Press "Enter" to skip to content

Bitar ki paidbah nalor ka Load Shading dang lip bor ding bunsien

Bym siew ki karkhana bad ki tnad sorkar shah ñion ki paidbah?:

Shillong, Kyllalyngkot 13 : Ki paidbah nongshong shnong jongka jylla ki la dap da ka jingbitar kaba khraw ïa ka Meghalaya Energy Corpration Limited (MeECL) namar ym tang ba pynlip bor ding elektrik haduh 8 kynta ha ka shisngi hynrei wat hadien ba kut ki kynta load shading ruh, ka bor ding eletrik ka dang lip beit khah khah kata ym duna ïa ka lai haduh saw sien kaba neh ruh da ki palat shiteng kynta tam.
Ki paidbah ki la buh jingkylli balei ka MeECL ka dang pynlip bor ding hadien ka load shading namar lada don kino ki jingthut ka dei ban leit shna ha ka por ba don ka load shading ym ban dang pynlip shuh.
Nalor kane ki paidbah ki dap da ka jingbitar kaba khraw namar la sah kut lut ki kam ki jam jong ki da ka jingpynlip lynter kaba haduh 4 kynta kaba dei ki kynta kaba ki ophis ki bank ki dang treikam bha. Kiba bun ki paidbah ki la thut ka jingtreikam treijam namar ha kane ka juk ba mynta lada dei ha kano kano ka bynta ruh donkam beit ïa ka bor ding elektrik. Kumta ki dawa ba dei ban pynkylla ïa kane ka rukom pynlip bor ding. Kiba bun ki ong “ Ngim sngew ei ei lada pynlip ar kynta lynter ruh namar dang lah ban ïabeh ïa ka kam hynrei ban pynlip haduh 4 kynta lynter te ka la ktah jur palat haduh katta katta”.
Ki riew paidbah ki la buh ruh ka jingkylli hato kane ka jingkyrduh pisa jongka MeECL ban ym lah siew ïa ka ram jongka NEEPCO kat haduh mynta ka dei namar ka jingbym siew bai bor ding jong ki karkhana kiba don sha Byrnihat, ki karkhana dewbilat kiba don sha Jaintia Hills, nangta ki tnad sorkar bapher bapher bad kiwei kiwei ki heh sorkar? Namar ka jingbym siew ïa ka bai bor ding ka lah ban long da ki phew ne spah klur bad mynta pat ka MeECL ka nion pynban ïa ki paidbah.
Nalor kata kaba i phylla ka long ba kat kum ka notice ba la pynmih la pynbna ba ka jingpynlip bor ding kan long ha baroh kawei ka sor Shillong hynrei haba bishar ki dang don bun ki jaka kiba ym shym la lip bor ding elektrik.
Hato kane kam dei ka jingleh shilliang khmat jong ka MeECL ïa ki paidbah namar shiteng ki lip bor ding katba shiteng pat ki meh lut.