Press "Enter" to skip to content

Ap ka jingkyrduh um ha ki shnong ka WKHD ba thang khlaw pathar

Nongstoiñ, K’lyngkot 22: Ka jingthang pathar ïa ki khlaw ki btap bad ki lum ha West Khasi Hills ka jur bha ha ki aïom tlang khamtam naduh ki bnai Kyllalyngkot haduh Lber man la u snem.
Katei ka jingthang pathar ïa ki lum man la u snem, nalor ba ka pyningkhong bad pynduh jait ïa ki tynrai dieng kiba dang rit, hynrei ka pyntyrkhong ruh ïa ka khyndew.
Haba twad jingmut na kiba bun ki nongsynshar shnong halor katei ka mat, ki la ong ba ym lah ban len ba ki Dorbar jong ki shnong bapher bapher hapoh ka District ki ju buh ïa ki kyndon ba pyrkhing bad ka jingmaham kaba jur ba ym dei ban thang pathar ïa ki khlaw ki btap. Pynban, ki riew shim kabu kim kheiñ snep satia bad ka long ruh kaba eh ban lap ïa kiba kum kitei ki briew kiba don kti ha kaba thang ïa ki khlaw bad ki lum.
Shuh shuh, ki don pat ruh ki riew paidbah bad ki trai khyndew, kiba kwah ban pynksan ïalade da kaba ki ong ba lada thang ïa ki lum, ki phlang kin kham mih bad san kham kloi bad ki jingri kum ki masi ki blang kin ïoh pahuh ban bam.
Nalor nangta ka jingdon jong ki riew shim kabu kiba mlien ban thang ïa ki khlaw ki btap, ka wanrah ruh ïa ka jingma ïa ki ïing ki sem, khamtam ha ka por ba jur ka lyer bad haba don tang ki khynnah rit ha ïing. Nalor nangta ka jingthang ïa ki khlaw ki btap, ka pynlong ïa ki tyllong um pohliew bad ki wah duid ba kin rngad noh.
Haba phai pat ha ka jingdonkam jong ki paidbah ïa ka um bam um dih ka sorkar ka la don ïa ka Public Health Enginering, kaba dei ka tnad treikam kaba peit ïa ka jingpynbiang um ha ki shnong ki thaw. Hynrei katba katei ka tnad ka nang trei shitom ban pynbiang ïa ka um bam um dih, bun ki khwan myntoi shimet ki nang ïaleh pyrshah.
Lada ka jingkyrduh um kaba jur kan jia, hato ki paidbah kin kynnoh ïa ka PHE ba kam ai um ne kin kynnoh ïa ka sorkar ba ka leh beiñ. Lada ka long kumne ki paidbah ki la dei ban bishar bniah, namar kan sa poi ka por ba wat tang ka um ban dih ruh kan shem jingeh ban ïoh.