Press "Enter" to skip to content

Ngam don jingthmu ban mih na ka NPP dei ka jingpynïashrut ïa nga bad u CM : Danggo

Shillong, Kyllalyngkot, 14: U MLA barim ka Ranikor Constituency u Bah Martin M. Danggo u la ïathuh ba um shym la don jingthmu eiei ban leit phai biang sha ka Seng Congress bad ong ruh ba ka jingmih khubor ba un mih noh na ka National People’s Party (NPP) ka long tang ban pynïashrut u Myntri Rangbah ka Jylla u Conrad K. Sangma.
“Ngam don jingtip eiei ruh em ïa kata kaba la mih ha ki lad pathai khubor ne ki Social Media, nga don sha shnong ha kine ki sngi bad kam shym la don kata ka jingïakren ruh ban mih na ka NPP,” ong u Martin Danggo uba long ruh u Lamphang barim jong ka Iingdorbar Thawaiñ ka Jylla.
“Kumba la paw ha ki lad pathai khubor bad ki Social Media la kynnoh ba u Myntri Rangbah ka jylla u Conrad K Sangma ba u leh beiñ ïa nga, halor kane ka jingkynnoh na ka liang jong u Myntri Rangbah kam don eiei kum kata ka jingleh
beiñ ïa nga,” ong u Bah Danggo.
“Ha ka jingshisha nga sngewnguh ïa u Myntri Rangbah ka Jylla ïa ka jingai ïa ka Ranikor Civil Sub Division bad u la thung ïa nga kum u Co-Chairman jong ka State Planning Board ha ka kyrdan Cabinet Minister,” la bynrap u Bah Dangto.
“Na ka liang jong nga, nga shim ba kane ka dei tang ka buit jongno-re jongno ban wanrah ïa ka jingïapher jingmut ne ban wanrah ïa ka jingsngewthuh bakla hapdeng u Myntri Rangbah bad nga. Haduh mynta kam don kano kano ka jingïapher jingmut hapdeng jong nga bad u Myntri Rangbah bad kumjuh bad ka NPP,” u la ong.
“Lada don kano kano ka jingkylla hadien habud ruh, ngan ym leh lyndet khlem da kren ïa u National President jong ka Party bad ïa u State President bad ïa ki nongïalam ba hakhmat duh jong ka Party bad lada nga leh ruh ngan resaiñ shuwa na ka kam ba nga bat mynta kum u Co-Chairman jong ka State Planning Board bad na ka Party,” la pynshai u Bah Danggo.
“Halor ka jingpaw ha ki lad pathai khubor ba ngan ïaleh ïa ka elekshon MDC kane ka long ka bym don nongrim haei haei ruh. Ha kaba ïadei bad ka elekshon MDC ngan ai ka jingkyrshan ïa uno uno u kyrtong ba ïoh ïa ka tiket na ka NPP,” ong u Bah Danggo.
“Ka jingmih ha ki lad pathaikhubor ba ngan mih na ka NPP ka long ka bym shisha bad ka bym don nongrim haei haei ruh, hooid na ka liang jong ka seng Congress ki ju khot biang ïa nga hynrei ngam shym la pdiang ïa ka jingtyrwa ïa mynta,” u la ong shuh shuh.