Press "Enter" to skip to content

Kyrshan ka MPLU ïa ka jingpynmih hukum ka Lokayukta halor ka jingpyllait beaiñ ïa u dewïong

Dawa ïa ka Sorkar MDA ban die paidbah ïa ka Challan:

Khliehriat, Kyllalyngkot, 14: Ka Meghalaya People Labour Union (MPLU) kaba la lamkhmat da u Bah Erwin Syiem Sutnga kum u President ha ka jingialang mynta ka sngi Baar kaba la long ha Khliehriat, East Jaiñtia Hills District ka la ai ka jingkyrshan ïa ka jingpynmih hukum da ka Meghalaya Lokayukta kaba la kdew shai ïa ki kam beaiñ jong ka Sorkar lyngba ki Heh Ophisar sorkar ha kaba ïadei bad ka jingkhaii dewïong be-aiñ hapoh ka jylla khamtam ha East Jaiñtia Hills District bad ong ruh ba ka Sorkar kam sngewthuh satia ïa ki jingeh jong ki paidbah kiba bun kiba dei ki nongkhaiï dewïong.
Haba kren halor ka jingduhnong jong ka Sorkar na ka jingkhaii be-aiñ ïa u dewïong, u Bah Erwin u la ong, “Ngi sngew dei ban ai ka jingiaroh ïa kaei kaba ka Meghalaya Lokayukta ka la leh ha kaba ïadei bad ka jingkhrong pisa beaiñ. Haba phai sha ki nongthaw aiñ u James PK Sangma kum u Myntri ka tnat Kam Pohiing, u Conrad Sangma uba bat ïa ka Mining bad Geology, hato uei uta u shakri uba nud ban leh eiei khlem ka jingtip u kynrad jong u. Kum u PS jong u Myntri Rangbah ka jylla uba dei uba la thung ban lum ïa ki pisa, uba peit ïa ka kam dewiong, uba thaw ïa ki Task Force hapoh ki Superintendent of Police, uba pynkynriahkam ïa ki heh sorkar katba mon ka pisa ka don ha kti jongno haba kumta? Ha kti jong ki hi,” kynthoh u Bah E.Sutnga
U la kyntu ba dei ban kyrshan ïa kane ka jingpynmih hukum jong u Chairperson ka Meghalaya Lokayukta u P.K.Musahary ha kaba u la shim ïa ka rai ban pynkhuid bad ban wad ïa ka tynrai.
“Haba ki baduk bashitom kim ïohlad ban trei, ka MPLU ka ieng na ka bynta baroh naduh uba rit haduh uba heh uba dei hok ban ïoh ryntih ïa kiei kiei baroh la ka long ha ka khaii ka pateng,” u la ong.
Haba kren pat halor ka jingbym iaid beit ka rukom die Challan ha kaba kiba bun ki paidbah kiba khaii dewiong ki la shah ktah jur na ka daw ka jingpynkiew dor palat ïa ka Challan, u Bah Erwin u la ong, “Halor u dewiong uba dang sah uba 32 lak ton ka Sorkar ka dei ban ai ïa ki Challan sha ki trai dewong hi ym sha ki riewshimet lymne sha ki Dalal. Kumno yn shu ai Challan sha ki briew bym don dewïong.”
Ki nong khaii dewiong kiba na ka East Jaiñtia Hills District kiba la ïadon lang ha kane ka jingïalang mynta ka sngi Baar ki la pynpaw bad ong, “Kane ka Sorkar ruh ka ïalehkai politik pynban ha kaba ïadei bad ka Challan. Ngi dei ban mih shakhmat ban ïakhun ïa kane ba ka Sorkar ka dei ban die paidbah beit ïa ki Challan, namar ïa ka Challan kaba T.18 hajar ne T. 20 hajar ngi hap ban thied ha ka dor kaba haduh T.1 lak. Kane ka pynpaw ba ka Sorkar Meghalaya Democratic Alliance (MDA) ka dei ka Sorkar jong ki Mahajon heh spah kaba la die ïa ki Challan tang sha ki katto katne ki briew.”
Na ka liang ki nongialam jong ka MPLU ki la pynpaw ba ka Union kan ieng ban ïakhun na ka bynta ka jingbit jingbiang lang jong ki paidbah ban pynïoh ruh ïa ki hok ba ki nongtrei, ki nongbylla sngi, ki nong khaii barit kiba dei hok ban ïoh.