïa kane ka iing kaba thymmai kaba ngam ju phohsniew mynno mynno ruh namarba ba nga long tang ka riewkynthei kaba hap ban bsa ïa la ki khun bad ïa ki para tang da ka kam bylla shoh maw ha shnong Mawjrong,” ong i Kong Shimtilang da ka khmat phuh sam rkhie.
U President jong ka Pathfinders u Bah Living L. Tron u la pynpaw ba kane ka dei ka sien kaba lai ban ai sngewbha sha ki paradoh parasnam da kaba pynshna iing. “Ha ka sien ba nyngkong eh ngi la pynshna ïa ka iing ïa iwei i longkmie ha kane kajuh hi ka shnong bad ha ka sien kaba ar ngi la pynshna iing ha Laitkroh, Mawjrong,” ong u Bah Living.
Haba kylli u la ïathuh, “ngi la sdang ban pynkha ïa ka Pathfinders ha u snem 2016 bad naduh kane ka por ngi la sdang ban kynshew pisa tang da kaba lum synniang na ki para dkhot. Kane ka jingpyrkhat ka la wan hadien ba ngi leit bam khana shi paralok bad hadien kata ngi la pyrkhat ban ïa kaba pynlut kai ïa ka pisa ha ki kam sngewbha ngi sngewdei ban kynshew ïa ka pisa ban leh noh da kino kino ki kam leh isynei ïa ki paradoh parasnam.” U la ïathuh ruh ba ka jingpynieng ïa ka nongrim iing bathymmai jong i Kong Shimtilang ka dei lyngba u synniang na ki paradkhot bad kumjuh ruh na ki katto katne ki nongleh bha kiba la tyrwa mon sngewbha ban ai jingïarap sha kane ka longiing katba ka seng ka dang pynkhreh ban shna noh ïa ka iing.
U Bah Bokstar L. Tron uba long ruh uwei na kiba la don bynta ban tynrong lem ïa ka jingkit bakhia jong ka Pathfinders u la khot bad wer ïa ki parari bad ki paradoh parasnam ba kin don ïa ka mynsiem sngewsynei ïa ki parabriew da kaba plie ïa ka mynsiem ba kyllluid ban synniang lem sha ka Pathfinders ha ki snem ki ban dang wan haba kane ka kynhun ka buh thong ban pynshna iing ïa kano kano ka longiing kaba mad ïa ka jingduk jingkyrduh bad kaba da donkam shisha ïa ki matti leh isynei na ki parabriew.
Ha kane ka sngi ba la aiti noh ïa u shabi jong kane ka iing bathymmai sha i Kong Shimtilang, la pynlong ïa ka jingïalang kaba lyngkot ha kaba la sakhi lang da ki dkhot jong ka Pathfinders, ki nonglehbha, ki nongïalam shnong jong ka shnong Mawan bad kiwei kiwei.