Press "Enter" to skip to content

Mih ka kynhun ïalehkai Meghalaya ban ïashim bynta ha ka Dr T Ao Trophy

Shillong, Kyllalyngkot 17: Ka kynhun ïalehkai football jong ka Meghalaya ki la mih mynta ka sngi Thohdieng ban leit ïashim bynta ha ka lympung ïalehkai football Dr T Ao Trophy 2020 kaban sa long ha Nagaland mynta u Kyllalyngkot.
ïa ka Meghalaya la pynïakap ha ka Group B ryngkat ka Sikkim, Assam bad ka Mizoram, katba ha ka Group A ka don ka Nagaland kaba pynlong ïa katei ka lympung, ka Arunachal Pradesh, Manipur bad ka Tripura. Baroh ïa ki jingïalehkai yn pynïakhun ha IG Stadium, Kohima.
ïa katei ka kynhun ba don 20 ngut la bynshet ha u Brolington Warlarpih kum u Kapten, u Kenstar Khar shong Vice-Captain, u Bah Khlaiñpyrkhat Syiemlieh kum u Coach bad u M. Warbah kum u Manager.
Ka Meghalaya kan mih madan ban ïakhun nyngkong eh pyrshah ïa ka Mizoram ha ka 21 tarik Kyllalyngkot, nangta ïa ka Sikkim ha ka 23 tarik bad ïa ka Assam ha ka 25 tarik Kyllalyngkot. Ki ar tylli ki top team na baroh ar tylli ki Group kin ïoh ban ïakhun semi final. ïa baroh ar tylli ki jingïalehkai final yn pynlong ha ka 27 tarik Kyllalyngkot, bud pat sa ka jingïakhun ban ïaknieh ïa ka nam ba lai bad ïa ka final ha ka 28 tarik Kylllyngkot 2020.
Ha kane ka sngi shuwa ba ka kynhun kan mih na la ka jong ka jylla la pynlong ïa ka jingïalang kitbok kitrwiang ha madan Polo, ha kaba la ïadonlang u Treasurer ka MFA Bah Wanshanbor Kharkrang, Senior Cell Convener Bah Hering Shangpliang bad u Senior Cell Member Bah Cliff Nongrum.
Na ka liang u Bah Wanshanbor Kharkrang u la ai ka jingkhublei kitbok kitrwiang ïa katei ka kynhun ban poi suk poi saiñ sha katei ka jaka bad kyntu ïa baroh ki rangïalehkai ban buh sharud ïa ka jingïasngewpher Club hynrei ban ïatreilang ryngkat ryngkat kum kawei ka kynhun jong ka Jylla. U Bah Kharkrang u la kyntu ruh ba kidei ban long kiba ryntih ha baroh ki jingïalehkai khamtam haba ki mihkhmat ïa la ka jong ka Jylla Meghalaya
U (L) Talimeren Ao ïa kaba la ai nam ïa kane ka tournament, la tip ïa u kum u wei na ki Kapten ba nyngkong duh jong ka kynhun ïalehkai footbal ka Ri India (Indian Football Team) hadien ba ïoh laitluid ka Ri bad ïalam ïa ka India ha ka Olympic Games jong u snem 1948.
Ki rangïalehkai ba la pyllait da ka MFA ki long u Brolington Warlarpih (C), Kenstar Kharshong (VC), Frolicson Dkhar, Siwel Rymbai, Kynsaibor Lhuid, Samuel Lyngdoh Kynshi, Atlanson Kharmaw, Aenam Jyrwa, Shano Tariang, Batifar Swer, Raikutshisha Buam, Nikelson Bina, Melvin Warjri, Dawanchwa Challam, Stephanson Pale, Justly Sungoh, Batskhem Tariang, Belton Lartang, Denelson Pyngrope bad u Kitboklang Pale. Officials ki long u Bah Khlaiñ Pyrkhat Syiemlieh (Coach), M Warbah (Manager), Dapmon Tariang (Assistant Coach), Lambok Lyngdoh (Physio)