Press "Enter" to skip to content

Bei ka Sorkar Pdeng haduh T. 18 klur ban pyndait Solar Panel ha ki Ophis Sorkar

Shillong, K’lyngkot 13: Ka Sorkar National Democratic Alliance (NDA) kala bei tyngka ïa ka project ba kot T. 18 klur ïa ka Jylla Meghalaya ba kan pyndait noh da ki Solar Panel ha ki Ophis Sorkar, ba kin tan bording elektrik na ka bor jong ka sngi.
Ïa kane la pyntip da u Myntri Rangbah ka Jylla Conrad Kongkal Sangma haba ïakren bad ki lad pathai khubor hynne ka janmiet sngi nyngkong hadien ka jingïalang bishar kam (review meeting) bad ka MeECL halor ka jingkyrduh bording hapoh ka Jylla.
U Myntri Rangbah ka Jylla ula ïathuh ba kane ka project jong ka Sorkar Pdeng kaba dei jong ka Phase-I, kan treikam shuwa tang ha ki 121 tylli ki Ophis Sorkar kiba don ha kylleng ka Jylla ba kynthup ruh ïa ka jingpyndait Net Meter.
“Ïa ka tender la dep ban shim rai bad don ruh ki kam kiba la sdang pyntrei ha ki katto katne ki jaka” ong u Conrad haba pyntip ba kine ki 121 tylli ki Ophis kin kynthup ïa ka Secretariat, ka Chief Minister Bunglow bad kiwei kiwei ki Bunglow, ki Primary Health Centre, Community Health Centre bad ki Ophis kiba don ha ki jaka nongkyndong.
“Ka jingthmu jong kane ka project ka long eh ban ai bording sha ki jaka bym pat don bording bad kumjuh ruh ban pyn thikna ba ka bording kaba tam kan leit sha ka Power Grid na ka bynta kiwei ki jingdonkam” ong u Conrad.
Haba pyntip ba a CM Bunglow kala dep pyndait ïa ki solar panel bad kyrmen ruh ba kan long ka Ïing ne ka jingtei ba nyngkogn eh ha Jylla ban ym bam bording elektrik (Net Zero Energy), u Conrad ula ong “Lada baroh ki Ophis Sorkar kin kylla Net Zero Energy, nga tharai kan long kaei kaei ka ban iarap shisha ïa ka jingpyndonkam bording hapoh ka Jylla”.
U Myntri Rangbah ka Jylla ula buh ruh ïa ka jingkyntu ïa ki nongshongshnong ka Jylla ba kin shim lem ïa ka jingkitkhlieh ha ka ban tem ïa ka jingduna bording hapoh ka Jylla da kaba pyndonkam noh ïa ki LeD Light-kaba lah ban iarap kynshew haduh 70-80 % ka bording ba pynmih na Jylla.
“Ka long kaba donkam lada phi lah ban pyndait noh da ki solar panel ha ki Ïing jong phi. Pyrshang ruh ban nym pyn donkam ïa ka bording habym donkam ïa ka” ong u Conrad haba kyntu ruh ïa ki paidbah ba kin siew ïa ka baibording ha ka por kaba dei khnang ba kan iarap shibun ban pynbeit ïa ka jingtreikam jong ka MeECL.
Haba pyntip ba ka MeECL kala pyrshang ban wanrah ïa ka rukom treikam kaban pynjanai ïa ka jingtreikam jong ka, u Conrad ula ïathuh ba ka Tnad kala shim ïa ka rai ban pyndait noh da ki Smart Meter System hapoh ka Jylla ban biang ka thew ka woh ïa ka jingpyndonkam bording.
“Ngin sa khot tender ban pyndait haduh 1.8 lak tylli ki meter ka ban sdang shuwa na Shillong bad ha ki jaka khapsor jong ka Nongbah” ula ong bad bynrap “Ïa kane ka project la bei tyngka da ka Asian Development Bank (ADB)”.
Kat kum ka jingïathuh jong u, ki don haduh 4.57 lak tylli ki Longïing ha Jylla baroh kawei tang tang ha Shillong ki don haduh 1.03 lak. U ong ba ka ADB kan bei tyngka tang 1.8 lak hynrei ïa kiba sah yn pyntreikam da ka PPP Mode.