Press "Enter" to skip to content

Lah ban treikam ka AR ha KHADC mar ïa sdang snem thymmai

Shillong, Nohprah 29: Ka jingbuh thong ka Sorkar Meghalaya Democratic Alliance (MDA) ba lam khmat da ka National People’s Party (NPP) ban pynbor ïa u Lat ka Jylla ban pynjari da ka jingsynshar Administrator lane Administrator’s Rule (AR) ha Khasi Hills Autonomous District Council (KHADC) ka lah ban treikam noh ha ka taiew ba nyngkong mar ïa sdang u snem thymmai, ong ka tyllong khubor, watla na ka liang ka kynhun ki MDC ha ka United Democratic Alliance (UDA), ka la kham bun paid ha Council.
Kum ban shu kdew ba u Symbud Myntri Rangbah ka Sorkar Jylla Meghalaya, u Bah Prestone Tynsong, dang shen u la ong, “Ka bynta kaba ngi ieng ka shai bha ba dei ban pynjari beit da ka jingsynshar Administrator ha KHADC la ka long kumno kumno ruh”.
Da kaba pynpaw bad kubur ba ka la don ka jingkylla ha ka saiñpyrthei ha KHADC, u la ong, “Ka Sorkar Jylla kam lah shah ïa ka jinglong bym kit khlieh ki MDC da kaba ïa phet na kawei ka kynhun sha kawei pat tang ban iohnong ha ka kam saiñpyrthei shimet jong ki. Ka jingthmu ban pynjari da ka jingsynshar Administrator kan dei kawei kaba biang tam na ka bynta ka Council ïa mynta shi por”.
U la ong shuh shuh ba kam dei ban don kano kano ka jingsngew artatien na ki paidbah ban kynthoh ba ka Sorkar ka don jingleh shiliang khmat halor ka jingthmu pynjari da ka jingsynshar Administrator ha Council. U Bah Prestone u la ong ba ka Sorkar Jylla ka kwah ba u Lat un pynjari beit da ka jingsynshar Administrator ha KHADC la ka long kumno kumno ruh kloi katba lah.
Kum ban shu kdew ba donkam 20 ngut ki MDC ki ban soi ban kyntu ïa u Lat ban hukum ban wanrah dorbar kyrpang ban jied ïa u Chief Executive Member (CEM) ba thymmai. Ka Sorkar Jylla ka kyntait ruh ban ithuh ïa u Bah Latiplang Kharkongor kum u CEM. “Ka Sorkar kam pat shym la ai jingithuh ïa u Bah Latiplang Kharkongor kum u CEM bad kumba long mynta ka KHADC kam don CEM,” la ong u Bah Prestone.
Shuh shuh, ka Sorkar Jylla, ha ka sien ba ar, ka la phah jingai jingmut sha u Lat ka Jylla ba un pynmih hukum ban pynjari da ka jingsynshar Administrator ha KHADC.
Ka Sorkar Jylla ha kaba nyngkong ka la ai jingmut sha u Lat ban pynjari da ka jingsynshar Administrator ha KHADC hadien ba ka Executive Committe na kynhun UDA ba lam khmat da ka United Democratic Party (UDP) ka la shah pynkhyllem hadien ba san ngut ki MDC (na ka UDA) ki la vote ban kyrshan ïa ka No-Confidence Motion ba la wanrah da ka liang pyrshah Congress.
Hynrei ha kane ka sien ba nyngkong, u Lat u la kyntait ban pynjari da ka jingsynshar Administrator ha KHADC bad ai jingthoh na ka ophis jong u bad phah jingpyntip lyngba ka ophis Deputy Commissioner ba la ithuh ïa ka elekshon jied CEM ïa u Bah Latiplang Kharkongor.
Kunba long mynta ha ka Ing Dorbar KHADC ba 29 ngut ki dkhot, ka kynhun United Democratic Alliance ka don 16 ngut ki MDC hadien ka jingwan ai jingkyrshan ka MDC khlem seng na Nongshken constituency, ka Grace Mary Kharpuri bad u MDC ka Congress na Mairang-Nongkhlaw, u Bah Batskhem Ryntathiang.
Katba ha ka liang ka United Democratic Forum (UDF) ka la hiar sha ka 12 ngut khlem da khein lang ïa u Chairman ka Council, u Bah Pynshngaiñ N Syiem. Kane ka sien ba ar ba ka Sorkar Jylla ka phah jingai jingmut sha U Lat ban pynjari da ka jingsynshar Administrator ha KHADC ka long ha ka nongrim ba kam i don ka jingskhem watla na kano kano ka liang(UDA bad UDF) ki lah ban wan thaw ïa ka EC ha KHADC.
Dang shen Bah Pynïaid Sing Syiem, Secretary ka UDA u la kam ba u don sa uwei u MDC (uba khlem pat ïathuh kyrteng) na ka liang ka UDF uba thmu ban wan ai lang ka jingkyrshan ïa ka UDA (ban long 17 ngut ki MDC) hynrei haduh mynta ym pat iohi dak satia eiei ruh em. Katba u Bah Latiplang u la kyntu ïa ki MDC ka UDA ba kin wan pyni ïa ka jingdon paid jong ki ha Ing Dorbar ym ban shu kam tang ka ktien.