Press "Enter" to skip to content

Ka ILP kan ym ktah ïa ki kam jngohkai pyrthei ha Meghalaya : Bah Prestone

Shillong, Kyllalyngkot 22 : U Symbud Myntri Rangbah ka jylla u bah Prestone Tynsong u la pynthikna ba kan ym don ka jingktah ïa ka kam jngohkai pyrthei ha ka jylla lada pyntreikam ïa ka Inner Line Permit (ILP) ruh.
U bah Tynsong u la kren ïa kane halor ka jingkynthoh jong u CEO ka NITI Aayog u Amitabh Kant ba ka jylla Meghalaya kan long kawei na ki jylla ka ban kiew bha ha ka kam jngoh kai ha kine ki saw – san snem ban wan.
“ Lada ka sorkar pdeng ka pdiang ïa ka resolution ba la mynjur da ka ïing dorbar thawaiñ ka jylla ban pyntreikam beit ia ka ILP ka sorkar jylla kan dang hap ban thaw la ki jong ki kyndon aiñ. Ngin pynthikna ba kita ki kyndon aiñ kin ym pyrkhing na ka bynta kito kiba wan jngohkai sha ka jylla. Ngin shah sngewbha ïa ki nongwan jngohkai ban wan rung khlem ki kyndon khnang ba kin iohi bad ïoh mad ïa ki jingitynnad bad jinglong ba pynngad ka mariang” ong u Dy Chief Minister.
U la ong shuh shuh ba u sngew ïahap bha bad kaei kaba u CEO jongka NITI Aayog u kren bad ïohi ïa ka jingriewspah ka jylla ha kane ka liang jngohkai pyrthei. Kumta u la ong ba ka sorkar jylla kan shim ïa baorh ki lad ki lynti ban peit ba kan ym don ka jingktah ïa ka kam jngoh kai pyrthei tangba donkam pat ka jingïada ba kyrpang ïa ki trai ri trai muluk.
U la ong ba ka jingkynnoh jongka Congress ba ka sorkar ka pyrshang ban ban pynbor ïa ki paidbah ban pdiang ïa ka Citizenship Amendment Act (CAA) kam long kaba shisha bad kane ka dei ruh ka rukom jongki Liang Pyrshah ban ïai kynthoh bad ïai kynnoh beit.
“ Ka sorkar hi ka la dep rai ban pyrshah beit ïa ka CAA. Na kata ka daw ngi la khot ïa ka Dorbar ba kyrpang ha ka 19 tarik u Nohphrah 2019 ban wanrah da ka resolution ban pyntreikam ïa ka ILP ha ka jylla. Kane ka pynpaw ba ka sorkar da kawei ka sur ka pyrshah ïa ka CAA” ong u bah Prestone.
Haba la kylli balei ba ka sorkar jylla kam ïaid da ka lynti kumba leh ka sorkar Kerala ban ujor sha ka ïing bishar Supreme Court pyrshah ïa ka CAA u bah Prestone u la ong ka rai jongka Assembly ka la biang eh ym donkam ban leh haduh katta.
“Nga kwah ban tip katno tylli ki jylla ha India kiba la wanrah da ka resolution kumba la leh da ka Meghalaya. Wat ka ïing bishar SC ruh kam pat ai kano kano ka rai halor ka CAA kat haduh mynta wat haba ka la shong bishar ruh” ong u bah Prestone.
Haba la kylli kumno ka sorkar jylla kan leh lada ka sorkar pdeng ka kyntait ban pyntreikam ïaka ILP, u la ong ba um kwah ban kynthoh ïa kaei kaba ym pat jia dei tad hadien ka jingïakynduh bad u Amit Shah Myntri Kam pohïing ka ri ba yn sa lah ban ong ei ei.
“ Ngi dang ap ïa ka jingkhot jongu sha Delhi namar u myntri rangbah u la dep ai da ka jingthoh ruh sha u kumta to ngin ïai ap hadien katei ka jingïakynduh” ong u bah Prestone.
Haba kylli pat hato ka sorkar kan dang pyntreikam beit ïa ka ILP lada ka s orkar pdeng ka mynjur ban ym pyntreikam ïa ka CAA ba haroh kawei ka jylla, u la ong ba halor kane ym dei pat ban don ki jingïakhih pyrshah.