Press "Enter" to skip to content

Bthah ka sorkar Jylla ïa ki paidbah ban maramot hi ïa ka surok Athiabari – Umshiak

Ai daw ba hap ban ïa pynbeit shwa bad ka sorkar Assam:

Nongstoiñ, K’lyngkot 14: Tad haduh ban da ïa pynbeit shwa bad ka sorkar Assam, na ka liang ki bor sorkar jong ka Jylla Meghalaya, ki la bthah ïa ki paidbah jong ka thaiñ Athiabari ban nang maramot hi ïa ka surok na Athiabari sha Umshiak.
U Bah Chenang Marak uwei na ki nongïalam paidbah na katei ka thaiñ haba ïakren bad u nongthoh khubor mynta ka sngi lyngba ka phone, u la ïathuh ba ha ka jingleit ïakynduh jong ki ïa ki heh sorkar jong ka Jylla ha Shillong, ki la kular ba shen yn sa sdang ban pyntrei biang ïa katei ka surok.
U la ïathuh, “Ka sorkar ka la kular ba shuwa ban sdang pyntrei biang ïa katei ka surok, kan phah maramot shuwa khnang ba ka leit ka wan kan ym sah kut bad ïa ka jingmaramot yn phah pyntrei hi da ki paidbah nongshong shong katei ka thaiñ”.
U la ong ruh, “Ka jingphah maramot shuwa da ki paidbah nongshong shnong, ka dei namar na ka liang ka sorkar Meghalaya kam shym pat lah satia ban ïa pynbeit bad ka sorkar Assam. Kumta hap ban ap bad ïaishah haduh ba ki arliang mamla kin da ïoh ban ïakren pynbeit”.
Kum ban pynkynmaw ba ha u snem ba la dep, katba ka jingpyntrei ïa kane ka surok PMGSY kaba tang 6.2 kilometer ka la ïaid shait shait, ka sorkar Assam ka la phah ïa ki briew jong ka ban leit pynsangeh jubor bad pyntieng pynsmiej ïa ki nongtrei jong ka surok bad ki la kem bad rahbor ruh ïa u nongñiah jong kawei ka trok dumper.
U bah Chenang Marak u la ong ba naduh katei hi ka por haduh mynta ym pat lah satia ban pyndep ïa kane ka surok. U la ong ruh ba hadien ba ka sorkar Assam ka la phah pynsangeh ban trei ïa katei ka surok, na ka liang ka synjuk ki Nongsynshar shnong katei ka thaiñ ki la leit ban ïakynduh ïa u James K Sangma Myntri kam pohïing ka jylla.
Hynrei na ka daw jong ka jingbym ïakynduh ïa u, ki la buh da ka jingthoh bad ha ka jingïai buddien bad ïai tynruh jong ki, ba ka sorkar ka la pynpaw ïa kata ka jingkloi ban shimkhia bad kular ba yn sa pyntrei noh ïa katei ka surok.
Kiwei pat ki riew rangbah ki la ong ba ha ka jingshisha, ka sorkar jylla ka la dei ban pyntip mar mar sha ka sorkar pdeng lyngba ka tnad kaba peit ïa ki skhim PMGSY, khnang ba kan bthah ïa ka sorkar Assam ba kam dei ban pynwit, namar baroh ki nongshong shnong hapoh ka ri bad ki shnong ki thaw ki don hok ban ïoh surok la ki dei na kano kano ka jylla ruh.
Na ka liang kitei ki riew rangbah bad ki paidbah nongshong shnong, ki la kyntu ïa ka sorkar jylla ba kan ïa kren pynbeit noh kloi bad ka sorkar Assam, khnang ba ki paidbah kin ym sah ha ka lyngngoh.