Press "Enter" to skip to content

La Rakhe ïa ka National Consumer Right Day ha Ri Bhoi District

Nongpoh, K’lyngkot 14: Kum shi bynta ha ka ban pynphriang paidbah halor ka hok ki nongthied nongpet hapoh ka District Ri Bhoi, na ka liang ka Bosco Integrated Development Society (BIDS), ha ryngkat ka jingïatrei lang bad ka ophis jong U District Commissioner (supply), Ri-Bhoi District, ki la pynlong ïa ka jingrakhe ïa ka National Consumer Right’s day ha ka 17 tarik u bnai Nohprah ba la dep ha ka shnong Nongagang Marngar ha Ri Bhoi District.
Ki paidbah kiba la wan ban shim bynta ha kane ka sngi ki kynthup naduh ki Longkmie na ka kynhun SHG na sawdong ka shnong Marngar bad kynthup ïa ki 8 dong naduh ki samla, ki longkmie, ki longkpa bad ki paidbah Nongshong Shnong.
Ki Nongkren kiba la ai jingkren ha kane ka sngi ki kyntup ïa u Bah Bah T.R. Mallai Administrator BIDS bad Director Childline Shillong bad Nongpoh, Z. Khiangte, Lead District Manager SBI, ki nongtrei na ka BIDS, B.L. Nonglait, E. Naik, M. Shangdiar ryngkat lang bad ki rangbah shnong na Umtham, Borgang, Nongagang, u secretary shnong bad ki Nongsam Khaw Rashon.
Ha kane ka sngi la pyniaid ïa ka jingïalang da i Bina Sohkhwai (Secretary, SHG IV) da kaba kren pdiang ïa baroh ki kongsan bala ïa poi ha katei ka programme.
U O. Benong Rangbah shnong ka Nongagang u la pdiang sngewbha bad ïaroh ïa ka BIDS kaba pynlong ïa kane ka programme kaba donkam eh na ka bynta ki nong kyndong ba kin tip ïa la ka jong ka hok.
Ïa ka maitphang jong kane ka sngi la kren da E .Naik Coordinator ka BIDS,uba la pynshai paidbah ba la rakhe ïa kane ka sngi ka long ban ïarap khnang ïa ki nong thied nongpet kin long kiba husiar bad tip ïa la ka jong ka hok bad ngim dei ban shah ïalam bakla.
U Bah T.R. Mallai ha ba kren ha kane ka sngi u la ong ba ïa ka ba kum kane ka programme la ju rakhe kum ka World Consumer Rights day kata ha ka 15th Lber bad ka National Consumer Right’s day ha ka 24th Nohprah bad ha kine ki sngi la pynlong da ki program bapher bapher ban pynsngewthuh paidbah ïa ki hok bad ki jingeh kiba ki nongthied nongpet ki ju ïa kynduh.
“Bun sien ki nongkyndong ki shah ïa lam bakla ha ki nongdie bad ki nongthied, kumta ngi don ka hok ban ujor sha ki bor bahalor lada ngi shem kum kine ki khep” la ong u Bah Mallai. U Bah Mallai u la kren ruh ruh halor ka thew ka woh, ka Public Distribution System, ka National Food Security Act 2013, ki rashon card (AAY,PHH,APL) bad ka midday-meal.
Ka Kong B.L. Nonglait ka la pynshai ha kaba ïadei bad ki ain ujor ne ki lad jingïada jong ki nongthied nongpet bad kumno yn leh lada don kiba pynkhein bad ïaidlait ïa ka ain da kaba kren halor ki hok jong ki nongthied kata ka hok ban ioh jingïada, jingtip, ka hok ban jied, ban pyniohsngew, ban ioh jingpynbiang bad jingpynshai.
Ka Z. Khangte, Lead District Manager- SBI ka la kren halor ka jingshngain kaba ïa dei bad ka rukom sei-thep pisa lyngba ki bank bad ban ioh jing shaniah haba donkam ban shim ram ne ioh jingkyrshan ha ba sengkam sengjam.I la pynshai ruh ha kaba ïadei bad u aadhar card.
Ha katei ka sngi la don ruh ka jingïakop dro dur jong ki khynnah halor ka phang consumer Rights da ka jingthmu ban bsiap ïa ka jingtip hapdeng jong ki khynnah ha kaba ïadei bad ka hok jong ki nongthied nongpet. La pynkut ïa kane ka sngi da kaba ai ïa ki khusnam sha ki nongjop. Ha kaba kut u Rangbah shnong jong ka Nongagang u la ai khublei ïa baroh kum ka ktien pynwai ïa ka prokram.