Press "Enter" to skip to content

Buh thong u Myntri PHE ban pyndep ïa ka GSWSS-Phase III mynta u snem 2020

Shillong, Kyllalyngkot 14: Ka Third Phase jong ka Greater Shillong Water Supply Scheme (GSWSS III), kaba dei ka jingkhmih lynti ba ha khmat eh ban pyndap ïa ka jingdonkam um bam um dih ki nongshong shnong ka nongbah Shillong, yn sa lah ban pyndep noh ha ki katto katne bnai ban wan bad hapoh mynta u snem kumba la pyntip da u Myntri Sorkar Jylla ba dei peit ïa ka tnad Public Health Engineering (PHE), u Bah Samlin Malngiang.
U Bah Samlin Malngiang u la ong ba jingpynpoi ïa ki pipe um (main distribution pipelines) na Mawphlang sha 6 Mer, Upper Shillong ka la long kaba jop .”Ngi la don ka jingïalang ïa mir jingmut ar sien bad u Symbud Myntri Rangbah ka Sorkar Jylla ba dei peit ruh ïa ka tnad Public Work Department (PWD) (Roads) ryngkat ki ophisar ban ïa kren ba ka kam ba dang sah ban pynpoi ïa ki pipe um ha shi lynter ka rud surok kan nym don jingthut bad yn lah ban pyndep kloi noh katba lah”, u la ong.
U la ong ba ka tnad PHE kan ïa treilang bad ka tnad PWD na ka bynta ban pynurlong kloi ïa kane ka projek. “Ka um ka la poi haduh ka jaka pynlang um ha 6 Mer bad ïa ka kam kaba sah na ka liang jong nga kum u
myntri ngan shim khia ba kane ka projek yn lah ban pyndep noh mynta u snem”, u la ïathuh. Kum ban shu kdew ba ïa kane ka projek la mynjur da ka Sorkar India ha ka mang tyngka kaba long 193.50 klur ha u Risaw 2008 bad la buh ban pyndep ha u bnai Jymmang jong u snem 2011.
Ka jingthmu jong kane ka projek ka long ban pynpoi um bam shuh shuh sha ki jaka kiba ka jingdon briew la kynthup lang Shillong Urban Agglomeration na u snem 2011 shaduh u 2014. Ha kaba ïa dei bad ka jingïatyngkhuh ka jingthmu pynïaid pipe um na ki jaka shipai bad Cantonment, u la ong, “Kane hi ka sah ha ka jingïakren na ka liang u Myntri Rangbah ba un khot ïa ki namar ka dei ka jingdonkam ki paidbah bad ha kine ki sngi yn sa khot ïa ki bad u Myntri Rangbah u la mynjur ïa kane”.
Halor ka jingkew ka jingjngut ka um ha Dam Mawphlang, u Myntri u la ong ba u ïoh ïa kane bad ka daw hi ka jingjngut ka um ka dei ka jingtih shyiap jingtih maw. “Hynrei ngim lah lait ïa kata bad na ka liang ka tnad ba dei peit ka khmih bniah bad wad ki lynti ban pynkhuid ïa ka um da ki buit jingstad ha ka Treatment Plant kaba don ha Mawphlang. Ngi kwah ba ki paidbah kin pyndonkam ïa ka um kaba khuid ba suba bad ngi shim khia ïa kane”.
“Nga kum u Myntri Sorkar nga buh thong ba dei ban pyndep kloi katba lah namar ki riewrangbah, ki nongmih khmat na ki ki dong ka nongbah Shillong ki wan borabor ban ïa kren ïa ka jingkyrduh um”, u la ong. Haba kylli ba ki don shibun ki jinglait ei ka um ha ki jaka bapher bapher, u Myntri u la kubur ïa kane bad ong, “Kane ka long kaba shisha bad nga ju ïoh bunsien ba ki jaka pynlang um shwa ban sam pat ïa ka um sha ki ing briew ne ki kor um ki shlei kai”.
“Hynrei mynta ngi la shim ïa ki sien jam ban sdang ïa kine ki Meter System bad ngin sdang shwa na ka bynta ha Jail Road bad ngi khot tender ïa kane bad ngin peit kumno ka long bad ynda la ithuh ba ka ïarap bha ngin nang ïaid sha khmat ban pyntreikam”, u la ïathuh.