Press "Enter" to skip to content

Lynñiar ki Home Guard ba pynïaid kali bym ïoh tulop la palat 7 bnai lynter

Shillong, Kyllalyngkot 13 : Ki Home Guard ba pynïaid kali ha kane ka nongbah Shillong bad sha kiwei kiwei ki nongbah jong ki district ruh ki la ud bad lyniar namar ba ki khlem ïoh tulop mynta la palat hynniew bnai lynter.
Kine ki home guard ki la ïathuh ha ki por ba mynshwa ki ju ïoh biang por bha ïa ka tulop jongki hynrei ym tip na kaei ka daw shu kynsan kynsan mynta khlem siew shuh ïa ka tulop jongki da ki bun bun bnai lynter.
Haba ïakren bad u nongthoh khubor ki home guard ki bym kwah ban pynpaw kyrteng ki la ïathuh “ Kane ka jingbym ïoh tulop da ki bnai lynter ka la ktah jur ïa ngi haduh katta katta ha kaba ngim nang shuh ban pynïaid bad bsa ïa ka ïing ka sem jong ngi . Namar mynta lei lei ba la jan sdang ban long skul ym tip shuh kumno yn ïoh wat ban siew ïa ka bai skul ruh”
Ki la ong shuh shuh “ Ha kine ki bnai ban wan lei lei la long sa ki skul ym tip shuh naei yn ïoh pisa ban siew bai skul, ban siew bai kot bai sla bad bai uniform na ka bynta ki khun ki kti jong ngi”.
Ka long kaei kaei kaba sngew sangsot da shisha ïa ki namar ki la pynpaw ba ha kine ki bnai Khristmas bad Snem Thymmai kiba pli kim shym la ïoh ban lehkmen kumba long kiwei ki nongtrei sorkar na ka daw kane ka jingbym ïoh tulop jongki.
Ym lah ban len ka jingpyndonkam ïa ki home guard ban ïarap ïa ki pulit ban pynïaid ka la ïarap da shisha namar ban tang ki pulit kim lah ba ki duna bad kim lah ban peit bad pynïaid ïa ki kali ha kylleng ki bynta jong ka nongbah Shillong khamtam ha ki bynta kiba jur ka jingkhapngiah kali bha. Hynrei kane ka jingbym ïoh tulop ka la pynduh mynsiem bha ïa ki bad ki la kyntu namar kata ïa ki bor ba dei peit ba kin pyllait noh ïa ka tulop jongki khnang ba kin lah ban pyndap ïa ki jingdonkam baroh.