Press "Enter" to skip to content

Ka Sorkar Jylla ka dang ïaid shakhmat ban pyndep ïa ka Arts and Culture Centre ha Mawkasiang

La pyllait ïa ‘Ki Phlim Khasi’ u Bah Kitbor W. Nongrum:

Shillong, Kyllalyngkot 14: Ka Sorkar Jylla ka dang ïaid sha khmat ban pyndep noh ïa ka Arts and Culture Centre, kaba don lai tylli ki Hall ha Mawkasiang. Ïa kane la ïathuh da u Bah Wilfred Nongsiej, Director Arts and Culture, Government of Meghalaya haba ai jingkren ha ka jingïalang pyllait paidbah ïa ka kot ba la ai kyrteng ‘Ki Phlim Khasi’, ba la thoh da u Bah Kitbor W Nongrum, ha ka sngi ba ar.
U la ïathuh ba na ka liang ka tnad kan ïaleh ban pyndep kloi katba lah ïa kane. “Lehse kan long ka jingmyntoi ruh ïa ki nongshna phlim Khasi ha ka Jylla”, u la ong da kaba kdew ba ha ha kane ka jingïalang ki la don lang ki nongthoh kot bad nongshna film. “Imat ka dei ka jingïasngewthuh jingmut hapdeng jong ki bad nga ai khublei ïa kane”, u la ong.
Ïa ka kot la pyllait paidbah ha ka jingïalang ba la long ha Manipur Restaurant, Laitumkhrah ha ka jingïadonlang u Dr Munish Singh,
Director ICCR, u Bah Commander Shangpliang, President ka Mehalaya Film Makers Association (MeFMA), u Bah Andreas Sun, u Bah R Kharshiing, Secretary ka Khasi Authors’ Association (KAS), ki bahaïng u Bah Kitbor W Nongrum lem, Kong Streamlet Dkhar, iba la pynïaid ïa ka jingïalang bad kiwei kiwei.
Na ka liang u Bah Kitbor W Nongrum, kum u wei na ki nongthoh kot uba la noh synñiang bha ha ka lyngkha ka thoh ka tar, ha ka rta ba un kynjoh 75 snem, u la ong, “Kaba pynlong ïa nga ban thoh ïa kane ka kot ka long ban buh sah jingkynmaw ïa ki phlim Khasi kiba la pynmih watla don napdeng jong ki kiba nga khlem ioh kyrteng lut ne ïa kren bad ki nongshna”.
“Nga ïoh ïa ki jingeh kiba bun kiba ki nongshna phlim ki ïa kynduh kumba ïa kynduh ki nongrwai ki nongthoh kot bad kiwei kiwei. Ngi na ka liang ki nongthoh ngi la don ïa ka jingithuh na ka Sorkar watla ka bai ïarap ka long kaba rit”, u la ong. “Naduh 1981 ngi la sdang shna ïa ki video ki phlim lyngkot bad ngi mad shibun ki jingeh”, u la ïathuh da kaba pynpaw ba u la ïa don bynta ban thaw ïa ka phlim “Ka Ri Ki Laiphew Syiem’ ha u 1981.
Halor kane ka kot u la ong, “Nga sngew ba dei ban lum ban lang ban tip ïa ki nongpynmih phlim Khasi kiba long ka bynta ba khraw ban pyni sha ka pyrthei ïa ka riti dustur, ka kolshor ba ngi don. Ha kane ka kot nga la buh tiak tiak ki jingbatai ïa ki phlim kiba nga la peit bad nga sngew ban ai ka jingïaroh ïa ki nongshna phlim Khasi kiba la nang kiew kat nang mih ki sngi. Ki don bynta ka bynta ba khraw ban pynriewspah ïa ka kolshor, ka jingtip bad kiwei kiwei”.
U Bah Commander Shangpliang, u la pynpaw ka jingsngewkmen halor ka jingtih bniah u nongthoh halor ki phlim Khasi. “Ngi la kham kiew ka rukom shna phlim hynrei ngi sngewduh mynsiem ba ym don jaka ban pyni paidbah kum ka Hal bad ngi ïoh Hall tang kawei . Hadien ba la dep pyni ha ka Hall ym banse ban hap leit ïa pyni phlim ha ki surok, ki lynti shnong namar ban pynmih ïa ka jingpynlut”.
Na ka liang u Munish Singh da kaba ai jingïaroh ïa u Bah Kitbor u la ong, “U dei u nongsumar ïa ka kolshor bad riti dustur ba kyrpang da ki jingthoh jong u. Ki nongshna phlim ki dei ban ïaid ryngkat bad ki jingthoh kum ki jingthoh pynwandur khana. Ka dei ka lynti kaba dei eh ban kyntiew bad pyni sha ka pyrthei ïa ka jingïatreilang bad nga ïoh ki phlim Khasi ki la nang ïaid sha khmat”.