Press "Enter" to skip to content

Ki ju don ki jingiakren ba ki jingiakhih jong ngi kim ju poi shano shano –Balei sha?

Bah Ardent M Basaiawmoit:
Kaba kum kane ka jngkren ka ju kynrei bha bad ka i ruh kumba ka long ka jingshisha. Khyndiat kum ban shu pynkynmaw ba ki lah don shisha ki jingiakhih paidbah kiba jur bha naduh ki snem 1979 ter ter haduh u snem.2019 hadien ba ngi lah ioh ia la ka jong ka Jylla.
Kiba kham jur ki jingiakhih lehse ngi lah ban dang kynmaw ki long ha u snem 1979,1987,1992, 2013, 2014 bad 2019 nalor kiwei pat ki snem. Ka jingkylli kaba ngi lah ban kylli ia lade marwei shimet ka long, aiu ngi la ioh na kine ki jingiakhih? Ka jubab kaba shai ka long ba ym da don ka jingmih ka ban pynhun mynsiem ia u paidbah.
Kaei sha mo ka daw kaba pynlong kumne? Kaei kaba lah jia ha ka 19 tarik Nohprah 2019 ka pynkynmaw ia kaei kaba lah dep jia ha ka 2 tarik u Iaiong 1970. Lah iathuh ba ha ka 2 tarik u Iaiong 1970 uba bun u paidbah u lah mih ban leit sha madan Kirkit Laban ban pdiang ia ka Hill State lane ka Jylla ba pura hynrei na ka liang ka Indira Gandhi pat ka lah wan ban pynbna tang iaka autonomous State lane ka sub state ba lah ia tip lut baroh baroh. Katba kawei pat ka kynhun hapoh ka jingialam jong ka Seng HSPDP ki lah pynlong ia ka jingiarah lama iong pyrshah ia kane ha ryngkat ki jingpyrta ne slogan “No Hill State No Rest” Kanek jingleh ka lah pynkyndit bad pynlyngngoh ia ka Indira Gandhi.
Ha ka 19 tarik u Nohprah 2019 ruh kiba bun ki paidbah Ki lah iamih ban leit sha kita ki Rally namar hana ki ong ba lah ioh ia ka ILP ha kane ka Jylla jong ngi. Ha kane ka sngi pat lah mih ka jingiakhruh hapdeng ar ki kynhun kane ka long katkum ki khubor ba la mih ha ki kotkhibor.
Lada ym jin da la dei na ki lama iong ngin nym jin da lah ioh ia ka Jylla kaba pura ha ka 21 tarik u Kyllalyngkot 1972.
Ka jingkylli kaba mih ka long, balei u paidbah u mih ban pdiang ia ka Hill State haba ka Prime Minister ka wan ban pynbna tang ia ka Autonomous State bad kumjuh ruh, balei u paidbah u mih ban shadkmen ba lah ioh ia ka ILP haba ka Sorkar Jylla ka shim tang ia rai ban kyrpad ia ka Sorkar Kmie ba kan pyntreikam ia ka ILP hapoh ka Jylla Meghalaya. Hato ngin ong ba u paidbah u shah ialam bakla ha ki Nongialam ne ba u paidbah khasi jong ngi u shu sngewtynnad ban iakhih khlem ka jingsngewthuh kaba shai.
Na kaei kaba ngi lah ban sngewthuh ka long ba uba bun balang u mih sha ki jingiakhih da ka jingshongshit lane tang namar ba tieng eh. Kam da dei da ka jingsngewthuh kaba shai ia ki mat jingdawa lane ia ka phang ba ki iakhih. Dei namar kata ka daw ba kiba bun ki jingiakhih ki shu kut la ka kut noh kumto khlem da poi sha ka thong jong ka jingjop.
Ka jinghikai kaba ngi ioh na kine ki jingkynthoh ka long ba ngi dei ban long u paidbah uba stad uba shemphang bad uba tip, ym ban shu tur ruma kum ki masi ki blang. Ka long kumba ngi leit sha ka thma ha ryngkat ki jingkieng atiar kiba khlain. Ka donkam namar kata ka daw ia ki paidbah ban da sngewthuh shai ia ki jingthmu bad ki jingdawa jong kano kano ka jingiakhih.
Ngam artatien ba kiba bun ki paidbah kim da sngewthuh shai kumno kata ka ILP kan iarap ban iada ia ngi kum ki ritpaid bad lehse haduh katno pat kata ka CAA kan ktah ia ngi. Ka la dei ka por ba ki paidbah kin da sngewthuh shai bha ia ki jingma kiba ap ia ngi bad ia ki lad jingiada kiba ngi dei ban ioh. Lym kumta ka lawei ki longdien bad ki pateng ban wan kan long kaba dum.