Press "Enter" to skip to content

Kyrduh bording ka jylla ba kylla Policy na Delhi, kyrmen ban duna ot bording hapoh 10 sngi

Lum u CM ïa ka MeECL halor ka Load Shedding:

Shillong, K’lyngkot 13: U Myntri Rangbah ka Jylla Conrad Kongkal Sangma ula pyntip ba ka jingkyrduh bording jong ka Jylla ba lam sha ka jinghap pynlip bording, ka dei namar ka jingkylla ka Sorkar Pdeng ïa ka Policy ba ïadei bad ka Power Banking bad ka jingsniew jong ki artylli ki project-kawei ha Tripura bad kawei ha Kupli, Assam.
Une u Khliehduh ka Jylla ula pynpaw ïa ka jingkyrmen ba ka MeECL kan sa sa wad ïa ki lad ki lynti ban pynduna noh ïa ka jingpynlip bording ha Jylla bad khmih lynti ba lada ki kam ki jam ki ïaid beit kumba thmu, ka jingpynlip bording kan sa duna noh la kumno kumno hapdeng 7 sngi haduh 10 sngi duh.
U Myntri Rangbah ka Jylla ula pyntip ïa kane sha ki lad pathai khubor hynne ka sngi nyngkong, hadien ka jingïalang bishar kam (review meeting) bad ka MeECL hynne ka janmiet ha Lum Jingshai.
Kat kum ka jingong u Conrad, ka jingkyrduh bording jong ka Jylla ha kane ka kynti kaba lam sha ka jinghap pynlip bor ding, kam dei satia kaba la ju jia teng ha ki snem bala leit hynrei ka dei namar ki daw kiba ka Sorkar Jylla kam lah satia ban leh eiei.
Haba pynpaw ba ka jingpynlip bording mynta ka kynti kam dei satia namar ka jingsahram ha ka NEEPCO, u Myntri Rangbah ula ong “ Ka MeECL ka la siew haduh T. 65 lak shisngi sha ka NEEPCO naduh u bnai Nailar 2019-kaba la kot mynta sha ka T. 100 klur ha kine ki saw bnai bad ka dang pyrshang ban wad ïa ki lad ki lynti ban pynthikna ba ka jingsiew kan long beit manla u bnai”.
“Wat ha ka mang tyngka jong u snem baal lah, ngi la siew haduh T. 170 klur sha ka NEEPCO. Namar kane, mynshem snem kam shym la mih satia kano kano ka jingïapher jingmut bad ka NEEPCO ne kiwei kiwei ki kompani khaii bording” ula ong.
U Myntri Rangbah u ong ba ka jingkyrduh bording jong ka Jylla mynta u snem ka dei tang namar ka jingthut treikam ki artylli ki project jong ki Agency ba ju ai bording ïa ka Jylla. U ïathuh ba kawei ka dei ka Palangkata Power Project ha Tripura kaba ju ai bording haduh 30 MW bad ka Kupli Power Project kaba ai haduh 20 MW ïaka Jylla.
Haba pyntip ba kawei pat ka daw ka dei namar ka jingpynkylla ka Sorkar Pdeng ïa ka Policy ba ïadei bad ka Power Banking, u Conrad ula ong“Mynshuwa, ka Power Banking ka ju treikam ha kaba ka Sorkar Jylla ka ju ai bording sha ki Power Agency ha ka por lyiur ba dang pahuh bording bad ïa kane ka bording ka ju shim pat ha ka por rkhiang ka bneng. Hynrei ka Sorkar India kala pynkylla ïa ka kyndon ha kaba la buh ïa ki kyndon ba ki Power Agency ki dei ban siew beit noh da ka pisa haba shim bording ym shuh ban buh da ka Power Banking”.
“Kane kala ktah jur ïa ngi ha kane ka khep ba mynta namar ka jingpynbna (Notification) jong ka Sorkar India ka dang shu mih mynta dang khyndiat bnai katba ngi pat nangne ngi la dep ai ïa ka bording sha ka Power Banking jong ki Agency naduh u bnai Jylliew, Naitung ba dang jur u slap” ong u Conrad.
Kat kum ka jingong jong u, naduh ba pynmih ïa kane ka jingpynbna, kine ki Agency kim shym la lah shuh ban pynphai ïa ka bording ba ki shim na ka Jylla lyngba ka Power Banking ba ju don baroh shikatta, kaba lah ban iarap shibun bah ïa ka Jylla ban tehlakam ïa ka jingduna bording.
“Ban pynsted ïa ka kam ha kaban ïohbiang ïa ka bording bala ai da ka Jylla, ngi donkam mynta ban plie ïa ka Letter of Credit (LC) bad kine ki Agency. Ka kam kala ïaid shaid shaid mynta khnang ba ngin lah ban ïohpat ïa ka bording ba ngi la ai sha kine ki Agency” ong u Conrad.
Haba pyntip ba ka jingïalang hynne ka sngi kala iatai ïa ki lad ki lynti ban tem ïa ka jingduna bording, u Conrad ula ong “Ki dang don ki briew kiba nga hap ban ïakren ban ïoh ïa ka jingshai shuh shuh bad lada ki kam ki seisoh hapoh ka 24 kynta, ngin sa ïohi ïa ka jingduna ka jingpynlip bording hapdeng ka 7-10 sngi duh”.
“Hynrei lada ngi ïoh sa ki jingkular, kane ka jingpynduna pynlip bording ka lah ban sdang treikam noh naduh lashai ka sngi hi namar ngi lah ban pynmih shuwa nalade ïa ka bording mynta shipor lyngba kka Umiam Hydel Project naba ngi tip ba ngin sa ïoh ïa ka bording hapoh ka 10 sngi” ong u Conrad.
Halor ka jingsah ram ha ka NEEPCO, u Myntri Rangbah ka Jylla ula ong ba ka MeECL kala shim ïa bun ki sienjam ban pynkhuid ïa ki ram jong ka NEEPCO haba pyntip ba ka ram kaba sah mynta ha kane ka Tnad pynmih bording ka Sorkar Pdeng ka long T.622 klur.
“Ka jingsah ram ha ka NEEPCO kala ïaid mynta la 5-6 snem bad ka dang kiew na u snem sha u snem hynrei mynta ngi lah pyrshang ban wad ïa ki lad ki lynti kumno ban pynkhuid noh ïa kane ka ram” ong u Conrad.
U Conrad u pyntip ba ha u snem 2012-2013, ka jingsahram jong ka MeECL ha ka NEEPCO kala kot ïa T. 243 klur hynrei ha u snem 2013-2014 kala kiew sha ka T. 355 klur, 2014-2015 kala kiew T.400 klur, bad 2015-2016 kala kiew T. 500 klur.
U pyntip ba ha u snem 2016-2017 haba ka NEEPCO kala ot ïa ka bording, ka MEECL kala siew haduh T. 360 klur bad pynduna ïa ka ram sha ka T. 283 klur. Hynrei ha u snem 2017-2018 kala kiew biang sha ka T. 470 klur, 2018-2019 kiew sha ka T.625 klur. U ïathuh ba mynta u snem 2019-2020, ka ram kaba sah ka long satang T. 622 klur hadien bala dep ban siew haduh T. 174 klur ha kane ka mang tyngka jong une u snem.