Press "Enter" to skip to content

Naduh ba ïa khih paidbah ban pyrshah ïa ka CAA, sdang duna ki nongwan jngohkai pyrthei: Society

Dang donkam ban dang pynbha briew ïa ka Marngar Lake:

Nongpoh, K’lyngkot 13: Ka Marngar Lake lane ka Pung Marngar kaba don ha Ri Bhoi District ka dei kawei na ka jaka jngohkai pyrthei kaba la khring bha ïa ki nongjngohkai pyrthei ha ki snem ba la leit noh, hynrei kumba la pynpaw da ka Society ba pynïaid ïa katei ka jaka jngohkai pyrthei la pyntip ba dang donkam shibun ki kam ban dang pynbha briew ïa katei ka jaka jngohkai pyrthei khnang ban dang khring shuh shuh ïa ki nongjngohkai pyrthei na ka jylla bad wat na shabar ka jylla.
Ha ba pyrshang ban buddien da u Nongthoh khubor halor ka jingdon katei ka Pung Marngar kum kawei na ka jaka jngohkai pyrthei ha ka jylla ka la ai jingmyntoi neem sha ki paidbah bad khtam tam sha ka Society kaba pynïaid ïa katei ka Pung Marngar, ka jubab ba la ïoh pdiang da u Nongthoh khubor la ong ba ka jingdon katei ka jaka jngohkai pythei ka la ai jingmyntoi ha ka liang ka ïoh kam ïoh jam ym tang ïa ka kynhun ka Society bad wat ïa ki paidbah nongshong shnong ka thaiñ Marngar ha Ri Bhoi District.
Kum ban pynkynmaw, katei ka pung Marngar ka dei kaba la shim khia da ka sorkar jylla lyngba ka tnad Tourism ha ka jylla ban ai shibun ki project ban pynbha briew na ka bynta ban dang khring ïa ki nongjngohkai pyrthei bad kumba long haduh mynta ka sorkar hadien ki jingïap ban pynbit pynbiang kum kawei na ka jaka jngohkai pyrthei ka la aiti sha kawei a Society ba la tip kum ka Marngar Eco Tourism Cultural and Development Society (METCDS) ban peit ban khmih ïa katei ka jaka jngohkai pyrthei kaba don ha Marngar ha ka thaiñ Ri Bhoi.
Ban tip kham bha halor ka jinglong jingman kane ka pung Marngar kum kawei na ka jaka jngohkai pyrthei, u Nongthoh khubor u Mawphor u la ïoh ruh ban ïa kren bad u President ka Marngar Eco Tourism Cultural and Development Society (METCDS) ban wad jingtip la ka jingdon katei ka Pung Marngar kum ka jaka jngohkai pyrthei ka la ai jingmyntoi neem sha ki paidbah.
Na ka liang u Bah Primosh Lyngdoh kum u President ka Society,u la ïathuh ba ka jingdon katei ka Pung Marngar kum ka jaka jngohkai pyrthei ka la ai jingmyntoi shibun eh ïa ka Society bad ruh wat ïa ki paidbah ka thaiñ Marngar ha Ri Bhoi District, namar naduh ba la pynlong ïa katei ka Pung kum ka jaka jngohkai pyrthei ka la ïarap shibun ha ka liang ka kamai ka kajih bad ruh ban ai kam ai jam ïa ki paidbah ka thaiñ.
U la ïathuh ruh ha ki snem la leit noh ka jingtuid ki nongjngohkai pyrtei ka la sdang ban kiew bha bad ka la ai jingmyntoi ruh shi katdei eh ïa ka Society bad ki paidbah bad ym lah pat ban tip ïa ka daw tynrai naduh ba la pyntreikam ka Assam ïa ka NRC bad ruh ba ka don ka jingïakhih ban pyrshah ïa ka Citizenship Amendment Bill ka jingwan ki nongjngohkai pyrthei ka la kham duna sha katei ka Marngar Lake ba la pynïaid da ka Society.
U la ong ruh kumba long haduh mynta ban dang khring shuh shuh ïa ki nongjngohkai pyrthei katei ka Pung Marngar ka dang donkam shibun ban dang pynbha briew shuh shuh bad lada ka sorkar ka dang lah ban theh ki jingïarap kane kan dang kyntiew shuh shuh ïa ka jingwan tuid ki nongjngohkai pyrthei, u la ong.
“Kumba long haduh mynta ki jingdonkam ba hakhmat eh ban dang pynbha briew shuh shuh ïa katei ka pung ha Marngar kum ka jaka jngohkai pyrthei ka dei ka jingdonkam ban pyndep noh ha kaba ker kynroh ha baroh sawdong jong ka pung, ka jingdonkam ban dang shna shuh shuh ïa ki ingtrep (Traditioal Hut), ka jingdonkam ban buh sa ka Children Park bad kynthup kiwei kiwei ki jingduna ba hap ban pynbit pynbiang shuh shuh kum kawei na ka jaka jngohkai pyrthei ha ka District” ong u Bah Lyngdoh.
Ka Society ka pynpaw ruh ka jingkmen sha ka sorkar kaba la ïohi jngai bad kaba angnud ban kyntiew ïa ka ïoh ka kot bad ka kamai kajih ki paidbah da kaba pynlong kum kawei ka jaka jngohkai pyrthei bad naduh ba kane ka pung Marngar ka la kylla long ka jaka jngohkai pyrthei ka la ai jingmyntoi shibun eh ïa ka Society bad wat ïa ki paidbah ka thaiñ.
“ Naduh ki dukan jong ki paidbah ruh haba wan ki nongjngohkai pyrthei ki la ïaid bha bad ki lah ban die naduh ki mar bam bad kumjuh ruh ki mar rep bad kane hi ka pynpaw ba ka kam jngohkai pyrthei ka dei kawei na ka kam kaba ai kam ai jam bad kyntiew ïa ka ïoh ka kot jong ki paidbah” u la ong bad bynrap ruh ka Society ka sngewkhia ruh khyndiat halor ka jinglong jingman ka surok na Nongpoh sha Marngar namar ka jingsniew ka surok ruh ka ktah ïa ki nongjngoh kai pyrthei, “ u la bynrap.
Shuh shuh, kum ka Society ka khmih lynti ba ka sorkar kan dang thaw shuh shuh ki lad ki lynti ban dang pynbit pynbiang ïa ki jingdonkam ban dang pynbha briew ïa katei ka Pung ha Marngar, namar haba kiew ki nongjngohkai pyrthei ka jingmyntoi ka dei hi ym tang ïa ka Society bad ka sorkar ba kan ai kam ai jam ruh wat ïa ki paidbah ka thaiñ Marngar bad ka them Ri Bhoi hi baroh kawei, u la bynrap.