Press "Enter" to skip to content

Shaei phet rieh u Home Minister ka Jylla?

Ka Sorkar Meghalaya Democratic Alliance (MDA) kaba la kynjoh mynta sha ka arsnem duna ban bat ïa u lakam ka synshar khadar, kala shah khmih mynta kum ka Sorkar khlem u Myntri Kam Pohïing (Home Minister) namar ka jingkynnoh ba ka ïoh ïa u Myntri uba phetrieh ïalade na ka pyrthei bad na ki kam pohïing ka Jylla. Kane ka jingkynnoh kala mih namar kat kane ka saw ka sian ha Jylla, ym don shisien ruh ba u Myntri uba dei khmih ia ka Iing ka sem, un mih pyrthei ban kren eiei bad ban pyni ba ula leh eiei na ka bynta ka bit ka biang jong u paidbah ka Jylla.
Ka shuki Myntri kam pohïing ka Jylla ka dei kaba la bat da u James Kongkal Sangma, hynmen jong u Myntri Rangbah ka Jylla Conrad Kongkal Sangma bad ka MP jong ka Tura ka Agatha K Sangma. Kane ka jingjah bad jingjar jar u Myntri kala paw bha ha kine ki sngi ba mynta khamtam haba ka Jylla ka don hapdeng ka saw ka sian na ka jingiakhih ki Sengbhalang ban pyrshah ia ka Citizenship Amendment Bill, ka huri hura saiñ pyrthei ha ki District Council kaba dei ka kamram jong u kum u Myntri ka Tnad DCA, ka jingshyrkhei ka kam tih be-aiñ bad khaii tuh ia u dewiong kaba lashah kynnoh donkti lang ki Pulit bad uwei u Myntri Sorkar, ka jinglap bomb IED ha East Jaintia Hills bad bun kiei kiei.
Ka jingtih bad jingkhaii tuh ia u dewiong ka dei ka kam kaba hap ban khmih bad shimkhia bha da u Myntri kam Pohiing namar ka jingmih ki jingkynnoh ba donkti lang ki Pulit bad Politician kaba dei ruh ban tohkit ia ka jingshisha. Kane ka kam ka dei kaba be-aiñ lada phai sha ka hukum jong ka Iingkashari Supreme Court ne ka hukum jong ka National Green Tribunal hynrei shaei jah rngai u Myntri Kam Pohïing..Shaei ba u phetrieh. Hato um ju don hapoh Jylla. Ha ka jingshisha ka dei ka kamram jong u Myntri kam pohiing ban khmih ia kane ka kam bad ban tuklar ruh da ka bor jong u, ban pynthikna ba kum kane ka kam be-aiñ kam dei ban jia. Hynrei jar jar hala ka jong ka pyrthei, hala ka jong ka jingtreikam, la hap ban tuklar ia kane ka kam da kiwei pat ki Myntri Sorkar kynthup u Myntri Rangbah ka Jylla.
Ka Jylla Meghalaya mynta kala shah shong kulai ha u droks uba la rung ban pynjot ïa ki nong shongshnong, pynthut ïa ka shongsuk shongshngaiñ ha ki shnong ki thaw bad ka imlang sahlang…donbok ba trei shitom hi ka Tnad Pulit ba la lah ban shu pyrrkhing ïa ka jingrung laitluid jong une u jingdih ba sniew. Ka jingïoh kurup drok bad kem nongshalan droks/Nongdih Droks kala jia jan manla ka sngi ha Jylla khamtam ha Nongbah Shillong hynrei pat don kawei ruh ka sien ba u Myntri Kam Pohïing un mih ban kren eiei shaphang u droks ne ban pyni ïa kaei ka sienjam ba ula shim ban tehlakam ïa kane ka jingwan rung u droks.
Ka jingkyntur pud jong ka Sorkar Assam ha khappud ka Ri-lum Jaiñtia ka dei kawei ka mat kaba la shu phai lyndet da u Myntri kam Pohïing uba la dei ban tuklar bad ban shim ïa ki sienjam ban pynthikna ba ka Sorkar Assam kam dei ban pynthut ïa ka jing shongsuk shongsaiñ ha khappud. Ha u snem bala lah, li paidbah Khasi-Pnar kiba shong ba sah ha ki shnong Khappud ka Jylla bad ka West Karbi Anglong dang khyndiat sngi kila rai ban khot da ka jingïalang paidbah kum ka sienjam ban ialeh pyrshah hi noh ïa ka jingwan shna surok jong ka Sorkar Assam ha Lapangap. Kane ka rai kala mih namar ka jingbitar halor ka jingleh mynthi bad sngap jar jar jong ka Sorkar Jylla. ‘Lada u nongpeit ïa ka ïing ka sem um nang ban peit, wat u ksew ne ka miaw ruh kin tynruh hi ïa ka khiewja. Lada u Kpa ne ka Kmie kim leh eiei, ka dei ia ki khun ban hap leh hi noh ia kat kaba shah hakhmat’.
Ka jingkulmar Them Metor kaba la pynkylla madan thma ia ka Motphran bad thaiñ Mawkhar ka dei kawei ka ishu kaba u Myntri kam pohiing ula leh khyndiat eh iala ka kamram ban pynthikna ba ka jingshongsuk shongsaiñ kan wan phai ha Nongbah Shillong. Kane ka jingjia kan nym da kylla long jai jai lada ym dei ka jingtuklar jong kiwei pat ki Myntri Sorkar, ki MLA shimet bad kiwei kiwei. Kaei kaba u Myntri ula leh halor kane ka jingjia, ha ka jingshisha ka dei ia u ban mih na Secretariat…ban mih nala iing ban wan kren bad pynsngewthuh ne pynjai jai ia u paidbah phewse khlem iohi wat tang i durkhmat ruh.
Nalor kine,ki dang don shibun bah ki ishu kiba ka Jylla ka khmih lynti ba u Myntri kam pohiing un pyni dak ba u shimkhia. Kiba bun ki ishu kiba ki paidbah ka Jylla ki khmih lynti ban ioh jingpynshai na u Myntri kam pohiing hynrei kine baroh ki shu sahkut tang ha ki jingkhmih lynti bad ki bym poi shano shano ruh. Wat ki lad pathai khubor kila mad ia ka jinglong kuman jong u Myntri kam Pohiing haba ki pyrshang ban leit iakynduh ia u ban kylli pyrthew ia ki kam pohiing ka Jylla hynrei haba bun ki khep lait shisien arsien eh, ba u Myntri u long uba kloi ban iakynduh ban iakren ia ki ishu ka Jylla lait nangta tang ka jingbym lait bad jingbym don por suda.