Press "Enter" to skip to content

ISSF : Knieh ka India ïa ka kyrdan ba nyngkong, tam ïa China bad US

New Delhi, K’Lyngkot : Hadien ka jingïalehkai baroh shisnem ha u 2019, ka kynhun ki nongsiat suloi bad pistol ka Indïa ka la ïoh ban knieh mynta ïa ka kyrdan kaba nyngkong eh ha ka lympung ha ka International Shooting Sport Federation (ISSF) da kaba knieh noh ïa ka kyrdan ba hakhmat na ki Ri ba pawnam ha ka Olympik, kata ïa ka China bad ka United States of America.
Lada kheiñ kyllum ha ka jingïoh khur takma, ka Indïa ka la ïoh haduh 21 tylli ki takma ksiar, hynriew tylli ki rupa bad lai tylli ki rnong. Nalorkata, ka Indïa ka ïoh ruh ban don ha khlieh duh jong ka Rifle-Pistol World Cups bad Final jong u snem.
Halor kane, na ka liang u President ka National Rifle Association of India (NRAI), u Raninder Singh lyngba ka tweeter halor katei ka jingjop ha katei ka jingphiah kyrdan jong ka International Shooting Sport Federation’s (ISSF) – 2019 u la ong, “Ka jingiaroh ïa ka Team India baroh kawei.”
Ka Indïa ka la ïoh ban lamkhmat da ki 30 tylli ki takma (21 tylli ki ksiar), bud sa ka China ha ka kyrdan ba ar da ki 44 tylli ki takma ba kynthup 11 tylli ki siar, 15 ki rupa bad 18 ki takma rnong. Ka USA pat ha ka kyrdan kaba lai ka ïoh 15 tylli ki takma kata 6 ki ksiar, 6 tylli ki rupa bad lai tylli ki takma rnong.
Ka jingïoh rung khambun ha ka Olympic kaba don mynta haduh 15 tylli ka la pyni ba ka Ri Indïa ka la nang kiew stet ha katei ka jingïalehkai ha kine ki shisnem mynta kaba long ka jingkyrmen ruh na ka bynta ka Tokyo Olympic. Lada phaidien khyndiat, ka sien kaba khatduh ba ki nongsiat ka Indïa ki paw ha ka Olympic kadei ha London ha u snem 2012 ha kaba ki ïoh ar tylli ki takma.