Press "Enter" to skip to content

La plie ïa ka jaka ri ngap ba 10 klur tyngka ha Garo Hills

Shillong: u Myntri Rangbah ka jyla, u Conrad Sangma ha ka sngi ba ar, u la plie ïa u mawnongrim ban tei ïa ka jaka ri ngap ba nyngkong eh ha jylla ba la tip kum ka Beekeeping Development Centre (IBDC) ha Sambrak Seed Farm, kaba don ha North Garo Hills.
Ïa kane ka Centre kaba 10 klur tyngka la bei tyngka da ka Ministry of Tribal Affairs jong ka sorkar pdeng. Kane kadei ruh shi bynta na ka jingangnud u Myntri Rangbah duh ka ri u Narendra Modi ban kyntiew ïa ka ïoh ka kot lyngba ka kam ri ngap.
Haba ïathuh halor ka jingthmu ka sorkar ban kyntiew ïa ki kam ri ngap, u Myntri Rangbah u la ong ba ka sorkar ka la ïatreilang bad ki bor treikam bapher bapher ban ri bad pynneh pynsah ïa u jait ngap uba nangne hi. “Haduh mynta ngi la lah ban ai jinghikai kumba hynriew hajar ngut ki nongri ngap bad palat hynñiew hajar ngut ki briew la ai jinghikai ha ka kam ri ngap”, u la ïathuh, da kaba bynrap ba ïa kane ka jinghikai la ai da ka Meghalaya Institute of Entrepreneurship (MIE).
U Myntri Rangbah u la ïathuh ruh ba ka Meghalaya kadei ka jylla kaba don jingkyrmen bha ha ka kam ri ngap bad ki don haduh kumba san hajar tylli ki jaka shong ki ngap bad ka jinglah ban pynmih mynta ka long tang kumba 3 percent. Kumta ka jingtei ïa kine ki Centre kan long ka jingïarap kaba khraw ha kaba kyntiew ïa ka kam ri bad pynmih ngap.
Ha kane ka jingïalang la don lang u Deputy Speaker, u Timothy D. Shira, u MLA ka Kharkutta, u Rupert Momin, u MLA ka Bajengdoba Pongseng M Sangma bad kiwei kiwei.