Press "Enter" to skip to content

Rai ki paidbah ka Ummat ban bret noh ïa ki EPIC ka Assam, kyntait ban pynrung kyrteng Aadhaar

Shillong, K’lyngkot, 14: U Rangbah Shnong bad ki paidbah jong ka shnong Ummat ha ka sngi Baar ki la shim ïa ka rai ban bret noh ïa ki Elector Photo Identity Card (EPIC) ba la ai da ka Sorkar Assam naduh ki snem ba ladep.
U Bah Dim Mukhim u Rangbah Shnong bad ki nongshong shnong jong kane ka shnong Ummat kaba dang don ha ka jingïakajia pud hapdeng ka Meghalaya bad ka Assam ki la shim ïa kane ka rai hadien ba ka Sorkar Assam ka la phah ïa la ki shakri Sorkar sha kane ka shnong ban pynrung kyrteng Aadhaar Card ïa baroh ki Khasi, ki Karbi, ki Tiwa bad kiwei kiwei ki jaidbynriewa kiba buhai shnong ha kane ka shnong kaba la shah pynngat ha ka West Karbi Anglong District jong ka Jylla Assam bad ha Ribhoi District jong ka Jylla Meghalaya.
Katkum ka jingïathuh jong u Rangbah Shnong, ki shakri sorkar jong ka Sorkar Assam ki la don ha ka shnong Ummat mynta la kumba
lai ne saw sngi eiei ban pynrung kyrteng Aadhaar ïa ki nongshong shnong.
Ki paidbah jong ka shnong Ummat kiba hapdeng ka jingartatien ba kane ka jingpynrung kyrteng Aadhaar kan ktah pynban ïa ka lawei jong ki, mynta ka sngi ki la khot ïa ki nongïalam ka Hynñiewtrep Achik National Movement (HANM) ban pynshai halor kane ka bynta.
U Rangbah Shnong bad ki nongshong shnong ka Ummat ki kubur ba ki don ïa ka EPIC na ka Jylla Meghalaya bad Assam bad kumjuh na Meghalaya bad pyni ruh hakhmat ka kynhun ki nongthoh khubor ïa ki EPIC Card ba la ïoh na Assam bad Meghalaya.
Shuh shuh u la ïathuh ba wat u BDO ka Bhoirymbong C&RD Block ruh u la kyntu ba dei ban don beit tang kawei ka EPIC ban pynsuk ïa ka jingtreikam ka Sorkar Meghalaya. Ki paidbah ha kane ka shnong ki ju ïashim bynta shisien san snem ban thep vote sha ka Jylla Meghalaya bad sha ka Jylla Assam ruh kumjuh.
Katto katne ki nongshong shnong ka Ummat ha ka jingïakren bad ki Nongthoh khubor ki la pynpaw ba bun na ki paidbah kim mon satia ban pdiang ïa ka EPIC bad ban thep vote sha Assam hynrei ka Sorkar Assam ka la shim kabu tang na daw ka jingdon jong ki riewshimkabu kiba long ki iingkhong shyllangmat ban bam ar maloi ïa ki jingmyntoi na ka Jylla Meghalaya bad Assam, watla ki don pat katto katne ngut ki nongshong shnong kiba kwah ban kyntait ïa ki jingmyntoi bad ïa ka EPIC jong ka Sorkar Assam.
Ha ka jingïalang kaba la long mynta ka sngi, ki paidbah ki la shim beit ïa ka rai ban kyntait ïa ka jingpynrung kyrteng Aadhaar ka Assam hynrei ki la ïathuh pat ba ki don ki jaidbynriew Tiwa kiba buhai shnong ha Ummat bad kiba la dawa jingithuh kum ki ‘Riewlum’ ka Jylla Meghalaya kiba la leit ban pynrung kyrteng Aadhaar sha ka Jylla Assam. La lap ruh ba ka Sorkar Assam ka la wanrah bun bha ki kam pynroi ha kine ki shnong kiba hap hapoh ka Block-I da kaba shna ïa ka Mini Stadium, siang surok rong, sam bording, shna skul, shna jingkieng dewbilat bad kiwei kiwei.
U Nongïalam ka HANM u Bah Lamphrangsngi Kharbani haba kren ha ka jingïalang pynshai paidbah ha Ummat u la ong, “ngim kwah ba ka Ummat kan leit sha ka Jylla Assam. Phi dei ban pyneh beit triang ïa ka jingwan pynbor jong ka Sorkar Assam ban pynrung kyrteng Aadhaar ne EPIC hapoh shnong lada phi dang kwah ba ka jaka ka puta bad ka khyndew ka shyiap jong phi kan dang neh hapoh ka Jylla Meghalaya.”
“Lada phi kwah ban dang ïai neh hapoh ka Jylla Meghalaya phi dei ban don tang kawei ka EPIC na ka Jylla Meghalaya. Lada phi kwah Aadhaar Card leit sha Ophis Deputy Commissioner sha Nongpoh, wat pynrung kyrteng Aadhaar na ka Jylla Assam ïoh ba phin shah pynlong nong Assam shisien ka sngi,” u la ong.
Haba kyntu ïa ki nongïalam shnong bad ïa ki paidbah ba kin kyntait ïa kino kino ki jingpynbiej jong ka Sorkar Assam, u Bah Kharbani u la ong, “wat shah ba ka Assam kan wan leh donbor. Phi dei ma phi ki ban rai ïa ka lawei jong ka pateng ki khun ki kti jong ki la kin don ha Meghalaya lymne Assam. Kito kiba don EPIC ha Assam phah pyndam noh mardor ïa ka kyrteng namarba kane ka dei ka buit jong ka Assam ban ïoh kam ei ïa kane ka jaka ba la ai ha phi da ki kpa tymmen jong phi.”
“Bat beit ïa ka EPIC jong ka Meghalaya ban pynsuk ruh ïa ki bor synshar jong ka Jyalla Meghalaya bad ïa ngi ki sengbhalang ban ïakhun. Ka Sorkar Assam kan ym lah lada phi don ïa ka EPIC bad Aadhaar Card na Meghalaya,” u la ong.
Ha kane ka jingïalang, u Gram Sevak jong ka Bhoirymbong C&RD Block u la wan kum u nongpeit pyrman ban lum jingkheiñ ïa ka jingdon jong ki iing ki sem bad ki nongshong shnong ha ka shnong Ummat.
Ka Kong Christabell Wanniang kawei na ki nongtrei monsngewbha ka la ai mynsiem ïa ki paidbah jong ka shnong Ummat ba ki dei ban bud nuksa ïa ka shnong Khliehumwang, Sabuda, Jatalang bad ka Madan Umwang kiba la kyntait ban pdiang ïa ka EPIC jong ka Jylla Assam
“Don tang kawei ka EPIC na ka Jylla Meghalaya bad wat ïashim bynta shuh ha ka election jong ka Assam. Wat pdiang shuh ïa kino kino ki kam pynroi na ka Assam namarba kumba phi ïohi mynta ba u Aadhaar u dei ka thong ba khatduh eh jong ka Sorkar Assam ban pynlong ïa phi ki nong Assam lada phi dang ïai ngop ha ki jingshah pynbiej,” ong ka Kong Christabell bad bynrap, “ym don mano mano ruh ba lah ban pynbor ïa phi, ka rai ka shong ha phi ban rai ïa ka lawei jong phi hi.”
U Asst. Secretary ka HANM u Bah Louis Dohtdong u la kyntu ïa ki paidbah ka Ummat ba kin ym shah pyngngop shuh ha kino kino ki jingshah pynthame jong ka Sorkar Assam namarba ka jingthmu ba shalyndet jong ka Sorkar Assam ka long beit tang ban ïoh klun ei ïa ki shnong Khasi kiba don ha khappud. U President ka HANM Mawhati Circle u Bah Mandal Myrsing u la ïathuh ba ki don 62 tylli ki shnong kiba hap hapoh ka Raid Nongtung kaba don markhap bad ka Jylla Assam.
“Bun na ki paidbah ki kwah ban don beit hapoh ka Jylla Meghalaya bad wat u Syiem ka Raid Nongtung ruh u pynpaw ba u kloi ban ai dulir ïa ki nongshong shnong kiba kwah ban pynskhem ïa ka jaka ka puta sha ka Jylla Meghalaya ha kine ki shnong khappud,” u la ong.