Press "Enter" to skip to content

Dawa bai lutksan ki hynriew shnong na Narpuh ki ban sa shah ktah ha ka Eco-Sensative Zone

Pynher dorkhas ki Waheh Shnong ha u PCCF ka tnat Forest:

Khliehriat, Kyllalyngkot, 22: Ka jingthmu jong ka sorkar ban pynlong Eco Sensative Zone ïa ka thaiñ Narpuh ka long ka ba ym pat lah ban pdiang da ki paidbah jong ka thaiñ, ha kaba ka Sorkar ka la pynbna ba haduh 2810 hectare ka ban kynthup haduh 197 Sq kms yn sa pynkylla Sensative Zone noh, kumta ki hynriew ngut ki wahehshnong ki la pynpaw ka jing bym sngewtynnad halor kane ka jingthmu ka Sorkar.
Ki hynriew ngut ki Waheh Shnong kiba na ka thaiñ Narpuh, East Jaiñtia Hills District ki la pynpaw ka jingsngew khia halor ka jingthmu ka Sorkar ban pynlong Eco Sensative Zone noh ha kine ki thaiñ namar ki la sngewthuh lypa ba lada kylla Eco Sensative Zone kan wanrah shibun ka jingduhnong bad kan ktah haduh katta katta ïa ka ioh ka kot jong ki paidbah. Halor kane ka jingsngew jong ki, ki hynriew ngut ki Waheh Shnong na ka thaiñ Narpuh kiba kynthup u Ma Chewanbiang Rymbai u Waheh Shnong ka Tongseng, u Ma Wonly Kyndoh u Waheh Shnong ka Lumtongseng, u Ma Bi Langshaiang u Waheh Shnong ka Sakhri, u Ma Stanly Massar u Waheh Shnong ka Brishyrnot, u Ma Frenly Nongtdu u Waheh Shnong ka Pandare bad u Ma Lalroukim Pagomte u Waheh Shnong jong ka Khaddum ha ka 17 tarik mynta u bnai ki la leit ban buh da ka ujor hakhmat u Principal Chief Conservator of Forest (PCCF) ha nongbah Shillong.
Kitei ki Waheh Shnong ki la pynpaw ba ki jaka kiba hap hapoh kane ka Eco Senstaive Zone kiba hap ha ka point 8-20 kumba la paw ha ka Map jong ka Narpuh Wildlife Sanctuary, East Jaiñtia Hills District ki kynthup ruh ïa ki hynriew tylli ki shnong,ka shnong Sakhri, Lumtongseng, Tongseng, Pandare, Khaddum bad ka Bri shyrnot, kata ka mut ba ki briew kiba shong basah hapoh kine ki thaiñ kin ym lah shuh ban leh ïa kino kino ki kam kumba ki ju leh ban im ja kpoh kum da kaba tih mawshun, ka rep ka riang, ka rep khlaw bad kiwei kiwei ki rukom rep.
“Kane ka jingpynkylla Eco Sensitive Zone kan ktah beit ïa ka kamai kajih kaba long ka jakpoh jong ki paidbah ha kaba ki nongshong shnong ha kine ki thaiñ ki dei kiba im ja kpoh da ka rep ka riang, ka tih maw shun ha kaba u mawshun bad ka Black Clay ki don haduh kumba 4496000000 metric tones kiba shongdor haduh T. 44960 klur tyngka kumta kane kan sa wanrah ruh ka jingduhnong kaba khraw ïa kito ki briew kiba la thied jaka ban tih ïa u mawshun ha kine ki thaiñ bad halor kane ruh ngi sngew ban dawa ba ka Sorkar ka dei ban siew shwa ïa ka bailutksan kaba T.44960 klur tyngka, kata haba kheiñ kyllum tang u mawshun bad ka Black Clay khlem pat kheiñ ïa ka bai jaka bad ka jingduhnong na ka rep ka riang,” ong kine ki Waheh Shnong ha ka dorkhas ba la aiti ha u PCCF.
“Ngi dawa ba ka Sorkar Jylla ka dei ban siew shwa ïa ka T.44960 klur tyngka sha ki trai par na ka bynta ka jingduhnong jong ki trai par na u mawshun bad u Black Clay. Lada ka Sorkar kam lah ban siew ïa katei ka dor ïa ki jaka kiba hap hapoh ka Eco Sensative Zone kiba hapoh kine ki hynriew shnong dei ban pyllait luid noh kumba ju long,” ki la ong.
“Ngi la buh ïa kane ka mat ha ka por ka ba biang, kumta ruh ngi kyrpad ba ka Sorkar ruh kan shim ïa kane ka mat ban ïakren ha ka por kaba biang,”ki la pynpaw shuh shuh.