Press "Enter" to skip to content

“ Pynïap troiñ ïa ka jingpynrem naduh tynrai ”

weekly column
“Ki Symboh ka jingim”
KA DKHOT BIBLE MYNTA KA SNGI
“…naba kane ka dei ka snam jong nga, kaba pynskhem ïa ka jutang hapdeng U Blei bad ki briew jong U. La pynphlei ïa ka kum ka jingkñia na ka bynta ka jingmap noh ia ki pop jong kiba bun” Mathaïos 26:28 (NLT)

Ka la ju don ka por ha kaba ngam tip ne
sngewthuh kaei ka kamram ba kongsan jong
ka snam jong u Jisu bad balei ka pynïoh ïa ka jingïada. Nga ju kam ban tap ïa kiei kiei baroh barabor da ka snam jong u Jisu namar ba nga tip ba ka snam jong U Jisu ka ïada ïa ngi na baroh ki buit thap jong u bymman. Hynrei ka kam ba kongsan jong ka snam ba la pynmih ka dei naka bynta jong ka jingmap noh ïa ki pop jong ngi. Ka long kaba kongsan ban sngewthuh ïa kane namar ba kan ai ha phi ïa ka jingsngewskhem bad ka jingshlur ba phin lah ban wan hakhmat ka khet jong ka jingisynei jong u Blei bad ban ïohi ïa u kum u Kpa baieit eh.
Paralok baieit, “u nongmudui” un wan ha ki por ki bapher bapher ban pynlong ïaphi ban don ïa ka jingsngew pop. Un pynshitom ïaphi na ka bynta kawei pa kawei ka jingshah jop jong phi bad pynlong ïaphi ban sngew ba phim don hok ban wan hakhmat ka khet ka jingisynei U Blei. Un wanrah pat kawei pa kawei ka jingjakhlia jong ka pop ba la jia ha ka jingim jong phi bad ban pynlong ïa ki sakhi kawei hadien kawei, bad pynrem ïaphi ba phi long kiba arsap. Katba phi dang pyrshang ban ïakhun bad kata ka jingkhia bad ka jingsheptieng, u soitan u rung syndon sha kaba jylliew tam jong ka tynrai da kaba pyndonkam da ka hukum ban pynksan ïa ka jingsngewpop bad jingpynrem pyrshah iaphi. U tip bha ba haba phi don hapoh ka jingpynrem, ka jngsheptieng, ka jingkhia ka jingim, baroh ki jait jingpang ki ioh lad ban bud, kumta ruh u soitan un kner ban tare syndon na u pdot jong phi.
Kumno phi leh haba kumta? Phi dei ban pynïap troiñ ïa ka jingpynrem naduh tynrai eh jong ka bad ratdyngkhong ïa ka na ka jingim jong phi. Kam pher aiu u soitan u pynrem ïaphi, ka jingshisha ka long ba ka snam jong U Jisu la dep ban pynmih na ka bynta ka jingmap noh ïa ki pop jong phi baroh [haba phi la pdiang ia u Jisu bad mad ia ka jingkha arsien (Ïoanis 1:12, 3:3-5)]. Da ka snam jong u Jisu ym don shuh kawei ka pop ne i phngit jong ka jingpynrem kaba u soitan u lah ban kawang pyrshah ïa phi mynta ka sngi, kaba ka snam jong u Jisu kan ym lah ban pynkhuid pura na ngi.
Ka Iris kaba sah ha Africa, ka don ïa ka jingphla ban ïasam, kaba la pynpaw ïa ka bor jong ka jingpyllaitluid jong ka jngaiei U Blei, ba ym don shuh ka jingpynrem. Ka la san ha ryngkat ki kmie ki kpa kiba dih buaid, bad ka Iris ka la mad jingkordit shibun eh na ka jingshah leh beijot bad ban beiñ ha ki kti jong une u kpa buaid kat haduh ba la pynlong ïa ka ruh ban kyrni dih kyiad dang ha ka rta kaba khatlai snem hadien ba ka kmie jong ka kala khlad noh na ka jingaksiden kali. Khyndiat por hadien ba la leit buh ïa ka ha ka jaka sah jong ki khynnah ha ka rta kaba khatsan snem, ka la sdang pat ban ngop ha u drok bad im ïa ka jingim kaba lyngkar. Hadien katto katne por ka la ïapoi kha bad ïoh lai ngut ki khun, hynrei kane ka jingshong kurim jong ka ruh kam shym la long kaba jop, bad kane ka la pynlong ïa ka ban noh mynsiem bad shah teh ha ka jingduh jingkyrmen na ka jingban jong ka jingpang. Ha kata ka por ka la mad ia ka jingkha arsien, hynrei kam shym la shemphang ïa ka jingieit bad ka jingaiei jong U Blei. Dei tad haduh ba U Blei u la pynpaw ha ka ïa kaei ka tynrai jong ka jingeh, ba ka jingpynkhiah kaba shisha ka la sdang ban jia ha ka jingim jong ka:
Ha ka jingiaseng, nga la iaid lyngba da ki bnai jong ka “jingpynkhiah” na ka bynta kane ka jingim ba la jot la lwet wat la katta ruh ngam shym la lah ban mih na kata ka pungktieh kaba nga la ngam. Hynrei ha kawei ka sngi, hapdeng jong u snem 2011, nga la ïoh ban peit ïa kawei ka jingkren ba la pyni ha ka Trinity Broadcasting Network (TBN) bad ï ohsngew ia ka khubor jong ka jingshisha ba bad kumno ka jingshah pynrem ka dei ka daw jong baroh ki jingeh jong ngi. Nga la shah shkor bha bad shem ba kaei kaba la kren ka dei ka jingshisha. Baroh ki jingeh ha ka jingim jong nga ki dei na kd daw jong ka jingsngew shah pynrem, bad haba nga la sngewthuh ïa kata bad pdiang ïa ka jingaiei jong ka jingbympynrem shuh (Roman 8:1) na u Trai Jisu, ha ka sien kaba nyngkong nga la mad ïa ka JINGLAITLUID!

Naduh kata ka por, nga la ju ïai peit ïa ka jingkren bad jingïalap ba iadei bad ka jingaiei ka jong U Blei man la ka miet. Mynta nga la kham sngew ïoh bor shibun eh ha ka met bad ka bor pyrkhat bad ruh ka jingsan ba kynja mynsiem. Kaei kaba da ki snem ba nga la don ha ka jingiaseng bymbiang ka jinghikai kam shym la lah ban ïarap ïa nga, Hynrei U Kpa Baieit eh u la ai ïa ka jingaiei, ha ka por kaba khyndiat eh haba nga la ïoh ban sngap ïa ki jinghikai ba tei mynsiem na u shakri U Blei ha TBN bad ruh da kaba pule ïa ka kot puson ba man ka sngi. Nga lah ban ong shisha, ba man la ka sngi ka jingim ka dei ka jingkyrkhu bad kane ka dei na ka daw jong ka jingmad ïa ka jinglaitluid ha kiba bun ki bynta jong ka jingim, bad mynta ka kwah ban im tang ha kabn mane bad ïaroh ïa Kpa Baieit man la ka sngi na ka bynta ka ktien ka jingim bad ka jngaiei kaba la pynkhiah ïa ka met, ka mynsiem bad ka jingmut jingpyrkhat.
Hato kam long ka jingphla kaba phylla! paralok baieit, ka jingiohpdiang ïa ka jinglaitluid bad ka jingjop kam shong haduh katno ngi la iaid lyngba ki jingeh bad ki jingmad kiba pangnud ne ki jngbakla kiba ngi la leh. Kumba long ka Iris haba phi pdiang ïa ka jingaiei, ka jngieit bad ka jingim jong U Jisu, phin lah ban ïoh ïa ka jinglaitluid bad kata ka lawei kaba phi angnud ban ïohi. Haba phi rat naduh tynrai ïa kata ka jingpynrem ha ka jingim, phin sdang ban jam sha ka jinglaitluid, jingpynkhiah, bad jingjop.
Paralok baieit, na ka bynta baroh ki jingshah jop ha ka rukom pyrkhat, ka jingkren, ne ha ki kam ba u nongshun u wan ban pynsngew ha phi, pdiang thymmai noh mynta ka sngi ïa ka jingshisha ba ym don shuh ka jingpynrem ha kita kiba don ha U Khrist Jisu ( Roman 8:1) Pdiang ïa kane ka jingshisha bad peitmat ha kane man la ka sngi bad kane kan pynlong ïaphi ban jop pyrshah ïa ka pop, ka jingmlien ba sniew, jingduh jingkyrmen ne ka jingeh kaba teh mraw pyrshah ïaphi. Haba u Jisu u la ïap halor jong ka diengphna, baroh kita ki jingshah jop jong phi ki la shah pynrem noh ha ka met jong u Jisu. Mynta ka sngi, la pyllaitluid ïaphi ban im ïa ka jingim kaba jop ym dei satia na ka daw ka jinglah jong phi ban pynkohnguh ïalade sha ka hukum, hynrei namar jong ka jingpynkohnguh jong phi ha ka jingngeit ha ka snam jong u Jisu Khrist bad ka hok ka jong u.
KA JINGPUSON MYNTA KA SNGI.
Kam don kawei ruh ka pop, ym don iwei ruh i phngit jong ka pop bad ka jingpynrem kaba u soitan u lah ban kawang ha nga mynta, kaba ka snam U Jisu kam lah ban pynkhuid pura phar
KA JINGDUWAI MYNTA KA SNGI
Trai Jisu, nga ainguh ïa Me na ka bynta ka snam kaba khlem pop, kaba janai jong Me kaba la pynmih na ka bynta ka jingmap ïa ki pop bad jingshah jop jong nga baroh, bad ka jingweng noh ïa baroh ka jinglehraiñ jong nga. Nga tip ba ngam lah ban leh ei ei ruh em ba ngan dei hok ban ïoh ïa ka jingieit bad ka jingkyrkhu jong Me ha ka jingim jong nga. Plied ïa ki khmat ka dohnud jong nga, Trai ba ngan ïohi ba ka snam jong me ka tap pura ïa nga. Da ka jingsngewrit nga ngeit ba ym don shuh ka jingpynrem na ka bynta jong nga, bad ba la pyllaitluid ïa nga bad la aibor ïa nga da ka jingaiei jong Me ban synshar pyrshah halor ka pop, ka jingmlien basniew bad ka jingduh jingkyrmen- AMEN
(Pule Jingkhien 23:8, Kitab Salm 34:22)