Press "Enter" to skip to content

Na u CEM, dawa u MDC ban wanrah Resolution pyrshah ïa ka CAA

Shillong, K’Lyngkot 13 : U MDC ka Congress na Rambrai – Jyrngam, Bah Bajop Pyngrope u la dawa na u Nongïalam jong ka United Democratic Forum (UDF), Bah Latiplang Kharkongor ba dei ruh u Chief Executive Member ka KHADC ba u dei ban lum ïa ka jingïalang ba kyrkieh jong ka Forum ban ïatai bad kren sani halor ka Citizenship Amendment Act.
Utei u MDC ha ka shithi sha u CEM u la ong, “Na ka bynta ban ïada ïa ki briew jongngi, nga kyrpad ïa phi ban khot noh ïa ka jingïalang jong ka UDF ba ïa kren halor ka Citizenship Amendment Act bad ruh ban wanrah bad mynjur da ka Resolution ban pyrshah jur ïa katei ka aiñ.”
Haba kren bad ki lad pathai khubor, utei u MDC u la ong ruh ba lada ka Forum ka ioh ban thaw ïa ka Executive Committee ba pura kadei ban wanrah bad mynjur ïa ka Resolution ha Iing Dorbar ban pyrshah ïa katei ka aiñ.
“Peit ka sorkar MDA ka la mynjur ïa ka Resolution hynrei kam shai pat la ka pyrshah neem pat ïa ka CAA,” la bynrap biang u Bah Bajop. Halor kane ka bynta, u la kyntu ïa ka sorkar jylla ba kan khot biang ïa ka Special
Session ban pyrshah lang ïa ka CAA wat ha Iing Dorbar ruh. Utei u MDC u la ong ruh ba dei ban ïaroh ïa ka sorkar Kerala namar dei tang katei ka jylla kaba la ujor syndon da ka Special Leave Petitions sha Supreme Court.
Nalorkata, u ong ruh ba lada na ka liang ka UDF kam shimkhia halor katei ka bynta, un rah sha ka party Congress ban shim pat da kiwei ki rai.
Halor ka jingkylli, u Bah Bajop u la ong ba ka Resolution kaba wanrah ha ka por jong u Bah Teinwell Dkhar kadei pyrshah ïa ka Citizenship Amendment Bill hynrei mynta pat ka donkam ban pyrshah ïa ka Act.
Katkum ka jingong jong u, ka sorkar pdeng ka kdew ba haduh 97persen ki jaka ki hap ha ka Sixth Schedule bad kumta kin lait na ka CAA, hynrei u la pynpaw pat ba lada ki briew kiba nabar ri ki la shlei ha Assam khlem artatien kin poi beit sha kane ka jylla.
U Bah Bajop u la ong ba dei ban ïaroh ïa ka Naga People’s Front (NPF) kaba la sospon ïa u MP jong ka tang na ka daw ba u kyrshan ïa ka CAB.