Press "Enter" to skip to content

Pynshai paidbah ka Congress ha Rambrai halor ka Citizenship Amendment Act

Nongstoiñ, Nohprah 29: Ha ka taiew ba la lah, ka party Congress ka la pynlong ïa ka jingïalang paidbah ha iew Rambrai, kum shi bynta ban pynpaw bad pynshai paidbah ban pyrshah ïa ka Citizenship Amendment Act (CAA) kaba long ka aiñ kaba ka Sorkar Kmie ka dang pynlong aiñ dang shen.
Ha katei ka sngi la ïadonlang ka Kong Ampareen Lyngdoh, MLA ka East Shillong, Bah George B Lyngdoh MLA ka Umroi, Bah Kimfa Sidney Marbaniang MLA ka Rambrai Jyrngam, Bah Gabriel Wahlang MDC ka Nongstoiñ bad kiwei kiwei ki nongkitkam jong ka party, kiba kynthup ïa u Bah B.Marweiñ President ka Congress West Khasi Hills District bad kiwei kiwei.
Ka Kong Ampareen Lyngdoh ha ka jingkren, ka la ong ba ki nongïalam ka Congress khlem don kano kano ka ilekshon, ryngkat ki paidbah Rambrai ki klet noh ïa kata ka Christmas, ki khun ki kti kiba haïing hasem, da kaba ki wan ieng ha iew Rambrai, namar ka jingsngewkhia na ka bynta ka ri bad ka jaidbynriew. Ka la ong ba ki Congress kam banse ban wan sha ki paidbah ban pynshai ba kane ka aiñ kaba la tip kum ka CAA kam long kaba bha, hynrei ka dei ka jingiuhroit ïa ka ri bad khamtam ïa ka jaidbynriew rit paid.
“Lada ki nongïalam jong ngi ki kubur khlem pyrkhat khlem puson ïa kano kano ka jingjia ka ban sa wan, ka long ka jingpyni ka dak ka shin kaba khraw ban ong ba lehse ki duna ka jingkitkhlieh. Hynrei lah ban la teh la kam ïa ki da kata jingïadei politik kaba pynlong ïa ki ba kin mynthi ba kin matlah bad kyllut”, ong ka Kong Ampareen.
U Bah George Lyngdoh, MLA ka Umroi, u la ong ba ka seng Congress ka la dawa hapoh Assembly ha ka 19 tarik, ba na ka liang ka sorkar Jylla ka dei ban wanrah ïa kawei ka rai ban ong ïa ka sorkar Kmie ban weng noh mardor ïa kane ka aiñ ka ban sa ktah ïa ki rit paid tang hapoh san snem lane hapoh shiphew snem.
Hynrei ka sorkar Jylla kaba la lam khmat da ka NPP, HSPDP, UDP, PDF bad katto katne ki MLA shimet, ki la pyrshah ïa kata ka jingkyrpad jong ka Congress ba ki dei ban weng ïa kane ka aiñ bad baroh ki la kyrshan lut ïa kane ka aiñ bad don ryngkat bad ka BJP ban wanrah ïa kane ka aiñ, na kata ka daw ka Congress ka hap ban phai noh sha ki paidbah.
“Ngi hap ban phai sha ki dorbar shnong, ki longkmie, ki riew rangbah ki samla, ba ngin ieng tylli kum ki paidbah, ngi dei ban peitngor ba lada ngi shah ïa kane ka aiñ ba kan treikam, sa tang katno ki shnong ki jong ngi kin sa kylla lut ha baroh ki liang’, ong u Bah George.
U la kyntu da kaba ong ba kum ki paidbah ki dei ban ieng tylli, ym ban ïa pynjem ban pyrshah ha kaba ïadei bad katei ka aiñ, kata ym ban ïa bom ïa shoh lane ïaid da ki lynti ki bym dei. Hynrei da kaba jai jai bad da ka mynsiem kaba skhem ban ieng pyrshah ïa kane ka aiñ kaba kaei ba ka sorkar BJP bad ka sorkar jylla ka leh.