Press "Enter" to skip to content

Ki jingbha baroh ki sdang na la rympei ïing

Ngi im ha ki sngi kiba ka jingstad ka la roi stet shisha bad ngim lah ban len ia kawei ka jingshisha ba ka jingstad jong ki khun kiba dang rit ka la beh pass ia ka jingstad jong ki kmie ki kpa khamtam ha kaba iadei bad ki jingnang jingtip bad jingshemphang ba iadei bad ka teknoloji ne ki media. Ki Mobile bad Computers ki dei kawei na ki nuksa kaba suk eh ban iohi kumno ba ki riew rangbah ki shem ba kam long kaba suk ban pyndonkam ia ki, hynrei ki khynnah wat ki bym pat leit skul ruh kim shem jingeh ei ei ban pyndonkam ia ki. Hynrei kine ki jingstad jong kane ka juk ki la beh pass noh wat ia ka burom ka akor kaba dei ka bynta kaba kongsan eh ha ka jingim jong ki briew. Ngi iohi ia ka jinghiar jong ka akor ka burom katba ki sngi ki nangiaid. Hynrei ka la long kaba donkam ban kynmaw ba lada ki kmie ki kpa bad ki longiing kim shim khia ia kane ka bynta ban ai ia ka por bad hikai ia ki khun ia ka akor ka burom, kin ym lah ban ioh jinghikai nabar ha kaba iadei bad kane, namar ka long kaba shisha ba ka jingbha ka sdang na la rympei iing- ne Charity begins at home kumba ong ka ktien nongwei.
Kawei ka phang kaba ktah ia ki long iing longsem ka dei ka jinghiar jong ka jingshakri Blei, hynrei ka jngkiew jong ka jingiabeh ia ka spah pyrthei, ka burom pyrthei bad ka bor pyrthei. Kane ka juk ka don ha ka kompitishon kaba khraw ha kaba baroh baroh la iakwah ban iadon lut ia kaba kiwei ruh ki don bad ruh ban kham don khamtam ban ia kiwei. Ka jingbuhkam ha kaba iabeh ia kane ka spah pyrthei ka ktah pat ia ka por ban pyrkhat na ka bynta ka akor ka burom ha ka imlang sahlang. Kum ki kmie ki kpa bunsien ka la long pynban ka jingialam bakla ia ki khun ki kti da kaba ki pyrkhat da kaba ailut ia baroh kaba ki khun ki kwah kan pynlong tip sngi ia ki. Hynrei kane ka don pynban ha ka jingma kaba khraw ia ka lawei ym tang ka jong ki hynrei ka imlang sahlang hi baroh kawei. Jan baroh ki longiing ki ud ia ka jinglong ki khynnah kane ka juk mynta ba ki long kiba saitlah bad kiba ym niew kor shuh ia ki kmie ki kpa.
Hooid shisha kane ka juk kam dei kaba suk bad wat ki khun jong ki kmie ki kpa kiba pynlut por ban shakri Blei ruh kim don jingpher na ki khun jong kito kiba lap miet tang bad ka pyrthei. Wat kito ki kmie ki kpa kiba smat bad beh bha sha ka kam shakri Blei ruh la ju ioh sngew bad ki ud shisha ia ka jinglong jingman jona ki khun ha kine ki sngi ba mynta. Kane ka dei kata ka juk kaba ka por hi ka ialam sha ka jingim kaba eh, ym lah ban len ba kane ka jia ryngkat jong ka jingroi ki jingnang jingstad teknoloji bad social media. Kumta kam dei tang kito kiba im riew pyrthei hynrei wat kiba im riewblei ruh ki kyndu marsiang. Hato kadei shisha mo ba kidei kita ki sngi kiba khatduh kumba ka Bible ka kren.
Kaei kaba lah ban iohi, ka long ba kane ka por ka la dawa shisha ia kiei kiei kiba long kham tam ne extra, ba ka long kaba kum ki kmie ki kpa ki donkam ban phikir bha ia la ka jong ka longiing khnang ba yn lah ban tei ia ka long ryngieng jong ki khun ki kti ha kane ka imlang sahlang. Shisha ha kine ki sngi ki don bun ki kmie ki kpa kiba shim khia ban phikir ia la ki jong ki khun ki kti bad haduh ba ki khun ki pule haduh Class 10, ruh ki dang leit on bad leit shaw skul ia ki, kawei ka long namar ba ki ima ia kane ka pyrthei kaba dap bad ker tawiar da ki jingsniew suda namar tang shu bakla tiar ki lah ban mih shibun ki jingeh kiba lah ban long ba yn ym lah ban khyllie pat ia ka jingduhnong na ki.
Hynrei ka long kaba shisha, lada U Blei um tei ia ka iing ki minot leh nohei kiba tei ia ka bad lada u Blei um sumar ia ka nongbah, u nongap u peit leh nohei. (Psalm 127), kum ki briew ngi lah ban leh ia kaei kaba bha tam na ka bynta la ka iing ka sem bad ka longiing- Hynrei katta ruh ka lawei ka long ka bymthikna. Wat la ngim lah ban tip ia kei kaban sa jia hadien habud hynrei ka long kaba donkam ban pyrshang ia kaei kaei kaba bha bad kaba ngim lah don kam ban shu shaniah ha ka bor jong u nongthaw. Hynrei lada ngim shym la shim khia ne leh ei ei lada wan jia kaei kaei kaba sngewsih ngin sa babe kylla ma ngi hi. Namar kata ngi donkam ban pyrshang ia kiei kiei kiba bha na ka rympei iing hi bad khmih lynti ha kaba shabar kan biang.