Press "Enter" to skip to content

Lap ka CAG ba ïoh suhthied ka bamsap ha Meghalaya namar bym pynbiang ïa ki UC

Shillong, Nohprah 29: Ka kaiphod Comptroller & Auditor General (CAG) kala shem ba ka jingbym pynbiang ne jingpyn slem ban aiti ïa ki Utilization Certificate (UC) ka dei kawei kaba la plie jingkhang ïa ki kam bamsap bad kam leh thok hangne ha Jylla Meghalaya.
“Namar ka jingbym don ki UC, ym lah ban pynthikna la ki nongïoh Grant kila pyndonkam hok ïa ka pisa kat kum ka kam baal mang sha ki. Ka jingpynsahteng ïa ki UC ka lah ban plielad ïa ki kam bamsap bad ki kam thok kam shukor” ong ka kaiphod CAG na ka bynta u snem ba kut ha ka 31 tarik Lber, 2018.
Ki Tnad kiba heh jong ka Sorkar Jylla ki bym shym la pynbiang ne pynslem ban aiti ïa ki UC ki dei ka Tnad Education, ka Tnad Social Welfare, ka Tnad Community & Rural Development, ka Tnad Health & Family Welfafe bad ka Tnad Sports & Youth Affairs.
Kat kum ka kaiphod, ka Tnad Education kam shym la lah ban pynbiang haduh 245 tylli ki UC, ka Tnad Social Welfare ka bym shym la lah pynbiang haduh 204 tylli ki UC, ka Tnad Community & Rural Development ka bym shym la pynbiang haduh 71 tylli ki UC, ka Tnad Health & Family Welgare haduh 60 tylli bad ka Tnad Sports & Youth Affairs haduh 53 tylli.
Ka kaiphid ka kdew ba haba kut jong u Lber 2018, haduh 865 tylli ki UC ba kot haduh T. 2950 klur kila shu sahteng ha ka jingbuh jingkheiñ
jong ka Ophis u Principal Account General (Accounts & Entitlement), Meghalaya. Ka CAG ka kdew ruh ba ka Rule 515 jong ka Meghalaya Financial Rules, 1981, ka kdew shai ba lait tang na ka jing shim rai jong ka Sorkar Jylla, baroh ki grant bala ai ki dei ban pyntreikam kat kum ki kyndon bad ban pyndonkam ïa ka hapoh ka por bala buh.
Ka ong ruh ba ki Nongïoh ïa ka Grant jong ka Sorkar ki dei ruh ban aiti ïa ki Utilization Certificate (UC) sha ka Ophis u Principal Accountant General (Accounts & Entitlement) bala soi lang da ki nongpyllait ïa ka Grant hadien ka jingpynshisha kaba la leh thikna.
Ka kaiphod ka ong, namar ka jingbym aiti ïa ki UC, ïa ka jingpynlut pynsep bala pyni ha ki jingkheiñ jingdiah ym shym la lah satia ban ñiew kum ki jingkheiñ kiba pura lane ban pynthikna ruh ba ïa ka pisa la pyndonkam thik kat kum ka jingai.