Press "Enter" to skip to content

Mynsaw jur u samla ba shah kyrdem ha u hati sawkuna

Shillong, Kyllalyngkot 13 : Uwei u samla uba dang 28 snem ka rta na ka shnong Depa Garat kaba hap hapoh ka Dainadubi Out Post , North Garo Hills u la shitom jur bha namar u la shah kyrdem ha u hati.
Kane ka jingshah kyrdem hati ka dei ka sien kaba saw ban jia ha katei ka thaiñ tang hapoh shi bnai bad na ka jingwan tur ki hati sha katei ka thaiñ ki paidbah ki la im ha ka jingsyier bad rit mynsiem.
La ïathuh ba kane ka jingjia ka jia ha ka por 8.30 ha ka miet Sngi U Blei namar une uba shah kyrdem lem bad kiwei ki la pyrshang ban beh thong ïa ki hati ban phet shakhlaw ym ban wan sha poh shnong namar ki sheptieng ïoh ki wan pynjulor ïa ki ïing ki sem bad ki jingthung jingtep jongki ha katei ka shnong. Hynrei une u Pangsrang G Momin u la shah kthong kylla ha ki hati bad namar ba u la tur palat shajan jongki kumta ki la ïoh ban thombor ïa u.
Hadien kane la pynkit ïa u mar mar sha ka PHC ha Wageasi bad nangbe pat la kit beit ïa u sha ka hospital ha Goalpara bad na katei ka hospital la phah ban kit beit ïa u sha GNC hospital kaba ha Guwahati.
Kaba nyngkong ka jingjia ba wan thombor ki hati ka dei ha ka shnong Khardang kaba hap hapoh ka Kharkutta Police Sation ha kaba ym tang ba ki hati ki la pynjulor ïa ki ïing ki sem , ki jingthung jingtep hynrei ki la kyrdem iap ruh ïa uwei u rangbah briew ba 57 snem ka rta.
Halor kane ka jingwan thombor ki hati khlaw, na ka liang ki bor synshar district ki la pyntip sha ka tnad Wildlife bad na katei ka tnad kan sa phah ïa ki briew ban ym ailad ïa ki hati ban pynjulor ïa ki jingthung jingtep ne ki ïing ki sem jong ki briew khamtam ban dkhat ïa ki mynsiem briew.