Press "Enter" to skip to content

Da ki hajar mih ki riewngeit Hindu ban pyrshah tei Motdur Jisu ha Karnataka

Bangalore: Da ki hajar ngut ki riewngeit Hindu ki la mih ban pyrshah ïa ka jingtei ïa u motdur (statue) jong U Jisu ha ka Shnong Harobele, kaba don ha jylla Karnataka. Kine ki riewngeit ka niam Hindu, ba la kyrshan da ka Seng RSS, BJP bad kiwei kiwei ki Seng shit niam Hindu, ki la pynlong ïa ka rally kaba heh bha ban pyrshah ïa kane ka jingtei, ba la ïarap pisa da u MLA ka Seng Congress, u D K Shivakumar, uba la buh ïa u mawnongrim ha ka sngi Khristmas jong u snem baladep. Ïa une u motdur jong U Jisu la thmu ban
tei ha ka jingjrong kaba 114 phut.
“Ki paidbah kim kwah ban ïohi ïa u dur mot jong U Jisu, hynrei ki kwah ban ïohi ïa u dur mot jong ki nongïalam niam(Swamai) kiba la noh synñiang sha kane ka thaiñ bad sha ka ri baroh kawei”, la ong u nongïalam ka RSS na Karnataka, Kalladka Prabhakar Bhat, haba kren ha kane ka rally.
U nongaiktien ka BJP, u Ashwath Narayan Gowda, u la ong ba ka Seng jong u ka kyrshan ïa kane ka rally, namar kadei ka jingthmu ban pynkylla niam jubor. Ka Seng BJP ka la kynnoh ruh ba kane ka jaka ba tei ïa u motdur jong U Jisu kaba heh 10 akar, kadei kaba la buh ban pynlong kum ka jaka bam phlang ki mrad bad u MLA ka Congress u la shu kam jubor ïa kane ka jaka.
Hynrei u Shivakumar, u la ong ba ka rai ban tei ïa une u motdur kam dei ka rai jong u, hynrei kadei ka rai jong ki Khristan na kane ka Shnong bad kum u nongmihkhmat kane ka thaiñ kadei kamram jong u ban ïarap ïa ki. “Ka jaka bad ki kot ki sla ba la ai sha ka Trust ban tei ïa une u motdur ki long kiba shongaiñ ba la ai da ka sorkar jylla”, la ong u MLA ka Seng Congress.
Haba kynthoh halor kane ka jingpyrshah ki riewngeit Hindu bad ka Seng BJP, ki nongïalam ka Seng Congress na Karnataka, ki la ong ba kane ka pynpaw ïa ka jinglong arsap ka BJP, namar ha kawei ka liang ki thaw ïa ka aiñ CAA ban pdiang ïa ki Khristan na Bangladesh, Pakistan bad Afghanistan, hynrei ha ri la jong pat ki ñion beiñ ïa ki Khristan.
U MLA ka Congress u la ïathuh ruh ba ha ka por ba u long u Myntri ka tnad Kolshor, u la mynjur ïa ka jingmang tyngka ba 25 klur tyngka na ka bynta ban tei ïa u motdur jong u Balagangadharanatha Swamiji bad kumjuh ruh la mang pisa na ka bynta u Shivakumara Swamiji kaba dei ha ki jaka bam phlang ki mrad. “La leh ïa kane na ka bynta ban wanrah ïa ka jingïalong tylli bad ka jingïaieit hapdeng ki niam bapher bapher ha kane ka jaka”, u la ong.