Press "Enter" to skip to content

Leh burom ki Para Shipai ïa u Shipai ba la khlad noh ha ka Shnong Rongmesek

Nongpoh, Nohprah 29: Wat la ka ïing ka sem, ki khun ki kti bad ka Shnong ka thaw hi baroh kawei ka la pynpaw ïa ka jingduhnoh kaba khraw halor ka jingkhlad noh jong uwei u rangbah uba la rung ha ka kam shipai, hynrei ka jinglah jong ki para shipai kiba la ïa shongthaid ban kynmaw burom ïa ka synniang kaba u la ïada ïa ka ri ka la long ka jingai mynsiem bad ka jingtngen ïa kawei ka longing kaba la duh noh ïa u kpa na ka jingkhlad ba kyndit jong u ha ka Shnong Rongmesek ha Ri Bhoi District.
Une u shipai ba la shongthaid noh bad uba la khlad kyndit ban iehnoh ïa la ka ka kurim bad 7 ngut ki khun, u dei u (L) Paulus Timung na ka Shnong Rongmesek ha Ri Bhoi bad uba trei ruh kum u Shipai Army ha ka Assam Regiment uba la shongthaid mynta la ar snem bad u la lyoh badum u la wan kah pat ïa ka ïing ka sem ka dei halor ka jingkhlad ba kyndit noh jong u ha ka 27 tarik u Nohprah 2019 kaba la pynkthang bad pynsgnewsih ïa ka kurim, ki khun ki kit bad ka ïing ka sem hi baroh kawei.
Ïa une u shipai la tep don burom noh mynta ka sngi u Blei ryngkat ka jingleh niam leh rukom da ka Balang Katholik jong ka Shnong Rongmesek ba hap ha Nongpoh Parish bad da ka jingai mynsiem bad pyntngen ruh da ka jingdon lang ka Dorbar Shnong ha ka jingialam u Bah Albinus Timung, uba dei u Rangbah Shnong bad uba dei ruh u para trai jong u (L) Paulus Timung, bamkwai ha dwar u Blei.
Kaba la ai mynsiem shuh shuh ha kane ka jingleh burom ba khatduh ïa une u shipai ka ri, ka dei ka jingdon lang ki para shipai ba la shongthaid ha ka lama ka Meghalaya Hynñiewtrep Ex-Service Men League kiba la leh burom ïa une u shipai ryngkat ki khubor sngewlem da kane ka kynhun ki Shipai ba la shongthaid na ka jylla Meghalaya.
U Bah V.B Myrchiang, General Secretary katei ka kynhun ki Shipai ba la shongthaid na Meghalaya haba kren ha ka jingleh burom khatduh ïa ka met, u la ong ba kum ki para shipai ba la shongthaid ki pynpaw ka jingduhnong kaba khraw ban duh noh ïa une u Rangbah uba la shakri na ka bynta ka ri bad ka jaid bynriew hapoh ka ri India.
U la iathuh ruh ba une u Rangbah u dei uwei na u Rangbah uba la noh synniang sha ka imlang ka salang lyngba ki kam kiba u la shakri ha ka kam shipai bad ha ka jingshakri ha ka kam shipai u la shah shibun ki jingeh ba ka ri kan ioh ïa ka shongsuk ka shongsaiñ. Kumba la iathuh da utei u nongïalam u Bah Paulus Timung u la shakri ha kylleng ki jaka ka ri kum ha Kashmir, Punjab, West Bengal, Assam, Meghalaya bad kiwei kiwei ki bynta jong ka ri bad ka jingshakri jong u kum u shipai ka long hi ban ïada ïa ka ri na ki nongshun kiba thmu ban thombor ïa ka ri.
Namarkata, kum u para shipai ba la shakri lang ïa ka ri, u la ong ba ka kynhun ka don ryngkat bad ka ing ka sem jong u Bah Paulus Timung, ha kaba wat lada um don shuh ha kane ka pyrthei, hynrei na ka liang ka kynhun kan don ryngkat bad ka ïing ka sem jong u, ki khun ki kti bad ka kurim la ha kano kano ka jingdonkam kaba ki donkam nangne shakhmat.
Lyngba jong kane ka sngi, nalor ka jingleh burom kane ka kynhun para shipai ba la shongthaid, ka la don ruh ka jingleh burom da ka Balang, ka Shnong, ki Samla ha kaba ki la niew tang ïa ki kam ba bha une u Rangbah bad ki la buh ruh da ka jingduwai ba kyrpang naduh ki nongïalam niam ba la do ryngkat ki ar ngut ki Catechist kiba la pyndep ïa ka niam ka rukom katkum ka riti treikam jong ka Balang Katholik shuwa ban leit tep donburom ha u lum jingtep ka Balang Katholik Rongmesek.
Halor ka jingkhlad noh une u Rangbah, ha kane ka sngi la wan ruh ban sngewlem da u Myntri ka sorkar jylla, u Bah A.L Hek shuwa ban tep don burom ïa une u Rangbah bad ryngkat kiwei kiwei ki riew pawkhmat jong ka Ri Bhoi.