Press "Enter" to skip to content

Ki bnai khuslai jingmut ki kmie ki kpa

U bnai Kyllalyngkot bad u bnai Rymphang ki dei ki bnai kiba man ka longiing ka im tyrkhong bad tyngkai katba lah khnang ba kin lah ban pyndap pynbiang ia ka bai kot pule, bai kopi, bai pla bad kiwei kiwei ki bai aiu re ba kito ki skul ba ki khun ki leit ki ju dawa ba dei ban pynbiang ha ka por ba la buh.
Kumba ju long man la u snem bun tylli ki skul khamtam eh ki skul bym dei sorkar ki ju shim kabu bha ha ki por sdang skul bad bunsien ka paw ba katei kadei ka por kaba biang eh na ka bynta jong ki shisien shi snem. Ka jingkylla kaba khamjur ka sdang eh ha kine ki khyndiat snem ba bun tylli ki skul kim shah ia ki khynnah ban thied ia ki kot pule, ki kopi, ki pla skul bad wat ia ki jain phong skul ban thied na shabar. Hato kaei ka daw kaba don sha lyndet, lada kam dei ba ki kwah ban pynlong kam khaii hi ha ki skul jong ki?. Ym tang katta don ruh ki kmie ki kpa kiba la khnium halor ka jingshim kabu wat ia ka dor jong kitei ki kot bad ki tiar skul ba die hi ha kito ki skul khamtam haba ki lap ba ka dor ka la ia pher bun shah lada ia nujor bad kawei kaba die ha Iew.
Tang namar ka jingshim kabu palat jong ki nongpyniaid skul, takhuh sa ka pyrthei hiran la kulmar thlim ki kmie ki kpa ne ki nongbuh skul khun. Ka bai skul bad kiwei pat ki jinglut kum ha ka riam ka beit (Uniform skul), ki kot ki sla tang na ka bynta uwei ne kawei ka khynnah, ka pisa ka la kot sha ka saw haduh san hajar mar ia sdang plie skul. Kam kut noh tang hangne hynrei sa man u bnai ki mih ki jnit ki jnat ba shyrkhei haduh ba ka aiom leit skul ki khun ka la wanrah sa ka jingduh kyrmen ia ki kmie ki kpa la ki dang iai lah ne em ban kyrshan jingpule ia ki khun.
Kumba lah ban iohi mynta ba ka jingleit pule sha ki skul kam da idon jingmut shuh haba ki skul ki phah ban wanrah ia kine kitai kiba bunsien ki iing ki sem kiba duk kim lah ban ioh. Ki Uniform skul kiba rem dor sat, nalor kawei ka riam skul dang hap phah suh shuh shuh sa kiwei pat ki jait rong ban phong ha ki sngi ba pher bapher ba la buh da ki nongpyniaid skul, ki kot kiba rem dor, ki pla kot ruh ym long shuh ban rah da kito ki pla ba ju rah ha ki hynniew phra snem ba la leit hynrei da ki pla kot ba la phah suh bha, bad don lei lei ki skul ki ba la pynmih ia ka hukum ba ia ki pla ruh dei ban thied na skul hana bala dep ban thoh ia ka kyrteng skul.
Haba jia kumtei, hato kam ktah ia ki kmie ki kpa kiba wan na ki longiing kiba duk bad kiba don khun bun ngut. Hato katei kam dei ka kam kaba paw pyllein pyllein ban pynbor ia ki kmie ki kpa ban phah pep skul noh shiteng por ia ki khun. Ka sorkar jylla lyngba ka tnad pule puthi ka leh aiu, ne ka la shu hun ban tip ba kita ki skim SSA, RTE kin treikam ha ka jylla khlem da wad bad tohkit bniah la kitei kin iarap haduh katno eh ia ki paidbah.
Lada ngi shim ia kaei kaba ka long mynta ha Meghalaya khlem pat khein ia ki ba bun ki khynnah skul kiba la ieh noh tang shiteng ia ka jingpule (drop-out) la lap ba kam dei satia kaba khyndiat na ki khynnah khamtam ha ki nongkyndong kim don lad don lynti satia ban leit skul bad ban pynnang pynstad ia lade kumba long kiwei pat. Ka daw tynrai jong ka jingbym ioh lad kiba bun ki khynnah ban leit skul ne pynnang pynstad ia lade ka long namar ka jingduk jingkyrduh ha kaba ki Kmie ki Kpa jong ki ki la ia kynduh mawsiang ban pyndap ia ki jingdonkam jong ki khun ki kti wat tang ha ka liang ka bam ka dih bad ka kup ka sem.
Dei na kane ka daw bun ki khynnah khamtam ha ki nongkyndong ki la hap ban leit trei bylla noh wat la ka rta jong ki kam pat biang bad ia kane la ju tip kum ka‘Child Labour’. Ka jingkylli kaba mih mynta ka long, aiu ka Sorkar ka la leh na ka bynta ki ba bun ki khynnah ki bym ioh lad ban leit skul? Ha ka juh ka por ngin hap ruh ban kylli ia ki seng trei mon sngewbha (Non-Governmental Organizations) kiba ju peit ia ki jingeh hapoh ka imlang ka sahlang la ki ju pynsngew ne em ia kane sha ka Sorkar khnang ba man la uwei pa uwei u khynnah ne ka khynnah kin ioh ia la ka jong ka hok ban pynnang pynstad ia lade lyngba ka pule puthi.
Na ka bynta kito pat kiba lah ban kyrshan, ki kmie ki kpa ki ud ki nam ia ka jingleh jong ki nongpyniaid skul kiba ju buh dor katba ki mon khlem da pyrkhat shuh ia ka jinglut jingsep kaba palat liam tang na ka bynta u ne kawei ka khynnah. Kaba phylla shuh shuh lah ban shem ba ha ki sngi ba don prokram ba kham heh ha kum kine ki jait skul, ki kmie ki kpa ki hap ban leit thied bad phah suh kyrpang ia ki jain rem dor na ka bynta ba ki khun kin phong tang ha ka shi shisngi. Hadien kane la hap ban shu bret noh sharud ia kum kine ki jain ba suh kyrpang ha ka dor ba rem. La ka long kumne ruh bun ki kmie ki kpa ki sngap jar jar wat la ki ud ki nam haba rieh. Ha ka jingshisha, lada kum kine ki skul ki buh ia ki prokram, ki la dei ban bei hi nalade namar kaei kaba ki la dep am ha ka por sdang skul, ha ka jingshisha baroh ka pisa ka la kynthup ha kum kitei ki por ba Ka la dei imat ka por ba ki kmie ki kpa ryntih ha kawei ka kynhun ba kin mih noh shakhmat ban pynpaw ia kum kine ki kam lut phud jong ki skul. Haba phai dien biang ia ka jinglong jingman ha ka liang ka pule puthi jong kane ka juk, la i dei ruh ban kynthoh ba ki khynnah skul ki la bun kam ha kaba beh sha ka rong ka rup, bad ka jingpule ka la kham shajngai. Ki hap ban peit bha ia ki riam ki beit namar tang shu ran ruh la shah pynieng sha kyndong, ki juti ki hap ban phyrnai, ki pla kot ki dei ban long da kiba bha kumba la buh da ki skul lym kumta la ngat jingshah pynshitom na ki bor pyniaid skul.
Ki la hap ban pyllut ia ka por ha kaba leit sha ki tuition bad khelm da wad mawlynnai shuh da ka jingtrei shitom nalade. Kaba sngewsih eh ka dei ba ki don bun ki nonghikai ki shim tuition ia la ki jong ki khynnah skul bad kane hi ka pynpaw pyllein pyllein ba ki nonghikai ha skul ki la shu hikai tang dep rukom khnang ba tang kito kiba wan tuition ha ki kin iohban batai kham shai, lym kumta balei hap ban da phah leit phah khreh kot ia ki khun. Ki kmie ki kpa ki la dei ban husiar bha naduh ba sdang bad ym dei ban kmen ba pynhikai tuition ha ki nonghikai lajong. Ki bor pyniaid skul ruh ki dei ban teh lakam shi syndon ia kum kine ki nonghikai namar kine ki klet ia ka lawei ki khynnah tang ba ki kmie ki kpa ki la dep ban pynbiang pisa ia ki ha ka dor ba rem.