Press "Enter" to skip to content

Duhnong jur ka jylla ha jingkynshew pisa ha ki PSU

Shillong, Nohprah 29: Ka Sorkar Meghalaya kala duhnong jur bha ha ka jingkynshew pisa sha ki Kompani, ki Corporation bad ki Cooperative Bank/Society kumba paw ha ka kaiphod jong ka Comptroller & Audirot General (CAG).
Ka kaiphod kala kdew ba kat kum ki jingkynthoh (statement) ba 8 bad 19 jong ka Finance Account jong u snem 2017-2018 kat haduh ka 31 tarik Lber 2018, ka Sorkar Jylla kala kynshew pisa haduh T. 2628.56 klur ba kynthup sha ki artylli ki Corporation (T. 92.77 klur), 9 tylli ki kompani (T.2427.10 klur) bad 1444 tylli ki Cooperative Banks bad Society (T.108.69 klur).
“Na ki 2 tylli ki Corporation, ka Sorkar kala kynshew haduh T. 90.63 klur sha ka Meghalaya Transport Corporation Limited hapdeng u snem 1986 haduh 2018 hynrei kane ka Tnad kala mad ïa ka jingduhnong ba kot haduh T, 99.62 klur kat haduh u snem 2013-2014” ong ka kaiphod.
La kdew ruh ba na ka T. 2427.10 klur bala kynshew ha ki kompani, T. 2156.93 klur la kynshew ha ka Meghalaya Energy Corporation Limited hapdeng u snem 2012-2013 haduh 2017-2018 bad kane ka Tnad ruh kala mad ïa ka jingduh nong ba kot T. 1510.82 klur.
Nalor kane, haduh T. 162.79 klur la kynshew ha ka Mawmluh Cherra Cement Limited hapdeng u snem 1958 haduh 2015 bad ka jingduhnong jong kane ka Tnad kala kot ïa ka T. 155.06 klur kat haduh u 2016-2017.
“Na ka T. 2427.10 klur bala kynshew ha ki kompani, haduh T. 2427.05 la kynshew ha ki phra tylli ki kompani kiba treikam hapdeng ka jingduhnong. Kine ki kompani kila pynduhnong haduh T. 1746 klur” ong ka kaiphod.
Ka kaiphod ka dew ruh ba na ka T. 108.69 klur bala kynshew ha ki Cooperative Bank/ Society, T. 57.97 klur la kynshew ha ki 1141 tylli ki Cooperative Bank/Society kiba treikam hapdeng ka jingduhnong kaba kot sha ka T. 7.48 klur kat haduh ka 31 tarik Lber 2010. Ym shym la ïoh jingkheiñ satia ïa ka jingtreikam ki 126 tylli ki Cooperative Bank/ Society kat haduh u Risaw 2018.
Ka kaiphod ka kdew ruh ba ka NFRBM Act 2006 kala kren shai ba ka Sorkar Jylla ka dei ban shong bishar halor ka jing treikam jong ki Public Sector Undertaking (PSU) kynthup ban pynkylla thymmai ïa ki rukom treikam jong kito kiba i donkam bad khang khyrdep noh ïa ki bym idonkam shuh.