Press "Enter" to skip to content

Shongkun ka jingrakhe ïa ka 13th Annual Diocesan Youth Convention ha Nongstoiñ

‘Bud ïa ka jingshai ka Gospel’, kyntu u Rev. Nonglang ïa ki samla Katholik:

Nongstoiñ, K’lyngkot 13: Ka 13th Annual Diocesan Youth Convention lyngba ka Nongstoiñ Diocese Catholic Youth Movement, ka la pynlong ïa ka jingïaseng bah lyngba ki prokram bapher bapher ïa kaba la sdang ruh ïa katei ka jingïalang naduh ka 10 tarik mynta u bnai bad ka la pynkut noh ha ka 12 tarik sngi U Blei.
Ha katei ka jingïalang pynkut ïa ka sngi kyrpang ki samla, ïa kaba la pynlong ha Divine Savior Nonbah Parish Nongstoiñ West Khasi Hills District, la wan ban ïashimbynta lang da ki para bangeit jong ka Balang Katholik na kylleng jong ka Ri Khasi kiba kynthup na ki Parish bapher bapher.
Ha ka por kaba 9:30 mynstep la sdang ïa ka Ïukharis Bakhuid da ka jingïalam jingrwai na ki Choir bad la ïoh ban pule ïa ka ktien jong U Blei da u Phadar John Albert Ryntathiang Diocesan Youth Director Nongstoiñ Diocese. La ïoh ïa ka jingkren da u Rev Anselm Nonglang Diocesan Administrator Nongstoiñ Diocese, ha ka juh ka por kum u Vicar General bad u la ïoh ruh ban pyndep ïa ka jingkñia ïa ka Mass Bakhuid.
U Rev haba ai jingkren u la ong “Kum ki nongsharai ne kino kino kiba la kham san, lada ki kwah ban sngewthuh ïa ki jingeh ne jingdonkam jong ki samla, ka dei ïa kita ba kin ïakynduhlang bad da kaba ïadonlang hangta ngin sa lah ban sngewthuh”.
U la ong ruh, “Ngi donkam ïa ki samla ba ngin pynrung ha ki kam jong ka Balang. Ka jingmut ka long ban pynkhie biang ïa ka Balang lyngba ki sur jingrwai kaba long Charismatic, ba ngin pynkhie samla biang pa biang ïa ka Balang da ki kam shitrhem jong ngi”.
“U Trai Jisu Khrist u wanrah ïa ka jinglong samla ha ka pyrthei, ka Gospel ka pyni ïa ka jinglong samla jong u Jisu 30 snem ka karta ha ka jingim jong u, u pyni kumno u long u ba kohnguh ïa ki kmie ki kpa bad um ju jngai na u Kpa u ba ha Bneng bad u ju sngap bha ïa ka jingkren jong u Mynsiem Bakhuid”.
“Hynrei haba phai sha ka jinglong jong ki khun samla jong ngi hangne mynta ka la long shisha ka bym itynnad shuh. Teng teng ka la long shaba palat pud haduh ba la long ka jingwanrah ïa ka jinglehraiñ ka jingbudnam lyngba ki khun samla ha kane ka juk ka jong ngi”.
“Ki ïabeh ïa ka spah ka jingsngewbha ka pyrthei, ha kaba lada ym ïohlad shuh ban ïoh ïa kiei kiei kiba ki kwah, la sdang sa ka ban thok ban shukor ka jingïadei bad ka jingïalong paralok kaba shisha ka la duh noh, la blad ruh ban shakri ïa u Blei”.
“Ka jingshah rong ha ki umbah umsaw lyngba ki media ïa ki jingtip na ba ym nang bha ban pyndonkam ïa ki. La shah pynjot ei ha ki Internet, ki Cinema ki Television ha ki Mobile phone bad shisien ba la shah ngop ha kum kine ki jait, la sdang ban duhnoh syndon ïa ki jingsmat ki jingsting ban khreh kot ban leit skul”.
“La sdang ban tlor ha ki jingmut ki jingpyrkhat bad kylla thala ka lam sha ka hap samla hap kurim ïoh khun ei. Ki tip bha ïa kum kine kiei kiei ki long pyrshah ïa ki hukum ki jong u Blei bad ïa ka Balang ruh kumjuh. Hynrei la thom ïa ki da ka sang ka ma bad ki ong ym lei lei, namar baroh khoit ngi ïaleh kumjuh”.
“Ka shongkha shongman ka dei kaba la buh da u Blei Nongbuh Nongthaw hi ban longÏing longsem ban long kur long jait. Hynrei lada phi mut hok phin ïoh ïa ka jingkyrshan bad phin ïoh ruh ïa ki jingkyrkhu, hynrei lada phi kynriang phin ngat ha ki jingeh”, u la ong.
“Phi long ka mluh bad phi dei ban don ïa ka ding, to pynmeh ïa ka ban klang da kaba sdang ruh naduh na ki ïing ki sem la jong phi nyngkong eh. To da kynmaw ban kiar na ki jingpyrthuh ïa kiei kiei ki bym ïahap. To phin nang ban leh naduh ka dohnud tang ïa kiei kiei kiba myntoi bad kiba bha ym ban shu pyrthuh bud ïa kiwei”.